ທ່ານ ປອ ຄໍາແພງ ໄຊສົມແພງ ລັດຖະມົນຕີ ກະຊວງ ຮສສ ມີຄໍາເຫັນຕໍ່ຄໍາເຈາະຈີ້ມ

24-10-2017, 15:16 717

ຂ້າ​ພະ​ເຈົ້າ​ຕາງໜ້າໃຫ້ຄະ​ນະ​ນຳ​ກະ​ຊວງ​ແຮງ​ງານ ແລະ ສະ​ຫວັດ​ດີ​ການ​ສັງ​ຄົມ ຂໍຖືເປັນກຽດຢ່າງສູງ ແລະ ມີຄວາມປິຕິຍີນດີ ເປັນຢ່າງຍິ່ງ ທີ່ໄດ້ຮັບອະນຸຍາດ ຈາກຄະນະປະທານກອງປະຊຸມ ໃຫ້ຂຶ້ນມາ ມີ​ຄວາມ​ເຫັນຕໍ່ຄໍາເຈາະຈີ້ມ ຂອງຄະນະ​ເລ​ຂາ​ທິ​ການ ສະ​ພາ​ແຫ່ງ​ຊາດ ​ກ່ຽວ​ກັບການ​ປົກ​ປ້ອງ​ສິດ ແລະ ​ຜົນ​ປະ​ໂຫຍດ ອັນ​ຊອບ​ທຳ​ຂອງ​ແຮງ​ງານ​ລາວ ຢູ່​ພາຍ​ໃນ, ຕ່າງ​ປະ​ເທດ ແລະ ແຮງ​ງານຕ່າງ​ປະ​ເທດ ຢູ່ ສ​ປ​ປ ລາວ ຕໍ່​​ກອງ​ປະຊຸມ​ສະ​ໄໝ​ສາມັນ​ ​ເທື່ອ​ທີ 4 ຂອງສະພາ​ແຫ່ງ​ຊາດ ຊຸດ​ທີ VIII ຄັ້ງ​ນີ້, ເຊິ່ງກະຊວງແຮງງານ ແລະ ສະຫວັດດີການສັງຄົມ ຂໍມີ​ຄວາມ​ເຫັນ ດັ່ງນີ້:

  1. ນິຕິກຳກ່ຽວກັບການຄຸ້ມຄອງແຮງງານ

​ເພື່ອເປັນ​ການ​ຈັດ​ຕັ້ງຄຸ້ມ​ຄອງ ປົກ​ປ້ອງ​ສິດ ແລະ ​ຜົນ​ປະ​ໂຫຍດຂອງແຮງ​ງານ​ລາວຢູ່​ພາຍ​ໃນ, ຕ່າງ​ປະ​ເທດ ແລະ ແຮງ​ງານຕ່າງ​ປະ​ເທດ ຢູ່ ສ​ປ​ປ ລາວ, ລັດ​ຖະ​ບານກໍ່​ຄື​ກະ​ຊວງ​ແຮງ​ງານ ແລະ ສະ​ຫວັດ​ດີ​ການ​ສັງ​ຄົມ ໄດ້​ອອກ​ນິ​ຕິ​ກຳ ຈຳ​ນວນ​ໜຶ່ງ ເຊິ່ງ​ມີ​ກົດ​ໝາຍ 1 ສະ​ບັບ, ດຳ​ລັດ 2 ສະ​ບັບ, ຄຳ​ສັ່ງ​ຂອງ​ນາ​ຍົກ​ລັດ​ຖະ​ມົນ​ຕີ 1 ສະ​ບັບ, ຂໍ້​ຕົກ​ລົງ​ຂອງ​ກະ​ຊວງ ຮ​ສ​ສ 5 ສະ​ບັບ, ຂໍ້​ກຳ​ນົດຂອງ​ກະ​ຊວງ ຮ​ສ​ສ 1 ​ສະ​ບັບ, ບົດ​ແນະ​ນຳ​ຂອງ​ກະ​ຊວງ ຮ​ສ​ສ 1 ສະ​ບັບ ແລະ ແຜນ​ງານ​ແຫ່ງ​ຊາດ 1 ສະ​ບັບ (ເອກະສານຊ້ອນທ້າຍຄັດຕິດມາພ້ອມນີ້).

  1. ກົນໄກການຄຸ້ມຄອງແຮງງານ

ເພື່ອ​ເຮັດ​ໃຫ້ການ​ປະ​ສານ​ງານ ໃນ​ວຽກ​ງານ​ຄ​ຸ້ມ​ຄອງ​ແຮງ​ງານ ມີ​ຄວາມ​ກົມ​ກຽວ​ກັນ, ພວກ​ເຮົາ​ໄດ້​ສ້າງ​ຕັ້ງ​ກົນ​ໄກ​ການ​ເຮັດ​ວຽກ ຕາມ​ລະ​ບົບ​ໄຕ​ພາ​ຄີ ເຊິ່ງ​ຕາງ​ໜ້າ​ລັດ​ຖະ​ບານ ແມ່ນ​ກະ​ຊວງ​ແຮງ​ງານ ແລະ ສະ​ຫວັດ​ດີ​ການ​ສັງ​ຄົມ, ຕາງ​ໜ້າ​ໃຫ້​ຜູ້​ອອກ​ແຮງ​ງານ ແມ່ນ​ສູນ​ກາງ​ສະ​ຫະ​ພັນ​ກຳ​ມະ​ບານ​ລາວ ແລະ ຕາງ​ໜ້າ​ໃຫ້ ຜູ້​ໃຊ້​ແຮງ​ງານ ແມ່ນ ສະ​ພາ​​ການ​ຄ້າ ແລະ ອຸດ​ສາ​ຫະ​ກຳແຫ່ງ​ຊາດ ໂດຍ​ມີ​ລະ​ບົບ​ການ​ປະ​ຊຸມ​ປຶກ​ສາ​ຫາ​ລື 3 ເດືອນ ຕໍ່​ຄັ້ງ ທີ່​ພັດ​ປ່​ຽນ​ກັນ​ເປັນ​ເຈົ້າ​ພາບ. ພ້ອມ​ກັນ​ນັ້ນ, ຍັງ​ໄດ້ສ້າງຕັ້ງຄະນະກຳມະການສາຍພົວພັນແຮງງານຂັ້ນສູນກາງ ແລະ ຂັ້ນແຂວງຂຶ້ນ ເພື່ອ​ເຮັດ​ວຽກ​

ຮ່ວມ​ກັນ​ໃນ​ການ​ແກ້​ໄຂ​ບັນ​ຫາ​ທີ່​ກ່ຽວ​ຂ້ອງ​ກັບ​​ສິດ ແລະ ຜົນ​ປະ​ໂຫຍດ​ຂອງຜູ້​ໃຊ້​ແຮງ​ງານ ແລະ ຜູ້​ອອກ​ແຮງ​ງານ.

ໃນ​ດ້ານ​ອື່ນ, ໂດຍ​ປະ​ຕິ​ບັດ​ຕາມ​ທິດເຮັດທົດລອງວຽກງານ 3 ສ້າງ, ກະ​ຊວງແຮງງານ ແລະ ສະຫວັດດີການສັງຄົມໄດ້ປະຕິບັດ 5 ພາລະບົດບາດມະຫາພາກ  ແລະ ຫັນວຽກ, ມອບຄວາມຮັບ ຜິດຊອບໃຫ້ແຂວງ, ເມືອງ ແລະ ບ້ານ ຕາມທິດ 3 ສ້າງ. ເພື່ອເປັນບ່ອນອີງທາງດ້ານນິຕິກໍາໃນການ ຈັດຕັ້ງປະຕິບັດ, ​ຄະນະຮັບຜິດຊອບສາມສ້າງຂອງຂະແໜງແຮງງານຂັ້ນສູນກາງ ໄດ້ຄົ້ນຄວ້າສ້າງຄູ່ມືແນະນໍາ ໃນການແບ່ງຄວາມຮັບຜິດຊອບລະຫວ່າງກະຊວງ, ພະແນກ ຮສສ ແຂວງ, ຫ້ອງການ ຮສສ ເມືອງ  ແລະ ຜູ້ຮັບຜິດຊອບວຽກງານແຮງງານ ຢູ່ຂັ້ນບ້ານ ເຊັ່ນ:

ມອບໃຫ້ພະແນກ ຮສສ ແຂວງ ແລະ ຫ້ອງການ ຮສສ ເມືອງ ສ້າງແຜນດຸນດ່ຽງແຮງງານໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມຂັ້ນຂອງຕົນ, ຮ່ວມກັບຫົວໜ່ວຍແຮງງານຂຶ້ນແຜນຄວາມຕ້ອງການນໍາໃຊ້ແຮງງານ ນັບທັງແຮງງານພາຍໃນ ແລະ ຕ່າງປະເທດ, ໃນນີ້:​ ສໍາລັບແຮງງານຕ່າງປະເທດ ແມ່ນສະເໜີຂໍອະນຸ ມັດໂກຕ່າລວມສູນຢູ່ຂັ້ນກະຊວງ, ສະເພາະການນໍາເຂົ້າ, ອອກບັດອະນຸຍາດເຮັດວຽກໃຫ້ແຮງງານຕ່າງປະເທດ ຕາມໂກຕ່າທີ່ໄດ້ຮັບການອະນຸມັດ, ການເກັບຄ່າທໍານຽມ, ການຄຸ້ມຄອງ, ການຕິດຕາມກວດກາສະພາບແຮງງານຕາມຫົວໜ່ວຍແຮງງານຕ່າງໆນັ້ນ ກໍແມ່ນຂຶ້ນກັບຄວາມຮັບຜິດຊອບຂອງແຕ່ລະທ້ອງຖິ່ນ.

​ໄດ້ມອບຄວາມຮັບຜິດຊອບໃຫ້ຂັ້ນທ້ອງຖິ່ນເປັນຜູ້ຄຸ້ມຄອງ ແລະ ຈັດຕັ້ງການພັດທະນາສີມືແຮງງານ ແຕ່ລະດັບ 1-3 (ສີມືແຮງງານຂັ້ນພື້ນຖານ, ສີມືແຮງງານລະດັບເຄິ່ງຊໍານານງານ ແລະ ລະ ດັບນາຍຊ່າງຊໍານານງານ) ເພື່ອຕອບສະໜອງຄວາມຕ້ອງການຂອງຕະຫລາດແຮງງານຢູ່ທ້ອງຖິ່ນ.

ເພື່ອຫລຸດຜ່ອນການເຄື່ອນຍ້າຍແຮງງານຈາກຊົນນະບົດເຂົ້າສູ່ຕົວເມືອງ, ໄດ້ສົມທົບກັບອໍານາດການປົກຄອງທ້ອງຖິ່ນ, ຫົວໜ່ວຍ​ແຮງ​ງານ,​ໂຄງການ​ລົງທຶນ ​ແລະ ຜູ້​ປະກອບ​ການ ຈັດຕັ້ງການ ຝືກ ແລະ ພັດທະນາສີມື​ແຮງ​ງານເຄື່ອນ​ທີ່, ຝຶກ​ກ່ອນ​ເຂົ້າ​ສູ່​ຕໍາ​ແໜ່​ງງານໃຫ້ແກ່ກຳລັງແຮງງານ ໂດຍສຸມໃສ່ກຸ່ມເປົ້າໝາຍຜູ້ດ້ອຍໂອກາດ,​ ຜູ້ທຸກຍາກ ​ໃນ​ບັນດາແຂວງທົ່ວປະ​ເທດ.

  1. ສະພາບການຄຸ້ມຄອງ

3.1 ການຄຸ້ມຄອງແຮງງານພາຍໃນ

​ໃນ​ໄລ​ຍະ​ຜ່ານ​ມາ, ຂະ​ແໜງ​ແຮງ​ງານ ແລະ ສະ​ຫວັດ​ດີ​ການ​ສັງ​ຄົມ ນັບ​ແຕ່​ສູ​ກາງ ແລະ ທ້ອງ​ຖິ່ນ​ໄດ້​ເອົາ​ໃຈ​ໃສ່ຄຸ້ມ​ຄ​ອງ​ແຮງ​ງານ​ພາຍ​ໃນ ທັງ​ໃນ​ລະ​ບົບ ແລະ ນອກ​ລະ​ບົບ ຕາມ​ກົດ​ໝາຍ​ວ່າ​ດ້ວຍ​ແຮງ​ງານ ໂດຍການໂຄສະນາເຜີຍແຜ່ກົດ​ໝາຍ ​ແລະ ​ລະ​ບຽບ​ການ​ດ້ານ​ແຮງ​ງານ, ໃຫ້ຄຳປຶກສາ, ແກ້ໄຂຂໍ້ຂັດແຍ່ງດ້ານ​ແຮງ​ງານ, ຊຸກຍູ້ສົ່ງເສີມໃຫ້​ຜູ້​ໃຊ້ແຮງງານ ແລະ ຜູ້ອອກແຮງງານຮັບຮູ້ກົດໝາຍ ແລະ ລະບຽບການຕ່າງໆ ເຊັ່ນ: ຄຸ້ມຄອງທາງດ້ານຄ່າແຮງງານ, ເງິນເດືອນ, ສ້າງສັນຍາແຮງງານ, ສ້າງກົດລະບຽບພາຍໃນກ່ຽວກັບການຄຸ້ມຄອງ ແລະ ນຳໃຊ້ແຮງງານຂອງຫົວໜ່ວຍແຮງງານ, ການກຳນົດສະພາບແວດລ້ອມທີ່ດີໃນການເຮັດວຽກ, ການນຳໃຊ້ແຮງງານຕາມກົດໝາຍວ່າດ້ວຍແຮງ

ງານ, ກຳນົດໜ້າວຽກເບົາ ແລະ ໜ້າວຽກທີ່ເປັນອັນຕະລາຍສຳລັບຜູ້ອອກແຮງງານໄວໜຸ່ມ, ການເຂົ້າເປັນ​ສະ​ມາ​ຊິກປະກັນສັງຄົມ ແລະ ສະຫວັດດີການອື່ນໆ ທາງດ້ານແຮງງານ.

ໃນ 9 ເດືອນຂອງ ປີ 2017 ຜ່​ານ​ມາ, ສາມາດລົງ​ຕິດ​ຕາມກວດ​​ກາຫົວ​ໜ່ວຍ​ແຮງ​ງານໃນ​ຂອບ​ເຂດ​ທົ່ວ​ປະ​ເທດໄດ້ທັງຫມົດ 2,778 ຫົວໜ່ວຍ, ລວມມີແຮງງານລາວ ແລະ ແຮງງານຕ່າງປະ ເທດທັງໝົດ 47,162 ຄົນ, ຍິງ 16,831 ຄົນ, ເງິນເດືອນສະເລ່ຍ ຫຼື ຄ່າແຮງງານຂອງຜູ້ອອກແຮງງານຂະແໜງກະສິກຳ 1,100,000 ກີບ/ຄົນ/ເດືອນ, ຂະແໜງອຸດສາຫະກຳ 1,200,000 ກີບ/ຄົນ/ເດືອນ, ຂະແໜງບໍລິການ 2,500,000 ກີບ/ຄົນ/ເດືອນ.

3.2 ການຄຸ້ມຄອງແຮງງານໄປອອກແຮງງານຢູ່ຕ່າງປະເທດ

  ການ​ຄຸ້ມ​ຄອງ​ແຮງ​ງານ​ລາວ​ທີ່​ໄປ​ອອກ​ແຮງ​ງານ​ຕ່າງ​ປະ​ເທດ ແມ່ນ​ໄດ້​ພະ​ຍາ​ຍາມ ຮ່ວມ​ມື​ກັບ​ປະ​ເທດ​ໃກ້​ຄຽງ ໃນ​ການ​ສ້າງ​ບົດ​ບັນ​ທຶກ​ຄວາມ​ເຂົ້າ​ໃຈ​ສອງ​ຝ່າຍ ແລະ ໄດ້​​ມີ​ບົດ​ບັນ​ທຶກ​ການ​ຈັດ​ສົ່ງ​ແຮງ​ງານ​ໄປ ສ.​ເກົາ​ຫລີ; ​ບົດ​ບັນ​ທຶກວ່າ​ດ້ວຍ​ການ​ຮ່ວມ​ມື​ດ້ານ​ແຮງ​ງານ​ລາວ-ຍີ່​ປຸນ; ​ບົດ​ບັນ​ທຶກ​ວ່າ​ດ້ວຍ​ການ​ຮ່ວມ​ມື​ດ້ານ​​ແຮງ​ງານ​ລາວ-ໄທ; ຂໍ້​ຕົກ​ລົງວ່າ​ດ້ວຍ​ການ​ຈ້າງ​ງານ ລາວ-ໄທ.

ສຳ​ລັບ​ການ​ປົກ​ປ້ອງ​ສິດ​ຜົນ​ປະ​ໂຫຍດ​ຂອງແຮງງານລາວທີ່​ສົ່ງໄປເຮັດວຽກແບບຖຶກຕ້ອງຕາມ ກົດໝາຍຕາມ (MOU), ທາງຂະ​ແໜງແຮງງານ ແລະ ສະຫວັດດີການສັງຄົມໄດ້​ປະ​ສານ​ສົມ​ທົບ​ກັບ​ຂະ​ແໜງ​ການ​ກ່ຽວ​ຂ້ອງ (ກະ​ຊວງ​ການ​ຕ່າງ​ປະ​ເທດ, ກະ​ຊວງ ປກ​ສ) ມີກົນໄກການຄຸ້ມຄອງນັບແຕ່ຕົ້ນທາງຈົນເຖິງປາຍທາງ. ອັນ​ສຳ​ຄັນ​ໜຶ່ງ, ແມ່ນ​ໄດ້ສົ່ງຜູ້ຮັບຜິດຊອບວຽກງານແຮງງານໄປປະຈຳຢູ່ສະຖານເອກອັກຄະລັດຖະທູດລາວປະຈຳຣາຊະອານາຈັກໄທ ເພື່ອຊ່ວຍ​ວຽກດ້ານແຮງງານ​ໃນ​ການຕິດຕາມຄຸ້ມຄອງ, ໃຫ້ການຊ່ວຍເຫລືອ​ທາງ​ດ້ານ​ກົດ​ໝາຍ ໃນ​ກໍ​ລະ​ນີແຮງງານເກີດ​ມີບັນຫາຕ່າງໆ ໃຫ້ທັນ​ກັບ​ສະ​ພາບ​ການ. ຜ່ານ​ການ​ຈັດ​ຕັ້ງ​ປະ​ຕິ​ບັດ​ໃນ 9 ເດືອນ 2017 ຜ່ານ​ມາ, ສາ​ມາດ​ສົ່ງ​ແຮງ​ງານ ໄປ​ອອກ​ແຮງ​ງານ​ຖືກ​ຕາມ​ກົດ​ໝາຍ ​ຢູ່ປະ​ເທດ​ໄທ 17,372 ຄົນ, ຍິງ 8,321 ຄົນ; ຍີ່​ປຸ່ນ 350 ຄົນ ແລະ ໄປ ສ.ເກົາ​ຫລີ ແມ່ນກຳ​ລັງ​ຢູ່​ໃນ​ຂັ້ນ​ຕອນ​ການ​ຄັດ​ເລືອກ ​ບົນ​ພື້ນ​ຖານ​ຂໍ້​ຕົກ​ລົງ ຂອງ​ສອງ​ຝ່າຍ ແລະ ມາດ​ຕະ​ຖານ​ດ້ານ​ແຮງ​ງານ ຂອງ ສ. ເກົາ​ຫລີ.

​ສ່ວນ​ແຮງງານລາວທີ່ຂ້າມໄປອອກແຮງງານຢູ່ຕ່າງປະເທດ ໂດຍສະເພາະແມ່ນປະເທດໃກ້​ຄຽງ(ປະ​ເທດໄທ) ສ່ວນຫຼາຍແມ່ນໄປດ້ວຍຕົນເອງ, ໄປຕາມການຊັກຊວນຂອງໝູ່ເພື່ອນ ຫຼື ຍາດພີ່ນ້ອງ ແລະ ແຮງງານເຫຼົ່ານັ້ນສ່ວນຫຼາຍໄປແບບບໍ່ມີເອກະສານຖືກຕ້ອງ, ຈຳນວນໜຶ່ງມີເອກະສານເດີນທາງແບບທ່ອງທ່ຽວ ແລະ ອີກຈຳນວນໜຶ່ງໄປແບບບໍ່ມີເອກະສານ ຈິ່ງເຮັດໃຫ້ການຫັນເອົາແຮງງານເຫຼົ່ານັ້ນ ເຂົ້າສູ່ກົນໄກການຄຸ້ມຄອງດ້ວຍລະບຽບກົດໝາຍ ແລະ ບົດ​ບັນ​ທຶກ​ຄວາມ​ເຂົ້າ​ໃຈ​ຂອງ​ສອງ​ຝ່າຍ​ມີ​ຄວາມຫຍຸ້ງຍາກ. ແຕ່ເ​ຖິງຢ່າງໃດກໍ່​ຕາມ, ຂະ​ແໜງແຮງງານ ແລະ ສະຫວັດດີການສັງຄົມ ກໍ່ໄດ້ມີການປະສານສົມທົບກັບປະເທດໃກ້ຄຽງ ໂດຍສະເພາະປະເທດໄທ ໃນການແກ້ໄຂບັນຫາແຮງງານທີ່ໄປອອກແຮງງານແບບບໍ່ຖຶກຕ້ອງ ໂດຍໄດ້ມີການປະຊຸມປຶກສາຫາລືກັນໃນ​ຫລາຍ​ລະ​ດັບ

ເພື່ອຊອກຫາທາງແກ້ໄຂ ໃນ​ການ​ຫັນ​ເອົ​າ​ແຮງ​ງານ​ເຫລົ່າ​ນັ້​ນ ໄປ​ຄຸ້ມ​ຄອງ​ໃຫ້​ຖືກ​ກົດ​ໝາຍ ແລະ ບົດ​ບັນ​ທຶກ​ທີ່​ໄດ້​ຕົກ​ລົງ​ຮ່ວມ​ກັນ. ປັດຈຸບັນ ໂດຍ​ໄດ້​ຮັບ​ການ​ເຫັນ​ດີ​ຈາກ​ລັດ​ຖະ​ບານ, ໄດ້ສົ່ງເຈົ້າຫນ້າທີ່ຂອງລາວ ຈາກ 5 ພາກສ່ວນກ່ຽວຂ້ອງ ​ໄປ​ປະ​ຕິ​ບັດ​ໜ້າ​ທີ່ ຊົ່ວ​ຄາວ ຢູ່​ປະ​ເທດ​ໃກ້​ຄຽງເພື່ອ​ຄົ້ນ​ຄວ້າອອກເອກະສານໃຫ້ແຮງງານລາວທີ່ໄປເຮັດວຽກບໍ່ຖຶກຕ້ອງດັ່ງ​ກ່າວ ​ທັງ​ສອດ​ຄ່ອງ​ກັບ​ນິ​ຕິ​ກຳຂອງທາງການໄທ ເພື່ອໃຫ້ພວກເຂົາໄດ້ຮັບເອກະສານທີ່ຖຶກຕ້ອງ ແລະ ສາມາດເຮັດວຽກແບບຖຶກຕ້ອງ ຕາມການຕົກລົງຂອງສອງຝ່າຍ. ໂດຍ​ອີງ​ຕາມ​ຂໍ້​ມູນ​ຢັ້ງ​ຢືນ​ຈາກ​ເຈົ້າ​ໜ້າ​ທີ່ຝ່າຍ​ໄທ, ແຮງ​ງານ​ລາວ ທີ່​ເຮັດ​ວຽກ​ບໍ່​ຖືກ​ຕ້ອງ ມີປະ​ມານ 158 ພັນ​ຄົນ, ໃນ​ນີ້: ແຮງ​ງານ​ທີ່​ມີ​​ໜັງ​ສືນາຍ​ຈ້າງ​ຮັບ​ຮອງ ມີ 87 ພັນ​ຄົນ ແລະ ແຮງ​ງານ​ທີ່​ກະ​ຊວງ​ແຮງ​ງານ​ໄທ​ສາ​ມາດຢັ້ງ​ຢືນ​ໃຫ້​ປັບ​ສະ​ຖາ​ນະ​ພາບ​ໃຫ້ອອກ​ແຮງ​ງານ​ຖືກ​ຕ້ອງ​ຕາມ​ກົດ​ໝາຍ​(ກຸ່ມບັດ​ສີ​ຊົມ​ພູ) ມີ 71 ພັນ​ກວ່າ​ຄົນ ແລະ ຜ່ານ​ການ​ຈັດ​ຕັ້ງ​ປະ​ຕິ​ບັດ ຂອງ​ເຈົ້າ​ໜ້​ທີ່​ລາວ​ເຮົາ ແຕ່​ເດືອນ​ສິງ​ຫາ ເຖິງ ວັນ​ທີ 12 ຕຸ​​ລາ 2017 ສາ​ມາດ​ອອກ​ເອ​ກະ​ສານຢັ້ງ​ຢືນ​ສະ​ຖາ​ນະ​ບຸກ​ຄົນ​ໄດ້ 6,460 ຄົນ, ໃນ​ນີ້: ຜູ້​ອອກ​ແຮງ​ງານ  6,076 ຄົນ, ຍິງ 3,115 ຄົນ ແລະ ຜູ້​ຕິດ​ຕາມ 384 ຄົນ, ຍິງ 179 ຄົນ.

3.3 ການຄຸ້ມຄອງແຮງງານແລະ ຄົນຕ່າງປະເທດທີ່ມາອອກແຮງງານ ແລະ ທຳມາຫາກີນ ຢູ່ ລາວ.

ການ​ຄຸ້ມ​ຄອງ​ແຮງ​ງານຕ່າງ​ປະ​ເທດທີ່ມາ​ເຮັດ​ວຽກ ຢູ່ ສ​ປ​ປ ລາວ ໄດ້​ພະ​ຍາ​ຍາມປະ​ຕິ​ບັດ​ຕາມ​ກົດ​ໝາຍ​ວ່າ​ດ້ວຍ​ແຮງ​ງານ ໃນ​ອັດ​ຕາ 15 ສ່ວຍ​ຮ້ອຍ ສຳ​ລັບ ຜູ້​ມີ​ວິ​ຊາ​ສະ​ເພາະ​ທີ່​ອອກ​ແຮງ​ງານ ທາງ​ດ້ານ​ຮ່າງ​ກາຍ ແລະ 25 ສ່ວນ​ຮ້ອຍ ສຳ​ລັບ​ຜູ້​ອອກ​ແຮງ​ງານ​ດ້ວຍ​ມັນ​ສະ​ໝອ​ງ ຂອງ​ຈຳ​ນວນ​ຜູ້​ອອກ​ແຮງ​ງານ ລາວ​ທັງ​ໝົດ ໃນ​ຫົວ​ໜ່ວຍ​ແຮງ​ງານນັ້ນ; ສຳ​ລັບ​ໂຄງ​ການ​ຂະ​ໜາດ​ໃຫ​ຍ່ ມີ​ໄລ​ຍະ 5 ປີ​ລົງ​ມາ ແມ່ນ​ປະ​ຕິ​ບັດ​ຕາມ​ສັນ​ຍາ ລະ​ຫວ່າງ​ລັດ​ຖະ​ບານ ແລະ ເຈົ້າ​ຂອງ​ໂຄງ​ການ, ເຊິ່ງ​ການ​ນຳ​ເຂົ້າ​ແຮງ​ງານ​ຕ່າງ​ປະ​ທດ​ທີ່​ມາ​ເຮັດ​ວຽກ​ຕາມ​ຫົວ​ໜ່ວຍ​ແຮງ​ງານ ແລະ ໂຄງ​ການ​ລົງ​ທຶນ​ຂະ​ໜາດ​ໃຫ​ຍ່ ແມ່ນ ໄດ້​ມີ​ການ​ຂຶ້ນ​ທະ​ບຽນ, ອອກ​ອະ​ນຸ​ຍາດ​ໃຫ້​ແຮງ​ງານ​ຕ່າງ​ປະ​ເທດ​ມາ​​ເຮັດ​ວຽກ​ຢູ່ ສ​ປ​ປ ລາວ ຕາມ ມາດ​ຕາ 18 ຂອງ​ຂໍ້​ຕົກ​ລົງ 5418/ຮ​ສ​ສ ວ່າ​ດ້ວຍ​ການ​ອະ​ນຸ​ຍາດ​ນຳ​ເຂົ້າ​ແຮງ​ງານ​ຕ່າງ​ປະ​ເທດ​ມາ​ເຮັດ​ວຽກ ຢູ່ ສ​ປ​ປ ລາວ, ເຊິ່ງມີ​ກຳ​ນົດ​ເວ​ລາ​ເຮັດ​ວຽກຢູ່ ສ​ປ​ປ ລາວ ໃນ​ເວ​ລາ 2 ປີ ສາ​ມາດ​ຕໍ່​ໄດ້​ອີກ 2 ປີ ແຕ່​ສູງ​ສຸດບໍ່​ເກີນ 4 ປີ, ຖ້າ​ຮອດ​ກຳ​ນົດ 4 ປີ​ແລ້ວ ຕ້ອງ​ໄດ້​ກັບ​ຄືນ​ປະ​ເທດ ໂດຍບໍ່​ຮັບ​ການ​ພິ​ຈາ​ລະ​ນາ​ຕໍ່​ບັດ​ອະ​ນຸ​ຍາດ​ເຮັດ​ວຽກ ຢ່າງ​ເດັດ​ຂາດ, ພາຍ​ຫລັງ​ທີ່ຜູ້​ອອກ​ແຮງ​ງານ​ໄດ້​ກັບ​ຄືນ​​ປະ​ເທດ​ໄປ​ແລ້ວ ເປັນ​ເວ​ລາ 2 ປີ ຈິ່ງ​​ສາ​ມາດ​ດຳ​ເນີນ​ເອ​ກະ​ສານ​ເຂົ້າ​ມາ​ເຮັດ​ວຽກ ຕາມ​ລະ​ບຽບ​ການ​ດ້ານ​ແຮງ​ງານ. ສັງ​ລວມ​ແລ້ວ ຄວາມ​ໝາຍ​ຂອງ​ຄຳ​ວ່າ  }ແຮງງານຕ່າງປະເທດ~ ໝາຍ​ເຖິງ ຄົນຕ່າງປະເທດທີ່ເຂົ້າມາເຮັດວຽກຢູ່ຕາມຫົວໜ່ວຍແຮງງານ, ໂຄງການ, ສະຖານທີຕ່າງໆ ຢູ່ ລາວ ທີ່ໄດ້ຮັບວີຊາ ແຮງງານ ( LA B2 ) ຈາກກະຊວງການຕ່າງປະເທດ ຫລື ສະຖານກົງສູນ ຂອງ ລາວ ທີ່ຕ່າງປະເທດ ແລະ ຕ້ອງມີບັດອະນຸຍາດເຮັດວຽກ ຈາກຂະແໜງແຮງງານ ແລະ ສະຫວັດີການສັງຄົມ.

ລວມຄວາມວ່າ, ແຮງງານຕ່າງປະເທດທີ່ມາອອກແຮງງານ ຢູ່ ລາວ ແມ່ນໄດ້ຮັບການຄຸ້ມຄອງເລີ່ມແຕ່ການອະນຸຍາດນຳເຂົ້າ, ການອອກບັດອະນຸຍາດເຮັດວຽກ, ການຕິດຕາມກວດກາ ການເຄື່ອນໄຫວເປັນປົກກະຕິຈາກເຈົ້າຫນ້າທີ່ກວດກາແຮງງານ ບົນພື້ນຖານກົດໝາຍ, ລະບຽບການດ້ານແຮງງານຂອງ ລາວ ແລະ ບົດບັນທຶກຄວາມເຂົ້າໃຈຂອງສອງຝ່າຍ.

ສຳລັບການແກ້ໄຂບັນຫາຄົນຕ່າງປະເທດ ທີ່ເຂົ້າມາເຄື່ອນໄຫວແບບບໍ່ຖືກຕ້ອງຕາມກົດ    ໝາຍ ແລະ ລະບຽບການດ້ານ​ແຮງ​ງານ ຂອງ ສປປ ລາວນັ້ນ ແມ່ນໄດ້​ປະ​ສານ​ສົມ​ທົບ​ກັບ​ຂະ​ແໜງ​ປ້ອງ​ກັນ​ຄວາມ​ສະ​ຫງົບ ຈັດ​ຕັ້ງປະຕິບັດຕາມຄຳສັ່ງ ເລກ​ທີ 62/ນຍ, ລົງ​ວັນ​ທີ 13 ພະ​ຈິກ 2015 ວ່າ​ດ້ວຍ​ການ​ອຳ​ນວຍ​ຄວາມ​ສະ​ດວກ ແລະ ໃຫ້​ການ​ຮ່ວມ​ມື​ໃນ​ການ​ຂຶ້ນ​ທະ​ບຽນ ແລະ ອອກ​ບັດ​ອະ​ນຸ​ຍາດ​ຊົ່ວ​​ຄາວ​ໃຫ້​ຄົນ​ຕ່າງ​ປະ​ເທດ ເຊິ່ງ​ຜ່ານ​ການ​ຈັດ​ຕັ້ງ​ປະ​ຕິ​ບັດ​ໄລ​ຍະ​ທີ 1 (ຮອດ​ວັນ​ທີ 12 ທັນ​ວາ 2016) ສາ​ມາດ​ຂຶ້ນ​ທະ​ບຽນ​ຊົ່ວ​ຄ​າວ ຄົນ​ຕ່າງ​ປະ​ເທດ ໄດ້​ທັງ​ໝົດ 24,172 ຄົນ, ຍິງ 6,996 ຄົນ, ໃນ​ນັ້​ນ: ສັນ​ຊາດ​ຫວຽດ​ນາມ 19,707 ຄົນ,ຍິງ 5,817 ຄົນ; ຈີນ 3,650 ຄົນ,ຍິງ 1,173 ຄົນ; ໄທ 690 ຄົນ,ຍິງ 131 ຄົນ ແລະ ອື່ນໆ 125 ຄົນ, ຍິງ 13 ຄົນ. ແຮງ​ງານ​ເຫລົ່າ​ນັ້​ນ ເປັນຜູ້ຕົກຢູ່ໃນເງື່ອນໄຂຕ້ອງຊໍຳລະສະສາງ 16,827 ຄົນ, ຕ້ອງ​ໄດ້​ປັບ​ສະ​ຖານ​ະ​ພາບ 7,345 ຄົນ. ປັດຈຸບັນ ກຳ​ລັງ​ຈັດ​ຕັ້ງ​ປະ​ຕິ​ບັດ ໄລ​ຍະ​ທີ 2  ໂດຍສ້າງຄວາມເຂົ້າ ໃຈກ່ຽວກັບການຂຶ້ນທະບຽນ ແລະ ອອກບັດອະ ນຸຍາດເຄື່ອນໄຫວຊົ່ວຄາວຂອງຄົນຕ່າງປະເທດ ຢູ່ ໃນ ສປປ ລາວ ໃນຂອບເຂດທົ່ວປະເທດ ແລະ ຈະ​ໄດ້ສະ​ຫລຸບ​​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ ຕາມ​ຄຳ​ສັ່ງ 62/ນຍ ດັ່ງ​ກ່າວ ໃນ​ທ້າຍ​ປີ 2017 ແລະ ມອບ​ໃຫ້​ແຕ່​ລະ​ພາກ​ສ່ວນ​ຄຸ້ມ​ຄອງ​ຕາມ​ຂະ​ແໜງ​ການ.

  1. ສິ່ງທ້າທາຍ

ຜ່ານການຈັດຕັ້ງ​ປະຕິບັດ​ວຽກ​ງານ​ຄຸ້ມ​ຄອງ​ປົກ​ປ້ອງ​ສິດ ແລະ ຜົນ​ປະ​ໂຫຍດຂອງ​ຜູ້​ອອກ​ແຮງ​ງານ​​ໄລ​ຍະຜ່ານ​ມາ ສັງ​ເກດ​ເຫັນ​ວ່າ​ຍັງ​ມີ​ສິ່ງ​ທ້າ​ທາຍ​ບາງ​ດ້ານ ​ດັ່ງນີ້:

- ການໂຄ​ສະ​ນາ ເຜີຍ​ແຜ່, ສຶກສາອົບຮົມກົດໝາຍ ແລະ ລະບຽບການດ້ານແຮງງານຕໍ່ເປົ້າ ໝາຍ​ຕ່າງໆ ຍັງ​ເຮັດ​ໄດ້ຫນ້ອຍ; ຫົວ​ໜ່ວຍ​ແຮງ​ງານ​ຈຳ​ນວນ​ໜຶ່ງບໍ່​ໄດ້​ໃຫ້​ຄວາມ​ສຳ​ຄັນ​ຕໍ່ວຽກ​ງານ

ຄວາມ​ປອດ​ໄພ ​ແລະ ສຸຂະພາບ​ແຮງ​ງານ ຂອງຜູ້ອອກແຮງງານເທົ່າທີ່ຄວນ;

- ກາ​ນຄຸ້ມ​ຄອງ​ແຮງ​ງານ​ລາວ​ທີ່​ໄປ​ເຮັດ​ວຽກ​ຢູ່​ຕ່າງປະ​ເທ ຍັງເຮັດບໍ່ໄດ້ດີ ໂດຍສະເພາະແມ່ນ ​​ການສ້າງຕຳແໜ່ງງານ​​ພາຍໃນເພື່ອຮອງຮັບຜູ້ອອກແຮງງານທີ່ເພີ່ມຂຶ້ນໃນແຕ່ລະປີ. ພ້ອມກັນນັ້, ຍັງບໍ່ທັນມີກົນໄກທີ່ມີປະສິດທິພາບເພື່ອສະກັດກັ້ນໃນການໄປອອກແຮງງານທີ່ຜິດກົດຫມາຍຢູ່ຕ່າງປະເທດຂອງແຮງງານລາວ. ​

- ​ຫົວໜ່ວຍແຮງງານ ແລະ ຜູ້ປະກອບການ ຢູ່ແຕ່ລະທ້ອງຖິ່ນ ຍັງ​ບໍ່ໃຫ້ການຮ່ວມ​ມື​ ຕໍ່ກັບ ການແກ້ໄຂບັນຫາ​ຄົນ​ຕ່າງປະ​ເທດ​ທີ່​ມາເຄື່ອນ​ໄຫວທຳມາຫາກີນ ແລະ ອອກແຮງງານ​ບໍ່​ຖືກຕ້ອງຕາມກົດໝາຍ ເທົ່າທີຄວນ.

- ການ​ບັງຄັບ​ໃຊ້​ກົດໝາຍທີ່ກ່ຽວຂ້ອງ​ກັບການປົກປ້ອງສິດຜົນປະຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານ ຢູ່ແຕ່ລະທ້ອງຖິ່ນ ຍັງບໍ່ທັນເຂັ້ມງວດ.

  1. ທິດທາງແກ້ໄຂ ໃນຕໍ່ໜ້າ

ເພື່ອ​ສືບ​ຕໍ່​ປັບ​ປຸງວຽກ​ງານ​ຄຸ້ມ​ຄອງ​ປົກ​ປ້ອງ​ສິດ ແລະ ​ຜົນ​ປະ​ໂຫຍດ​ຂອງ​ຜູ້​ໃຊ້​ແຮງ​ງານ ແລະ ຜູ້​ອອກ​ແຮງ​ງານໃນ​ຕໍ່​ໜ້ານັ້​ນ, ຂະ​ແໜງ ຮ​ສ​ສ ຈະ​ສືບ​ຕໍ່​ປະ​ສານ​ສົມ​ທົບ​ກັບ​ຂະ​ແໜງ​ການ​ທີ່​ກ່ຽວ​ ຂ້ອງ​ດຳ​ເນີນ​ວຽກ​ງານ​ຈໍ​ານວນ​ໜຶ່ງ ດັ່ງ​ນີ້:

        1) ສືບຕໍ່ຈັດຕັ້ງເຜີຍແຜ່ກົດໝາຍ ແລະ ລະບຽບການດ້ານແຮງງານໃຫ້ຫລາຍຂຶ້ນ ໂດຍນຳໃຊ້ສື່ຕ່າງໆ ທີ່ມີຢູ່ໃຫ້ມີປະສິດທິຜົນຫລາຍ​ຂຶ້ນ ແລະ ເພີ່ມທະວີການຊຸກຍູ້, ຕິດຕາມການຈັດຕັ້ງປະ ຕິບັດກົດຫມາຍ ແລະ ລະ​ບຽບ​ການ​ດ້ານ​ແຮງ​ງານ ໂດຍລົງກວດກາແຮງງານ ຢູ່ບັນດາຫົວຫນ່ວຍແຮງງານໃນທົ່ວປະເທດ ຢ່າງກວ້າງ​ຂວາງ;

        2) ເອົາໃຈໃສ່ສ້າງນິຕິກຳລຸ່ມກົດຫມາຍ ເພື່ອ​ຕອບ​ສະ​ໜອງ​ກັບ​ຄວາມ​ຮຽກ​ຮ້ອງ​ຕ້ອງ​ການ​ຂອງວຽກ​ງານ​ໃນ​ແຕ່​ລະ​ໄລ​ຍະ ພ້ອມ​ທັງ​ປັບ​ປຸງ​ກົນ​ໄກ​ປະ​ສານ​ງານ​ທີ່​ມີ​ໃນ​ປັດ​ຈຸ​ບັນໃຫ້​ສາ​ມາດ​ເຄື່ອນ​ໄຫວ​ປະ​ຕິ​ບັດ​ພາ​ລະ​ບົດ​ບາດ​ຂອງ​ຕົນ ໃຫ້​ມີ​ຄວາມ​ຄ່ອງ​ຕົວ​ກວ່າ​ເກົ່າ;

        3) ສືບຕໍ່ແກ້ໄຂບັນຫາຄົນຕ່າງປະເທດທີ່ເຄື່ອນໄຫວທຳ​ມາ​ຫາ​ກີນ ແລະ ອອກ​ແຮງ​ງານບໍ່ຖືກຕ້ອງຕາມກົດຫມາຍ ຕາມຄຳສັ່ງເລກທີ 62/ນຍ ໃຫ້ສຳເລັດພາຍໃນທ້າຍປີ 2017;

        4) ຊຸກ​ຍູ້​ໃຫ້​ແຕ່​ລະ​ພາກ​ສ່ວນ​ບັງ​ຄັບ​ໃຊ້​ກົດ​ໝາຍ​ ແລະ ລະ​ບຽບ​ການ​ທີ່​ກ່ຽວ​ຂ້ອງ​ກັບ​ການ​ປົກ​ປ້ອງ​ສິດ ຜົນ​ປະ​ໂຫຍດ​ຂອງ​ຜູ້​ໃຊ້​ແຮງ​ງານ ແລະ ຜູ້​ອອກ​ແ​ຮງ​ງານ ໃຫ້​ມີ​ປະ​ສິດ​ທິ​ຜົນ​ກວ່າ​ເກົ່າ;

        5)ສ້າງຄວາມເຂັ້ມແຂງທາງດ້ານວິຊາການວຽກ​ງານຄຸ້ມຄອງແຮງງານໃຫ້ແກ່​ບຸກ​ຄະ​ລາ​ກອນ ​ທີ່​ກ່ຽວ​ຂ້ອງ ທັງ​ສູນ​ກາງ ແລະ ທ້ອງ​ຖິ່ນ ໃຫ້​ມີ​ຄວາມ​ເຂັ້ມ​ແຂງ;

 ຫ້ອງການກະຊວງ

 

ຂ່າວສານອື່ນໆ