ລັດຖະມົນຕີ​ແຮງ​ງານ​ເຂົ້າຮ່ວມກອງປະຊຸມສະໄຫມພິເສດຂອງລັດຖະມົນຕີແຮງງານອາຊຽນຢູ່ສິງກະໂປ

08-09-2017, 08:49 189

 

 

ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ ເຂົ້າຮ່ວມກອງປະຊຸມສະໄໝພິເສດຂອງລັດຖະມົນຕີແຮງງານອາຊຽນ ແລະ ລົງນາມຖະ ແຫຼງການຮ່ວມ ວ່າດ້ວຍການປັບປຸງວຽກສຸຂະພາບ ແລະ ຄວາມປອດໄພແຮງງານໃນສະຖານທີ່ເຮັດວຽກ ທີ່ປະເທດສິງກະໂປ.
...................

ກອງປະຊຸມສະໄໝພິເສດ ຂອງລັດຖະມົນຕີແຮງງານອາຊຽນ ເພື່ອປຶກສາຫາລື, ຮັບຮອງ ແລະ ລົງນາມຖະ ແຫຼງການຮ່ວມ ວ່າດ້ວຍການປັບປຸງວຽກສຸຂະພາບ ແລະ ຄວາມປອດໄພແຮງງານໃນສະຖານທີ່ເຮັດວຽກ ສໍາລັບການ ພັດທະນາແບບຍືນຍົງ ເຊິ່ງໄດ້ຈັດຂື້ນຢູ່ ທີີ່ປະເທດສິງກະໂປ ໃນວັນທີ 3 ກັນຍາ 2017 ພາຍໃຕ້ການເປັນປະທານ ຂອງ ທ່ານ ປອ. ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ. ກອງປະຊຸມຄັ້ງນີ້ໄດ້ຈັດຂື້ນຄູ່ຂະໜານກັບກອງປະຊຸມສະມັດຊາໃຫຍ່ຂອງໂລກຄັ້ງທີ XXI ວ່າດ້ວຍສຸຂະພາບ ແລະ ຄວາມປອດໄພແຮງງານໃນສະຖານທີ່ເຮັດວຽກ ເຊິ່ງໄດ້ຈັດຂື້ນແຕ່ວັນທີ 3-6 ກັນຍາ 2017 ທີ່ປະເທດສິງກະໂປ.
ເນື່ອງໃນໂອກາດທີ່ ທ່ານ ປອ. ຄຳແພງ ໄຊສົມແພງ ໄດ້ເຂົ້າຮວ່ມ ແລະ ເປັນປະທານກອງປະຊຸມຄັ້ງນີ້ ທ່ານ ໄດ້ກ່າວວ່າ “ວຽກປ້ອງກັນສຸຂະພາບ ແລະ ຄວາມປອດໄພແຮງງານແມ່ນເປັນວຽກໜຶ່ງຂອງພື້ນຖານ ສິດທິມະນຸດ, ສະພາບແວດລ້ອມທີ່ດີໃນສະຖານທີ່ເຮັດວຽກ, ເຮັດໃຫ້ແຮງງານປອດໄພ ແລະ ມີສຸະພາບແຂງແຮງ ເຊິ່ງເປັນເງື່ອນໄຂໃຫ້ແກ່ຜະລິດຕະພາບແຮງງານ, ການດູແລເບິ່ງແຍງ ແລະ ຍົກສູງຄຸນນະພາບຊີວິດຂອງແຮງງານ, ປະກອບສ່ວນເຂົ້າໃນການຫຼຸດຜ່ອນຄວາມທຸກຍາກ ແລະ ການພັດທະນາເສດຖະກິດສັງຄົມແຫ່ງຊາດ”. ການລົງນາມໃນຖະແຫຼງການຮ່ວມ ຄັ້ງປະຖົມມະລຶກຂອງອາຊຽນ ວ່າດ້ວຍການປັບປຸງວຽກສຸຂະພາບ ແລະ ຄວາມປອດໄພແຮງງານໃນສະຖານທີ່ເຮັດວຽກ ສຳລັບການເຕີບໂຕແບບຢືນຍົງ ແມ່ນສະແດງເຖິງຄວາມເອົາໃຈໃສ່ຂອງລັດຖະມົນຕີແຮງງານອາຊຽນຕໍ່ກັບການປັບປຸງວຽກສຸຂະພາບ ແລະ ຄວາມປອດໄພແຮງງານທີ່ສອດຄ່ອງກັບວິໄສທັດປະຊາຄົມວັດທະນະທໍາ-ສັງຄົມອາຊຽນ 2025 ເພື່ອເຮັດໃຫ້ປະຊາຊົນອາຊຽນໄດ້ຮັບຜົນປະໂຫຍດ, ການມີສ່ວນຮ່ວມ, ຄວາມຍືນຍົງ ແລະ ມີຄວາມເຂັ້ມແຂງ; ແຜນງານລັດຖະມົນຕີແຮງງານອາຊຽນ 2020, ແຜນປະຕິດບັດງານອາຊຽນ-ໂອສະເນັດ 2016-2020 ແລະ ເປົ້າໝາຍການພັດທະນາແບບຢືນຍົງຂອງສາກົນ 2030. ພ້ອມດຽວກັນ, ທ່ານ ປອ ຄໍແພງ ໄຊສົມແພງ ຍັງໄດ້ມອບເອກະ ສານຖະແຫຼງການຮ່ວມໃຫ້ແກ່ ທ່ານ ເລ ເລືອງ ມິງ ເລຂາທິການໃຫຍ່ອາຊຽນ.
ເນື່ອງໃນໂອກາດການເຂົ້າຮ່ວມຄັ້ງນີ້, ທ່ານ ປອ. ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ທັງເປັນປະທານກອງປະຊຸມລັດຖະມົນຕີແຮງງາອາຊຽນຍັງໄດ້ເຂົ້າຮ່ວມພິທີເປີດກອງ ປະຊຸມສະມັດຊາໃຫຍ່ຂອງໂລກຢ່າງເປັນທາງການ ເຊິ່ງໄດ້ຮັບກຽດກ່າວເປີດ ໂດຍພະນະທ່ານ ລີ ຊຽນ ລຸ່ງ (Lee Hsien Loong) ນາຍົກລັດຖະມົນຕີ ແຫ່ງສາທາລະນະລັດ ສິງກະໂປ. ນອກຈາກນັ້ນ, ຍັງໄດ້ພົບປະສອງຝ່າຍກັບ ທ່ານ ລີມ ສະວີເຊ ລັດຖະມົນຕີກະຊວງແຮງງານ ຂອງສິງກະໂປ ເພື່ອປຶກສາຫາລືການຮ່ວມມືວຽກພັດທະນາສີມືແຮງງານ ໂດຍສະເພາະການຝຶກອົບຮົມຄູຝຶກ ແລະ ໄດ້ພົບປະກັບຮອງລັດຖະມົນຕີ ຄວາມປອດໄພແຮງງານຂອງ ສປ ຈີນ ເພື່ອປຶກສາຫາລືການຮ່ວມມືດ້ານວຽກງານປະກັນສຸຂະພາບ ແລະ ຄວາມປອດໄພແຮງງານ.

ລາຍງານໂດຍ ທ່ານ ໂຈມແຍງ ແພງທອງສະຫວັດ
ຮູບພາບ ໂດຍ: ທ່ານ ວິທູນ ສິດທິມໍລະດາ
ຂ່າວ: ເພັດສະໄໝ ພິມມະສອນ

 
 
 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

ຂ່າວສານອື່ນໆ