ທ່ານນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ສືບຕໍ່ໃຫ້ການຊ່ວຍເຫລືອ 2 ແຂວງ

23-08-2017, 10:56 634


ທ້າຍອາທິດຜ່ານມານີ້, ກະຊວງແຮງງານສະຫວັດດີການສັງຄົມ ນຳໂດຍ ທ່ານນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານສະຫວັດດີການສັງຄົມ ( ຮສສ ), ໄດ້ເດີນໜ້າສືບຕໍ່ໃຫ້ການຊ່ວຍເຫລືອ 2 ແຂວງ ເຊັ່ນ ແຂວງຄຳມ່ວນ ແລະ ແຂວງສະຫວັນນະເຂດ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມໃນໄລຍະຜ່ານມາ, ໃນນັ້ນ ໄດ້ນຳເອົາເງິນຈຳນວນ 140 ລ້ານກີບໄປມອບໃຫ້ແຂວງຄຳມ່ວນ ແລະ ແຂວງະຫວັນນະເຂດ ເພື່ອນຳໃຊ້ເຂົ້າໃນການປັບປຸງຊີວິດການເປັນຢູ່ຂອງເຂົາເຈົ້າມາສູ່ປົກກະຕິໂດຍໄວ.

ທ່ານ ໂອໄດ ສຸດາພອນ ເຈົ້າແຂວງຄຳມ່ວນ ໃຫ້ຮູ້ວ່າ: ພື້ນທີ່ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມຄັ້ງນີ້ ປະກອບມີ 4 ເມືອງຄື: ເມືອງມະຫາໄຊ, ຍົມມະລາດ, ເຊບັ້ງໄຟ ແລະ ເມືອງຄູນຄຳ, ລວມມີ 50 ບ້ານ, ໃນຈຳນວນ 3.774 ຄອບຄົວ, ມີເນື້ອທີ່ຖືກນ້ຳຖ້ວມ 1.664 ເຮັກຕາ, ໃນນັ້ນ ມີສັດລ້ຽງປະເພດງົວ ແລະ ສັດປີກຈຳນວນໜຶ່ງ ໄດ້ຮັບຄວາມເສຍຫາຍ. ຂະນະດຽວກັນ ໃນທ້າຍເດືອນກໍລະກົດ, ທາງແຂວງ ໄດ້ລົງແຈກຢາຍເຂົ້າສານໜຽວ ຈໍານວນ 70 ໂຕໃຫ້ປະຊາຊົນ 4 ເມືອງດັ່ງກ່າວ ເພື່ອເປັນການຊ່ວຍເຫລືອສຸກເສີນເບື້ອງຕົ້ນແກ່ການຟື້ນຟູການຜະລິດ ແລະ ການປັບປຸງຊີວິດການເປັນຢູ່ຂອງຜູ້ໄດ້ຮັບຜົນກະທົບຈາກໄພພິບັດດັ່ງກ່າວດີຂຶ້ນ./

ຂ່າວສານອື່ນໆ