ຮອງລັດຖະມົນຕີກະຊວງ ຮສສ ລາວ ເດີນທາງທັດສະນະສຶກສາ ແລະ ແລກປ່ຽນບົດຮຽນໃນ ຫົວຂໍ້“ການບໍລິຫານວຽກງານຄວາມປອດໄພ ແລະ ສຸຂະພາບແຮງງານ” ທີ່ ນະຄອນປັກກິ່ງ,ສປ ຈີນ

04-05-2018, 13:44 347

ເພື່ອເປັນການ ສົ່ງເສີມສາຍພົວພັນ ແລະ ການຮ່ວມມືທີ່ດີງາມ ຂອງສອງລັດຖະບານ, ກໍຄື ສອງ ກະຊວງແຮງງານ ແລະ ສະຫວັດດີການສັງຄົມ ( ຮສສ ) ສປປ ລາວ ກັບ ກະຊວງບໍລິຫານການຄຸ້ມຄອງເຫດການສຸກເສີນ ສປ ຈີນ ເພື່ອແລກປຽ່ນບົດຮຽນ ວຽກງານການບໍລິຫານວຽກງານຄວາມປອດໄພ ແລະ ສຸຂະພາບແຮງງານ ສອງຝ່າຍ ໃຫ້ມີການພັດທະນາທີ່ດີຂຶ້ນເປັນກ້າວໆ ພ້ອມທັງ ເພື່ອແນໃສ່ການສ້າງຄວາມອາດສາມາດທາງດ້ານວິຊາການ, ໃນການຊ່ວຍເຫຼືອເຊິ່ງກັນ ແລະ ກັນ ແລະ ໂດຍຕອບສະໜອງຕາມຄຳເຊີນ ຂອງ ທ່ານ ຊຸນ ຫົວຊານ ຮອງລັດຖະມົນຕີກະຊວງບໍລິຫານການຄຸ້ມຄອງເຫດການສຸກເສີນ ຂອງ ສປ ຈີນ. ດັ່ງນັ້ນ, ທ່ານ ບຸນຄົງ ຫຼ້າສຸກັນ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ( ຮສສ ) ສປປ ລາວ ພ້ອມຄະນະ, ໄດ້ເດີນທາງ ໄປທັດສະນະສຶກສາ ແລະ ແລກປ່ຽນບົດຮຽນ ດ້ານການບໍລິຫານວຽກງານຄວາມປອດໄພ ແລະ ສຸຂະພາບແຮງງານ ຢ່າງເປັນທາງການ, ໃນລະຫວ່າງວັນທີ 25-29 ເມສາ 2018 ທີ່ຜ່ານມານີ້, ທີ່ນະຄອນປັກກິ່ງ, ສປ ຈີນ.
ການເດີທາງໃນຄັ້ງນີ້, ທ່ານ ບຸນຄົງ ຫຼ້າສຸກັນ ພ້ອມຄະນະ, ຍັງໄດ້ແລກປ່ຽນບົດຮຽນ ພ້ອມທັງປະກອບຄຳຄິດ ຄຳເຫັນ ຢູ່ ສອງປະເດັ່ນຫຼັກຄື: ການຈັດຕັ້ງລະບົບການບໍລິຫານວຽກງານຄວາມປອດໄພ ແລະ ສຸຂະພາບ ແລະ ການປຶກສາຫາລື ກ່ຽວກັບການ ຮ່າງບົດບັນທຶກຄວາມເຂົ້າໃຈ ລະຫວ່າງ ກະຊວງແຮງງານ ແລະ ສະຫວັດດີການສັງຄົມ ຂອງ ລາວ ກັບ ກະຊວງບໍລິຫານການຄຸ້ມຄອງເຫດການສຸກເສີນ ຂອງ ສປຈີນ, ໂດຍພື້ນຖານດ້ານເນື້ອໃນລວມຂອງ ຮ່າງບົດບັນທຶກຄວາມເຂົ້າໃຈດັ່ງກ່າວນັ້ນ ທາງ ສປ ຈີນ ແມ່ນເຫັນດີເປັນເອກະພາບ ແຕ່ຈະໄດ້ມີການປັບປຸງບາງເນື້ອໃນເພື່ອໃຫ້ສອດຄ່ອງກັບພາລະບົດບາດຂອງກະຊວງບໍລິຫານການຄຸ້ມຄອງເຫດການສຸກເສີນ ຕື່ມ, ພາຍຫລັງສຳເລັດ ແມ່ນຈະສົ່ງຮ່າງບົດບັນທຶກດັ່ງກ່າວກັບຄືນໃຫ້ ສປປ ລາວ ເພື່ອຈະເຊັນກັນໃນໄວໆນີ້ ທີ່ ນະຄອນຫຼວງວຽງຈັນ ສປປ ລາວ.
ແລະໂອກາດດັ່ງກ່າວ ຄະນະຜູ້ແທນລາວ, ຍັງໄດ້ເຂົ້າຮ່ວມງານກິດຈະກຳສະເຫຼີມສະຫຼອງວັນຄວາມປອດໄພ ແລະ ສຸຂະພາບແຮງງານໂລກ, ເພື່ອລະນຶກເຖິງວັນຄວາມປອດໄພ ແລະ ສຸຂະພາບແຮງງານໂລກ ທີ່ເມືອງຟັງຊານ, ນະຄອນປັກກິ່ງ ໂດຍເປັນກຽດກ່າວເປີດພິທີເປີດງານດັ່ງກ່າວ ທ່ານ ຊຸນ ຫົວຊານ ຮອງລັດຖະມົນຕີກະຊວງບໍລິຫານການຄຸ້ມຄອງເຫດການສຸກເສີນ ແລະ ໃນນັ້ນ ຄະນະຜູ້ແທນລາວ ກໍ່ໄດ້ໄປຢ້ຽມຢາມ ຊົມຫ້ອງທົດລອງການເກັບເອົາຕົວຢ່າງສະພາວະມົນລະພິດທາງອາກາດ ແລະ ຝຸ່ນລະອອງໃນອາກາດມາວິເຄາະ ຂອງສະຖາບັນຄວາມປອດໄພ ແລະ ສຸຂະພາບແຮງງານ ແລະ ເທັກໂນໂລຊີ ຂອງ ສປ ຈີນ, ໂດຍໄດ້ຖືກການຮັບຕ້ອນຈາກ ທ່ານ ບີ ຊູໄບ (Bi Shubai) ຮອງຜູ້ອຳນວຍການໃຫຍ່ຂອງສະຖາບັນຄວາມປອດໄພ ແລະ ສຸຂະພາບແຮງງານ ແລະ ເທັກໂນໂລຊີ ນຳອີກ./

( ຂໍ້ມູນຂ່າວ: ຄະນະຕິດຕາມ, ຂ່າວ: ເພັດສະໄໝ )

ຂ່າວສານອື່ນໆ