ເກົາຫລີເໜືອກຽມປ່ອຍ 3 ນັກໂທດ ອາເມລິກາ ຄິມແຈ້ງຈີນພ້ອມປົດນິວເຄຼຍ

04-05-2018, 13:57 172

ກະຊວງການຕ່າງປະເທດຈີນຖະແຫຼ່ງເມື່ອວັນທີ່ 3 ພຶດສະພາ 2018 ວ່າທ່ານ ຫວັງ ອີ້ ລັດຖະມົນຕີວ່າການກະຊວງການຕ່າງປະເທດຈີນ ແລະເຈົ້າໜ້າທີ່ລະດັບສູງຂອງຈີນທີ່ໄປຢາມເກົາຫຼີເໜືອ ຫຼັງການເຈລະຈາຂັ້ນສຸດຍອດຄັ້ງປະຕິວັດສາດລະຫວ່າງທາ່ນຄິມ ຈອງ ອຶນ ຜູ້ນຳເກົາຫຼີເໜືອກັບປະທານາທິບໍດີມູນ ແຈ-ອິນ ແຫ່ງເກົາຫຼີໃຕ້ ເມື່ອ 27 ເມສາ ໄດ້ພົບປະຫາລືກັບທ່ານຄິມ ຈອງ-ອຶນ ໃນນະຄອນປຽງຢາງ ແລະທ່ານຄິມໄດ້ແຈ້ງວ່າເກົາຫຼີເໜືອມີຈຸດຢືນອັນໜັ້ນຄົງທີ່ຈະປົດອາວຸດນິວເຄຼຍ

ທ່ານຄິມຍັງລະບຸວ່າການປ່ຽນແປງເຊີງບວກເທີງຄາບມະຫາສະໜຸດເກົາຫຼີເປັນປະໂຫຍດຕໍ່ການແກ້ບັນຫາຢ່າງສັນຕິ ສ່ວນທ່ານຫວັງ ອີ້ ກ່າວຍ້ອງຍໍທ່ານຄິມທີ່ຕັດສິນໃຈເດັດຂາດ ນຳມາເຊີ່ງການປ່ຽນແປງດ້ານບວກ ແລະກ່າວວ່າຈີນສະໜັບສະໜູນການຢຸດຕິພາວະສົງຄາມເທິງຄາບມະຫາສະໜຸດເກົາຫຼີ ສະໜັບສະໜູນເກົາຫຼີເໜືອທີ່ຫັນມາພັດທະນາເສດຖະກິດແທນ ຈີນພ້ອມຕິດຕໍ່ຮ່ວມມືກັບເກົາຫຼືເໜືອຕໍ່ໄປ ແລະຮັບບົດບາດທີ່ສ້າງສັນໃນການຫາທາງອອກທາງການເມືອງເທີງຄາບມະຫາສະໜຸດເກົາຫຼີ

ດ້ານປະທານາທິບໍດີໂດນັສ ທຣັມ ແຫ່ງສະຫະລັດ ອາເມລິກາ ເຊີ່ງຄາດວ່າຈະພົບປະເຈລະຈາກັບທ່ານຄິມ ຈອງ-ອຶນ ໃນເດືອນພຶດສະພາ ຫຼືຕົ້ນເດືອນມີຖຸນາ 2018 ໂພສຂໍ້ຄວາມທາງທະວິດເຕີວ່າຈະມີຂ່າວໃນໄວໆນີ້ເລື່ອງຊາວອາເມລິກາ 3 ຄົນທີ່ຖືກຈັບໃນເກົາຫຼີເໜືອ ຫຼັງເຈົ້າໜ້າທີ່ສະຫະລັດ ເຜີຍໂດຍອ້າງແຫຼ່ງຂ່າວວ່າທັງ 3 ຄົນຖືກໂຍກຍ້າຍໂຕຈາກຄ້າຍກັກກັນໃຊ້ແຮງງານໄປຍັງໂຮງແຮມໃກ້ນະຄອນປຽງຢາງ ຄາດວ່າເພື່ອລໍການປ່ອຍໂຕກ່ອນທຣັມເຈລະຈາກັບ ຄິມ ຈອງ-ອຶນ

ລັດຖະບານເກົາຫຼີເໜືອຍັງປະຕິເສດວ່າບໍ່ໄດ້ແຮັກຖານຂໍ້ມູນຂອງໜ່ວຍງານສະຫະປະຊາຊາດ (ຢູເອັນ) ເຊີ່ງເຮັດໜ້າທີ່ສອດຊ່ອງມາດຕະການຂວ້ຳບາດເກົາຫຼີເໜືອ ສ່ວນໂພສຂອງສຳນັກຂ່າວ “ຣອຍເຕີ” ລະບຸວ່າ ຄະແນນນິຍົມຂອງປະທານາທິບໍດີມູນ ແຈ-ອິນ ສູງຂື້ນຫຼາຍຫຼັງເຈລະຈາກັບຜູ້ນຳເກົາຫຼີເໜືອ ໂດຍຊາວເກົາຫຼີໃຕ້ສະໜັບສະໜູນທ່ານມູນຫຼາຍກວ່າ 3 ໃນ 4 ຊື່ງເປັນຄະແນນນິຍົມສູງສຸດຂອງຜູ້ນຳເກົາຫຼີໃຕ້ຄົນໃດ ຫຼັງຮັບຕຳແໜ່ງຄົບ 1ປີ

ສ່ວນທ່ານແອນໂຕນິໂອ ກູເຕີເຮສ ເລຂາທິການສະຫະປະຊາຊາດ (ຢູເອັນ) ຖະແຫຼງວ່າ ຕົນຄາດຫັວງໃນດ້ານດີວ່າຈະມີຄວາມຄີບໜ້າເລື່ອງການແກ້ໄຂບັນຫາໂຄງການນິວເຄຼຍຂອງເກົາຫຼີເໜືອ-ໃຕ້ ແລະສະຫະລັດ ໃນຊ່ວງນີ້ ແຕ່ເຂົາເຕືອນວ່າສະຫະລັດ ບໍ່ຄວນລົ້ມເລີກຂໍ້ຕົກລົງດ້ານນິວເຄຼຍກັບອີຮ່ານ ຈົນກວ່າຈະມີທາງເລືອກອື່ນທີ່ດີ ຄຳເຕືອນຂອງກູເຕີເຮສມີຂື້ນຂະນະທີ່ແຫຼ່ງຂ່າວວົງໃນ ແລະເຈົ້າໜ້າທີ່ລັດຖະບານ ທີ່ບໍ່ລະບຸຊື່ 2 ຄົນ ເຜີຍວ່າທຣັມເກືອບຈະຕັດສິນໃຈຖອນໂຕຈາກຂໍ້ຕົກລົງນິວເຄຼຍກັບອີຣ່ານແລ້ວ ແມ່ນຖືກຕໍ່ຕ້ານຈາກທົ່ວໂລກແລ້ວລວມທັງສະຫະພາບຢູໂຣບ (ອີຢູ) ສ່ວນອີຣ່ານກໍ່ເຕືອນເຖີງຜົນກະທົບຮ້າຍແຮງຖ້າທຣັມຖອນໂຕ.

ຂອບ​ໃຈ​ສຳ​ນັກ​ຂ່າວ ເອ​ບີ​ຊີ​ລາວ

ຂ່າວສານອື່ນໆ