ປັບປຸງຊີວິດການເປັນຢູ່ຜູ້ທຸກຍາກ

03-08-2017, 12:07 102

ກອງ​ປະຊຸມ​ສະຫຼຸບ​ຜົນສຳເລັດ ໃນ​ການຈັດຕັ້ງ​ປະຕິບັດ​ໂຄງການປົກ​ປ້ອງ​ສັງຄົມ ແລະ ປັບປຸງ​ຊີວິດການ​ເປັນ​ຢູ່​ຂອງ​ປະຊາຊົນ​ແບບຍືນ​ຍົງ ຈັດ​ຂຶ້ນ​ວັນ​ທີ 26 ກໍລະກົດ 2017 ທີ່​ນະຄອນຫຼວງ​ວຽງ​ຈັນ ໂດຍ​ເປັນ​ປະທານ​ຮ່ວມ​ຂອງ​ທ່ານນາງ ໃບ​ຄຳ ຂັດ​ທິ​ຍະ ຮອງ​ລັດ​ຖະມົນຕີ​ກະຊວງ ​ຮສສ ທ່ານ ຈອນ ວິນ​ລຽມ ເອກ​ອັກ​ຄະ​ລັດ​ຖະ​ທູດອົດ​ສະ​ຕຣາ​ລີ ປະຈຳ​ລາວ ມີ​ຜູ້ຕາງໜ້າ​ຈາກ​ພາກສ່ວນ​ທີ່​ກ່ຽວຂ້ອງ​ຈາກ​ສູນ​ກາງ ທ້ອງຖິ່ນ ແລະ ອົງ​ການຈັດຕັ້ງ​ສາກົນ​ເຂົ້າ​ຮ່ວມ.

ທ່ານ​ນາງ ໃບ​ຄຳ ຂັດ​ທິ​ຍະ ຮອງ​ລັດຖະມົນຕີກະຊວງ​ແຮງງານ ແລະ ສະຫວັດດີ​ການ-ສັງຄົມ​ ກ່າວ​ວ່າ: ສຳລັບ​ໂຄງການ​ດັ່ງກ່າວ​ນີ້ ແມ່ນ​ມີ​ຄວາມ​ໝາຍຄວາມ​ສຳຄັນ​ຫຼາຍ ຕໍ່​ກັບ​ການພັດທະນາ​ຊີວິດ​ການ​ເປັນ​ຢູ່​ຂອງປະຊາຊົນ​ໃນ​ຂັ້ນ​ທ້ອງຖິ່ນ ເປັນຕົ້ນ​ແມ່ນ ກິດຈະກຳ​ໂຄງການປັບປຸງ​ຊີວິດ​ການ​ເປັນ​ຢູ່​ຂອງ​ປະຊາ​ຊົນ​ຜູ້​ທຸກ​ຍາກ​ຢູ່ 3 ແຂວງພາກ​ໃຕ້​ຂອງ​ລາວ ເຊັ່ນ: ແຂວງສະຫວັນ​ນະ​ເຂດ ໄດ້​ຈັດ​ຕັ້ງ​ປະຕິບັດ​ຢູ່​ເມືອງ​ເຊ​ໂປນ ແຂວງ​ສາລະ​ວັນ ຢູ່​ເມືອງ​ເລົ່າ​ງາມ ແລະ ແຂວງ​ຈຳປາ​ສັກ ຢູ່​ເມືອງ​ສຸ​ຂຸ​ມາ ແລະ ເມືອງ​ມູນ​ລະ​ປະ​ໂມກ ເຊິ່ງເປັນ​ການ​ຊ່ວຍເຫຼືອ​ປະຊາຊົນ​ຜູ້ທຸກ​ຍາກ​ໃນ​ກຸ່ມ​ເປົ້າ​ໝາຍ​ຂອງໂຄງການ​ໂດຍ​ກົງ ໂດຍ​ຜ່ານ​ກິດຈະ​ກຳ​ທີ່​ເຂົາເຈົ້າ​ມີ​ສ່ວນ ແລະ ເລືອກ​ທີ່​ຈະ​ປະກອບ​ອາຊີບ ໂດຍຮັບ​ເອົາ​ປັດ​ໄຈ​ການ​ຜະລິດ ເງິນສະໜັບສະໜູນ ແລະ ການ​ເຝີກອົບຮົມ​ດ້ານ​ຕ່າງໆ ເພື່ອ​ເຮັດ​ໃຫ້ຄອບຄົວ​ຕົນ​ເອງ ສາມາດ​ຫຼຸດ​ພົ້ນອອກ​ຈາກ​ສະພາບ​ຄວາມທຸກຍາກ​ທີ່​ສຸດ ແລະ ສາມາດ​ຂ້າມຜ່ານ​ບັນຫາ​ດັ່ງກ່າວ ກ້າວ​ຂຶ້ນ​ສູ່ການ​ປັບປຸງ​ຊີວິດ​ການ​ເປັນ​ຢູ່​ຂອງຕົນ ແລະ ຄອບຄົວ​ໃຫ້​ດີ​ຂຶ້ນເລື້ອຍໆ.

ຂ່າວ: ໜັງສືພິມວຽງຈັນໃໝ່

ຂ່າວສານອື່ນໆ