ລັດຖະບານ ຊາບຊຶ້ງນ້ຳໃຈຈາກປະເທດເພື່ອນມິດ ແລະ ປະຊາຊົນລາວ ທີ່ຊ່ວຍເຫລືອຜູ້ປະສົບໄພພິບັດ

08-08-2018, 15:14 97

ຂປລ. ຄະນະລັດຖະບານ ໄດ້ສະແດງຄວາມຂອບໃຈ ຕໍ່ບັນດາປະເທດເພື່ອນມິດທັງຢູ່ໃກ້ ແລະ ຢູ່ໄກ ຕໍ່ກັບຄວາມຫ່ວງໄຍ ພ້ອມທັງໄດ້ສົ່ງກໍາລັງໃຈ, ໃຫ້ການສະໜັບສະໜູນ ແລະ ການຊ່ວຍເຫລືອທາງດ້ານທຶນຮອນ, ເຄື່ອງອຸປະກອນ ແລະ ເຄື່ອງອຸປະໂພກ-ບໍລິໂພກທີ່ຈຳເປັນຢ່າງທັນກັບສະພາບການ ໃຫ້ແກ່ລັດຖະບານ ແລະ ປະຊາຊົນລາວ, ໂດຍສະເພາະກໍແມ່ນຕໍ່ຜູ້ປະສົບກັບໄພພິບັດຢູ່ ເມືອງສະໜາມໄຊ, ແຂວງ ອັດຕະປື ໃນຄັ້ງນີ້.


ໃນໂອກາດກ່າວປິດກອງປະຊຸມລັດຖະບານສະໄໝວິສາມັນ ປະຈໍາເດືອນ ສິງຫາ 2018 ໃນວັນທີ 7 ສິງຫາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ກ່າວວ່າ: ກອງປະຊຸມລັດຖະບານ ຂໍສະແດງຄວາມຂອບໃຈເປັນພິເສດ ຕໍ່ໜ່ວຍກູ້ໄພ ແລະ ອາສາສະໝັກຈາກປະເທດເພື່ອນມິດ ໂດຍສະເພາະຈາກ ສສ. ຫວຽດນາມ, ສປ ຈີນ, ຣາຊະອານາຈັກໄທ, ສ. ເກົາຫລີ, ສ. ສິງກະໂປ ແລະ ປະເທດອື່ນໆ ທີ່ມາສົມທົບກັບໜ່ວຍກູ້ໄພພາຍໃນປະເທດ ດຳເນີນການກູ້ໄພ ແລະ ຊ່ວຍເຫລືອຜູ້ປະສົບໄພ ດ້ວຍຄວາມເສຍສະຫລະ ແລະ ດ້ວຍຈິດໃຈມະນຸດສະທຳອັນສູງສົ່ງ, ປະຊາຊົນລາວບັນດາເຜົ່າສຸດທີ່ຊາບຊຶ້ງ, ຂອບໃຈ ແລະ ເປັນບຸນຄຸນຢ່າງສູງ ຕໍ່ນ້ຳໃຈໄມຕີດັ່ງກ່າວ.
ໃນຂະນະດຽວກັນ, ກອງປະຊຸມຂໍສະແດງຄວາມຂອບໃຈ ຕໍ່ປະຊາຊົນລາວບັນດາເຜົ່າໃນຂອບເຂດທົ່ວປະເທດ ທີ່ໄດ້ມີຄວາມຫ່ວງໄຍຢ່າງຈົດຈໍ່ຕໍ່ເຫດການໃນຄັ້ງນີ້ ແລະ ໄດ້ເສຍສະລະ ທັງກຳລັງຊັບ ແລະ ກຳລັງແຮງຂອງທຸກໆຄົນ ເພື່ອສຸມໃສ່ຊ່ວຍເຫລືອດ້ວຍຄວາມເຫລື່ອມໃສຢ່າງແທ້ຈິງ ແລະ ຂໍຍ້ອງຍໍສັນລະເສີນ ກຳລັງທະຫານ, ຕໍາຫລວດ, ໜ່ວຍອາສາສະໝັກ, ແພດ-ໝໍ, ນັກຂ່າວ ແລະ ສື່ມວນຊົນທັງພາຍໃນ ແລະ ຕ່າງປະເທດ. 


ນອກຈາກນັ້ນ, ຊົມເຊີຍພະນັກງານ-ລັດຖະກອນ ຢູ່ທຸກໆອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ຜູ້ປະກອບການ, ນັກທຸລະກິດ, ຄູບາອາຈານ, ນັກສິນລະປິນ ແລະ ປະຊາຊົນລາວທຸກຫົນແຫ່ງທັງພາຍໃນ ແລະ ຕ່າງປະເທດ ທີ່ໄດ້ປະກອບສ່ວນ ແລະ ສະແດງອອກເຖິງກຳລັງແຮງແຫ່ງຄວາມສາມັກຄີ ເປັນຈິດໜຶ່ງໃຈດຽວ ໃນການຊ່ວຍເຫລືອປະຊາຊົນລາວ ທີ່ໄດ້ຮັບຜົນກະທົບຈາກໄພພິບັດ ໃນຄັ້ງນີ້.
ຂ່າວ: ສິງຄຳ

ຂ່າວສານອື່ນໆ