ກອງປະຊຸມວິຊການ ວຽກງານແຮງງານ ແລະ ສະຫວັດດີການສັງຄົມແຂວງ ປະຈຳປີ 2017 ໄດ້ໄຂຂື້ນຢ່າງເປັນທາງການໃນຕອນເຊົ້າຂອງວັນທີ 8 ກຸມພາ 2018

13-02-2018, 12:35 235

ກອງປະຊຸມວິຊການ ວຽກງານແຮງງານ ແລະ ສະຫວັດດີການສັງຄົມແຂວງ ປະຈຳປີ 2017 ໄດ້ໄຂຂື້ນຢ່າງເປັນທາງການໃນຕອນເຊົ້າຂອງວັນທີ 8 ກຸມພາ 2018, ຢູ່ທີ່ຫ້ອງປະຊຸມ ພະແນກແຮງງານ ແລະ ສະຫວັດດີການສັງຄົມແຂວງ ໂດຍພາຍໃຕ້ ການເປັນປະທານຂອງທ່ານ ສຸວັນຄຳ ຄຳຄູນເມືອງ ຫົວໜ້າພະແນກ ຮສສ ແຂວງ , ເຊີ່ງມີບັນດາທ່ານຫົວໜ້າຫ້ອງການ, ຮອງຫ້ອງການ ແຮງງານ ແລະ ສະຫວັດດີການສັງຄົມເມືອງ 4 ຕົວເມືອງ, ຫ້ອງການກາແດງເມືອງ, ມີຄະນະພະແນກ ຮສສ ແຂວງ, ຫົວໜ້າຫ້ອງການ, ຫົວໜ້າຂະແໜງ, ຮອງຂະແໜງ, ພະນັກງານວິຊາການຈາກພະແນກ ຮສສ ແຂວງ, ພະນັກງານຈາກສູນບໍລິການກອງທືນປະກັນສັງຄົມ, ຫ້ອງການກາແດງແຂວງ,ເມືອງ ແລະ ພະນັກງານຈາກອົງການເກັບກູ້ລະບີດ ເຂົ້າຮ່ວມທັງໝົດ: 45 ທ່ານ, ຍິງ 18 ທ່ານ.
ຈຸດປະສົງຂອງກອງປະຊຸມ ເພື່ອສະຫຼຸບຖອດຖອນບົດຮຽນການຈັດຕັ້ງປະຕິບັດແຜນພັດທະນາວຽກງານແຮງງານ ແລະ ສະຫວັດດີການສັງຄົມ ຂັ້ນແຂວງ ປະຈຳປີ 2017 ແລະ ວາງທິດທາງແຜນການຈັດຕັ້ງປະຕິບັດວຽກງານແຮງງານ ແລະ ສະຫວັດດີການສັງຄົມ ປະຈຳປີ 2018,
ບັນຫາທີ່ໄດ້ຄົ້ນຄວ້າປຶກສາຫາລື ແລະ ໄດ້ຕົກລົງເຫັນດີເປັນເອກະພາບກັນໃນກອງປະຊຸມ :
ກອງປະຊຸມໄດ້ຮັບຟັງການລາຍງານ ບົດສະເໜີວິຊາການຂອງບັນດາຂະແໜງການ ພາຍໃນຂະແໜງ ຮສສ ໃນການຈັດຕັ້ງປະຕິບັດວຽກງານແຮງງານ ແລະ ສະຫວັດດີການສັງຄົມ ໄລຍະຜ່ານມາ ພ້ອມດຽວກັນນີ້ ກໍ່ຍັງໄດ້ຮັບຟັງການປະກອບຄຳຄິດຄຳເຫັນຂອງຜູ່ແທນກອງປະຊຸມ , ຕໍ່ບັນດາຕົວເລກຄາດໝາຍສູ້ຊົນດ້ານ ແຮງງານ ແລະ ສະຫວັດດີການສັງຄົມ, ປະກອບຄຳຄິດ ຄຳເຫັນ ຕາມຮ່າງຄຳຖາມເຈາະຈີ້ມຕ່າງໆ ຢ່າງກົງໄປ, ກົງມາ ແລະ ເຕັມໄປດ້ວຍເນື້ອໃນອັນມີຄວາມໝາຍສຳຄັນ ເພື່ອພັດທະນາວຽກງານແຮງງານ ແລະ ສະຫວັດດີການສັງຄົມໃຫ້ດີຂື້ນເປັນກ້າວໆ:

ກອງປະຊຸມໄດ້ຕົກລົງເຫັນດີເປັນເອກະພາບກັນດັ່ງລຸ່ມນີ້

1. ຮັບຮອງເອົາບົດສະຫຼຸບວຽກງານແຮງງານ ແລະ ສະຫວັດດີການສັງຄົມປະຈຳປີ 2017 ແລະ ຕົວເລກຄາດໝາຍສູ້ຊົນ ປີ 2018.
2. ຮັບຮອງເອົາບົດສະຫຼຸບວຽກງານໂຄງການເກັບກູ້ລະເບີດບໍ່ທັນແຕກປະຈຳແຂວງ ປີ 2017 ແລະ ຕົວເລກຄາດໝາຍສູ້ຊົນ ປີ 2018.
3. ຮັບຮອງເອົາບົດສະຫຼຸບຂອງວຽກງານກາແດງ ປະຈຳແຂວງ ປະຈຳປີ 2017 ແລະ ຕົວເລກຄາດໝາຍສູ້ຊົນ ປີ 2018.
4. ເພີ້ມທະວີຂອດການປະສານງານກັນກັບຂະແໜງການທີ່ກ່ຽວຂ້ອງສາຍຕັ້ງ, ສາຍຂວາງ ໃຫ້ມີຄວາມກົມກຽວກັນ ແລະ ຄ່ອງຕົວຂື້ນຕື່ມ.
5. ສືບຕໍ່ຈັດຕັ້ງປະຕິບັດວຽກງານແຮງງານ ແລະ ສະຫວັດດີການສັງຄົມ ຂັ້ນແຂວງໃຫ້ບັນລຸຕາມຕົວເລກຄາດໝາຍສູ້ຊົນ ປີ 2018.
6. ປັບປຸງແບບແຜນວິທີການນຳພາ, ແບບແຜນວິທີການເຮັດວຽກໃຫ້ດີຂື້ນກວ່າເກົ່າ.
7. ປັບປຸງຖານຂໍ້ມູນຂອງແຕ່ລະຂະແໜງການໃຫ້ຊັດເຈນ, ແທດເໜາະກັບສະພາບເງື່ອນໄຂຕົວຈີງ.
8. ບັນດາຂະແໜງການຕ້ອງສ້າງແຜນການເຄື່ອນໄຫວ, ແຜນດຳເນີນງານ ປີ 2018 ເພື່ອປະຕິບັດແຜນການສູ້ຊົນໃຫ້ບັນລຸຕາມຄາດໝາຍທີ່ວາງໄວ້.
9. ສຶກສາອົບຮົມດ້ານການແນວຄິດ - ການເມືອງໃຫ້ຖັນແຖວພະນັກງານ-ລັດຖະກອນ ຕາມຂັ້ນຄຸ້ມຄອງ ໃຫ້ເປັນປົກກະຕິ ແລະ ຕໍ່ເນື່ອງ.
10. ສືບຕໍ່ພົວພັນຮ່ວມມືກັບຕ່າງປະເທດເພື່ອຍາດແຍ່ງຂໍການຊ່ວຍເຫຼືອ.
11. ຈັດຕັ້ງເຜີຍແຜ່ແຜນການສະບັບ ໃຫ້ພະນັກງານ-ລັດຖະກອນ ທົ່ວຂະແໜງ ຮສສ ຮັບຮູ້ເຂົ້າໃຈຢ່າງເລິກເຊີ່ງ

ກອງປະຊຸມວິຊາການວຽກງານແຮງງານ ແລະ ສະຫວັດດີການສັງຄົມປະຈຳປີ 2017, ໄດ້ດຳເນີນມາເປັນເວລາ 1 ວັນເຕັມ ແລະ ໄດ້ປິດລົງໃນວັນດຽວກັນ ໃນເວລາ 16 ໂມງ ຂອງວັນທີ 8 ກຸມພາ ປີ 2018.

ຂອບ​ໃຈ​ຂ່າວ ຈາກ ເຟັດ​ບຸກ ພະ​ແນກ ຮ​ສ​ສ ແຂວງ​ເຊກອງ

ຂ່າວສານອື່ນໆ