ຮສສ ມອບເຂົ້າຊ່ວຍເຫລືອແກ່ປະຊາຊົນຜູ້ທຸກຍາກ ແລະ ຄອບຄົວຖືກຜົນກະທົບຈາກໄພພິບັດ 2 ແຂວງ ສະຫວັນນະເຂດ ແລະ ຄຳມ່ວນ

18-06-2018, 14:21 125

ຍ້ອນຄວາມເປັນຮ່ວງເປັນໄຍຂອງ ພັກ-ລັດຖະບານ ຊຶ່ງຕ່າງໜ້າໂດຍກະຊວງແຮງງານ ແລະ ສະ ຫວັດດີການສັງຄົມ ( ຮສສ ),ໃນລະຫວ່າງວັນທີ 12 - 13 ມິຖຸນາ 2018ນີ້, ໄດ້ມີພິທີມອບ ແລະ ຮັບເຂົ້າສານທີ່ໄດ້ຮັບການຊ່ວຍເຫລືອຈາກຄັງແຮເຂົ້າຊ່ວຍເຫລືອສຸກເສີນອາຊຽນ+3ໃຫ້ແກ່ແຂວງຄໍາມ່ວນ ແລະ ແຂວງ ສະຫວັນນະເຂດ ເພື່ອປະຊາຊົນ ແລະ ຄອບຄົວທີ່ໄດ້ຮັບຜົນກະທົບຈາກຄອບຄົວສົງກາ. ໂດຍການຮັບ ແລະ ມອບໂດຍຜ່ານລັດຖະບານລາວກໍ່ຄື: ກະຊວງແຮງງານ ແລະ ຫວັດດີການສັງຄົມ, ກ່າວມອບໂດຍ ທ່ານ ບຸນຄົງ ຫລ້າສຸກັນ ຮອງລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ ແລະ ກ່າວຮັບໂດຍ ທ່ານ ບຸນມີ ພິມມະສອນ ຮອງເຈົ້າແຂວງ ຄໍາມ່ວນ,ທັງເປັນປະທານຄະນະກຳມະການປ້ອງກັນໄພພບັດຂອງແຂວງ ແລະ ແຂວງ ສະຫວັນນະເຂດ ກ່າວຮັບໂດຍ ທ່ານ ວົງເພັດ ໄຊສະຫງວນ ຮອງເລຂາຄະນະປະຈຳພັກແຂວງ, ປະທານຄະນະໂຄສະນາອົບຮົມແຂວງສະຫວັນນະເຂດ, ພ້ອມດ້ວຍອໍານາດການປົກຄອງເມືອງຂອງແຂວງ, ພ້ອມຂະແໜງການທີກ່ຽວຂ້ອງ ແລະ ປະຊາຊົນທີ່ໄດ້ຮັບການຊ່ວຍເຫລືອໃນທັງສອງແຂວງດັ່ງກ່າວໄດ້ເຂົ້າຮ່ວມເປັນສັກຂີພິຍານ.
ຊຶ່ງເຂົ້າສານຈ້າວໄດ້ຮັບການຊ່ວຍເຫລືອຈາກລັດຖະບານຢີ່ປຸ່່ນໂດຍຜ່ານຄັງແຮ່ເຂົ້າຊ່ວຍເຫລືອສຸກເສີນອາຊຽນ+3 ຈໍານວນ 225 ໂຕນ, ເພື່ອໃຫ້ລັດຖະບານແຫ່ງ ສປປລາວ ນໍາເອົາເຂົ້າຈໍານວນດັ່ງກ່າວໄປຊ່ວຍປະຊາຊົນຜູ້ທຸກຍາກ ແລະ ຄອບຄົວທີ່ໄດ້ຮັບຜົນກະທົບຈາກໄພພິບັດທໍາມະຊາດຈາກພາຍຸສົງກາ ແລະ ດອກສຸລີ ໂດຍສະເພາະແມ່ນຢູ່ແຂວງ ຄໍາມ່ວນ ແລະ ແຂວງ ສະຫວັນນະເຂດ. ໃນນີ້ແຂວງ ຄໍາມ່ວນ ໄດ້ຮັບເຂົ້າຊ່ວຍເຫລືອຈໍານວນ 125 ໂຕນ, ໃນ 4 ຕົວເມືອງ, ມີ 155 ບ້ານ, ປະມານ 3.125 ຄອບຄົວທີ່ໄດ້ຮັບຜົນກະທົບ ແລະ ແຂວງ ສະຫວັນນະເຂດ ໄດ້ຮັບເຂົ້າຊ່ວຍເຫລືອຈໍານວນ 100 ໂຕນ, ໃນ 14 ຕົວເມືອງ, ມີ 154 ບ້ານ, ປະມານ 2.500 ຄອບຄົວທີ່ໄດ້ຮັບຜົນກະທົບ ການໄດ້ຮັບເຂົ້າຊ່ວຍເຫລືອໃນຄັ້ງນີ້ນັບວ່າເປັນມູນຄ່າສູງສົມຄວນ ນອກນີ້ລັດຖະບານລາວກໍ່ຄື ກະຊວງຮສສ ຍັງໄດ້ຮຽກຮ້ອງໃຫ້ອົງການຈັດຕັ້ງສາກົນຈົ່ງຊ່ວຍຊຸກຍູ້ ແລະ ປະກອບສ່ວນໃຫ້ຫລາຍຂື້ນ. ຟື້ນຟູຊີວິດການເປັນຢູ່ຂອງພໍ່, ແມ່ປະຊາຊົນທີ່ໄດ້ປະສົບໄພພິບັດດັ່ງກ່າວໃຫ້ມີຊີວິທີ່ດີຂື້ນ.

( ຂ່າວ ຮສສ )

ຂ່າວສານອື່ນໆ