ງານຕະຫຼາດນັດແຮງງານປີ 2018 ເປີດໂອກາດໃຫ້ຜູ້ກຳລັງຊອກວຽກໄດ້ມີທາງເລືອຫຼາຍ

07-05-2018, 13:35 254

ພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ຮ່ວມກັບບໍລິສັດ ລາວເວີນມະຫາຊົນຈຳກັດ ຈັດງານຕະຫຼາດນັດແຮງງານ ປະຈຳປີ 2018 ຂື້ນທີ່ສູນການຄ້າລາວ-ໄອເຕັກ (ຕຶກເກົ່າ) ໃນລະຫວ່າງວັນທີ 4-8 ພຶດສະພາ 2018, ເພື່ອເປັນການເປີດກວ້າງດ້ານຂໍ້ມູນຂ່າວສານຕະຫຼາດແຮງງານ ເຮັດໃຫ້ກຳລັງແຮງງານໄດ້ເຂົ້າເຖິງການມີວຽກເຮັດງານທຳທີ່ມີຄຸນຄ່າ ແລະ ເປັນທຳ, ພ້ອມທັງສ້າງໂອກາດໃຫ້ກຳລັງແຮງງາາທີ່ຕ້ອງການວຽກເຮັດງານທຳ ແລະ ຫົວໜ່ວຍແຮງງານຕ່າງໆ ໄດ້ພົບປະປຶກສາຫາລືກັນ ກ່ຽວກັບການຮັບສະໝັກງານ ແລະ ການພັດທະນາສືມືແຮງງານທີ່ສອ່ດຄ່ອງກັບຄວາມຕ້ອງການຂອງຕະຫຼາດແຮງງານ.
ພິທີເປີດງານດັ່ງກ່າວໄດ້ຈັດຂຶ້ນໃນວັນທີ 4 ພຶດສະພາ ຜ່ານມາ, ທີ່ສູນການຄ້າລາວ-ໄອເຕັກ (ຕຶກເກົ່າ) ເປັນກຽດເຂົ້າຮ່ວມຕັດແຖບຜ້າເປີດງານໂດຍ ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແລະ ທ່ານ ສີຫຸ່ນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ມີບັນດາຫົວໜ້າກົມ, ຮອງກົມ ກະຊວງແຮງງານ ແລະ ສະຫວັດດີການສັງຄົມ, ເຈົ້າເມືອງ, ຫົວໜ້າພະແນກການອ້ອມຂ້າງນະຄອນຫຼວງວຽງຈັນ, ທ່ານຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ ແລະ ບັນດາທ່ານແຂກທີ່ຖືກເຊີນທັງພາກລັດ ແລະ ເອກະຊົນເຂົ້າຮ່ວມ.
ທ່ານ ນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນກ່າວວ່າ: ຈຸດປະສົງການຈັດງານຕະຫຼາດນັດປະຈຳປີ 2018 ນີ້, ເພື່ອປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2018 ຂອງນະຄອນຫຼວງວຽງຈັນ ຄາດໝາຍໝາຍທີ 3 ວຽກງານແຮງງານ ແລະ ສະຫວັດດີການສັງຄົມ ໃຫ້ປະກົດຜົນເປັນຈິງ ຄືຄວບຄຸມອັດຕາການຫວ່າງງານ ໃຫ້ຢູ່ລະດັບ2% ຕໍ່ປີ ພັດທະນາສີມືແຮງງານໃຫ້ໄດ້ 15,000 ຄົນ ແລະ ຈັດວຽກເຮັດງານທຳໃຫ້ໄດ້ 35,000 ຄົນ, ເພື່ອສ້າງເງື່ອນໄຂ ແລະ ເອື້ອອຳນວຍຄວາມສະດວກໃຫ້ຜູ້ຕ້ອງການວຽກເຮັດງານທຳ ແລະ ຫົວໜ່ວຍແຮງງານມາພົບກັນ, ນາຍຈ້າງມີໂອກາດລົມກັບລູກຈ້າງໂດຍກົງ ນຳໄປສູ້ການຮັບສະໝັກ ແລະ ຖືກບັນຈຸເຂົ້າໃນຕຳແໜ່ງງານຫວ່າງ ທີ່ເໝາະສົມກັບຄວາມຮູ້ຄວາມສາມາດຂອງຜູ້ຊອກວຽກ, ພ້ອມທັງເປັນເວທີໃນການສົ່ງເສີມການຕະຫຼາດຂອງອົງກອນເຊັ່ນ: ຜະລິດຕະພັນ, ການບໍລິການ ລວມທັງເປັນການເປີດຊ່ອງທາງໃຫ້ອົງກອນໄດ້ຊອກຫາຄູ່ຮ່ວມທຸລະກິດໃໝ່ ແລະ ເປັນການປູກຈິດສຳນຶກ ໃຫ້ຜູ້ປະກອບການ (ນາຍຈ້າງ) ແລະ ຜູ້ຊອກວຽກເຮັດງານທຳມີຄວາມຮັບຮູ້ ແລະ ເຂົ້າໃຈຕໍ່ກັບແນວທາງນະໂຍບາຍປ່ຽນໃໝ່ ແລະ ລະບຽບກົດໝາຍທີ່ກ່ຽວຂ້ອງກັບວຽກງານແຮງງານໂດຍສະເພາະແມ່ນການຈັດຈ້າງງານ ພ້ອມທັງຮັບຮູ້ ເຂົ້າໃຈພາລະບົດບາດຂອງວຽກງານແຮງງານຫຼາຍຂຶ້ນ.
ງານຕະຫຼາດນັດແຮງງານຄັ້ງນີ້, ແມ່ນໄດ້ຈັດຂຶ້ນຢ່າງຍິ່ງໃຫ່ຍກວ່າປີຜ່ານມາ, ເຊິ່ງມີບັນດາຫົວໜ່ວຍທຸລະກິດ, ບັນດາສູນຝຶກ ແລະ ບັນດາຫ້າງຮ້ານເຂົ້າຮ່ວມຈຳນວນ 250 ບູດ, ໃນນັ້ນມີ ບູດຮັບພະນັກງານ 55 ບູດ, ວາງສະແດງເຄື່ອງ 195 ບູດ, ບໍລິສັດຈັດຫາງານ 12 ບູດ ແລະ ຄາດວ່າຈະມີນັກຮຽນ-ນັກສຶກສາ, ຜູ້ອອກແຮງງານ ສົນໃຈມາສະໝັກວຽກຫຼາຍກວ່າ 3,200 ຄົນ ແລະ ຄາດວ່າຈະມີຜູ້ເຂົ້າຮ່ວມງານຫຼາຍກວ່າ 5.000.000 ຄົນ.
ໂອກາດດັ່ງກ່າວ, ທ່ານ ສີຫຸນ ສິດທິລືໄຊ ກ່າວວ່າ: ງານຕະຫຼາດນັດແຮງງານຄັ້ງນີ້ ແມ່ນມີຄວາມໝາຍຄວາມສຳຄັນຫຼາຍ ເພື່ອຊຸກຍູ້ສົ່ງເສີມການຈັດຫາວຽກເຮັດງານທຳໃຫ້ແກ່ກຳລັງແຮງງານ ແລະ ສ້າງໂອກາດໃຫ້ຜູ້ອອກແຮງງານ ໄດ້ເຂົ້າເຖິງຂໍ້ມູນຂ່າວສານຕະຫຼາດແຮງງານຢ່າງກວ້າງຂວງ ສາມາດດັດສົມຄວາມຕ້ອງການ ແລະ ການສະໜອງຂອງຕະຫຼາດແຮງງານເປັນການສ້າງໂອ້ກາດໃຫ້ບັນດາຜູ້ໃຊ້ແຮງງານ ແລະ ຜູ້ອອກແຮງງານ ຫຼື ຜູ້ກຳລັງຊອກວຽກເຮັດງານທຳ ຜູ້ຕ້ອງການປ່ຽນວຽກໃໝ່, ບັນດາຊາວໜຸ່ມ ຍິງ-ຊາຍ ທີ່ຮຽນຈົບຈາກສະຖາບັນການສຶກສາຕ່າງໆໄດ້ມາພົບກັນເພື່ອຮັບສະໝັກງານ, ນອກຈາກນັ້ນ, ຍັງເປັນການສ້າງໂອກາດໃຫ້ສູນຝຶກວິຊາຊີບ ແລະ ຜູ້ຕ້ອງການຝຶກເພື່ອຍົກລະດັບສີມືແຮງງານຂອງຕົນໄດ້ມາພົບກັນເພື່ອຂຶ້ນທະບຽນການຝຶກ, ສ້າງໂອກາດໃຫ້ຜູ້ຜະລິດສິນຄ້າຫັດຖະກຳ ຫຼື ຜະລິດສິນຄ້າອື່ນໆ ໄດ້ມາວາງສະແດງຜະລິດຕະພັນຕ່າງໆ ທີ່ສ່ອງແສງໃຫ້ເຫັນສີໄມ້ລາຍມື, ຄວາມສຳນິສຳນານ ແລະ ຄວາມສາມາດຂອງແຮງງານລາວ ທັງເປັນການໂຄສະນາສິນຄ້າເພື່ອຈຳໜ່າຍ ແລະ ຂາຍຜະລິດຕະພັນຂອງຕົນ.

( ເພັດສະໄໝ )

ຂ່າວສານອື່ນໆ