ຮອງລັດຖະມົນຕີ ກະຊວງຮສສ ລົງຕິດຕາມຊຸກຍູ້ ເຄື່ອນໄຫວຊີ້ນຳວຽກ ແຮງງານ ແລະ ສະຫວັດດີການສັງຄົມ 3 ແຂວງ ອັດຕະປື, ເຊກອງ ແລະ ແຂວງສາລະວັນ

31-05-2018, 15:25 48

ເພື່ອສືບຕໍ່ຈັດຕັ້ງປະຕິບັດທິດນຳຂອງພັກ ໃນມະຕິກອງປະຊຸມໃຫຍ່ ຄັ້ງທີ X ຂອງພັກ, ບັນດາເປົ້າ ໝາຍການພັດທະນາແບບຍືນຍົງ ແລະ ບັນດາຕົວຊີ້ວັດຂອງແຜນພັດທະນາເສດຖະກິດ-ສັງຄົມ ທີ່ຕິດພັນແຜນພັດທະນາແຮງງານ ແລະ ສະຫວັດດີການສັງຄົມ ຄັ້ງທີ IV (2016-2020) ແລະແຜນພັດທະນາເສດຖະກິດສັງຄົມຂອງແຂວງ ໃຫ້ໄດ້ຮັບຜົນດີ, ໃນລະຫວ່າງວັນທີ 21-24 ພຶດສະພາ 2018ນີ້, ທ່ານ ນ. ໃບຄຳ ຂັດທິຍະ ຮອງເລຂາພັກກະຊວງ, ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ (ຮສສ ) ພ້ອມດ້ວຍຄະນະ, ໄດ້ລົງຕິດຕາມ ຊຸກຍູ້ເຄື່ອນໄຫວຊີ້ນຳວຽກ ແຮງງານ ແລະ ສະຫວັດດີການສັງຄົມ 3 ແຂວງ ຄື: ແຂວງ ອັດຕະປື, ເຊກອງ ແລະ ແຂວງສາລະວັນ, ພ້ອມທັງໄດ້ໂອ້ລົມ ເພື່ອເປັນທິດເຍືອງທາງໃນການຈັດຕັ້ງປະຕິວຽກງານ ຮສສ 6 ເດືອນຕົ້ນປີ, ຄາດຄະເນແຜນ 6 ເດືອນທ້າຍປີ ແລະ ບາງຄາດໝາຍຕົ້ນຕໍ ໃນປີ 2019 ແລະ ຜົນສໍາເລັດໃນການຈັດຕັ້ງປະຕິບັດວຽກງານ ຮສສ 2 ປີເຄິ່ງ ແລະຄາດໝາຍສູ້ຊົນ ໃນ 2 ປີເຄິ່ງຕໍ່ໜ້າ, ຊຶ່ງຜ່ານການຮັບຟັງການລາຍງານ ຂອງບັນດາ ຮສສ ແຂວງ ທ່ານ ຮອງລັດຖະມົນຕີ ຍັງໄດ້ຍ້ອງຍໍຊົມເຊີຍ ດ້ານຕໍ່ຜົນສຳເລັດທີ່ ພະແນກ ຮສສ ແຂວງ ຍາດມາໄດ້ໃນໄລຍະຜ່ານມາ ແລະ ຕໍ່ກັບບັນຫາ ແລະ ສິ່ງທ້າທາຍ ໃນໄລຍະໃໝ່ນີ້, ທ່ານ ຮອງລັດຖະມົນຕີ ໃບຄຳ ຂັດທິຍະ, ຍັງໄດ້ເນັ້ນໜັກໃຫ້ ບັນດາ ຮສສ ທັງ 3 ແຂວງ ຕ້ອງໄດ້ພ້ອມກັນປັບປຸງແກ້ໄຂດັ່ງນີ້: 
1. )ເພີ່ມທະວີຄວາມສາມັກຄີພາຍໃນຄະນະພັກ, ຄະນະພະແນກໃຫ້ມີຄວາມເປັນເອກະພາບ, ຖືເອົາການສຶກສາອົບຮົມການເມືອງແນວຄິດ ໃຫຖັນແຖວພະນັກງານ-ລັດຖະກອນ ມີຄວາມໜັກແໜ້ນທາງດ້ານຄຸນທາດການເມືອງ ແລະ ມີຄວາມອຸ່ນອຽນທຸ່ນທ່ຽງ ຫ້າວຫັນ ຕື່ນຕົວປະຕິບັດໜ້າທີ່ດ້ວຍຄວາມຮັບຜິດຊອບສູງ, ປັບປຸງແບບແຜນວິທີເຮັດວຽກ ແລະ ຂອດການປະສານງານໃຫ້ມີ ຄວາມກົມກຽວ, ບຳລຸງສ້າງພະນັກງານ-ລັດຖະກອນ ໃຫ້ກຳແໜ້ນທາງດ້ານນະໂຍບາຍ, ກົດ ໝາຍ, ນິຕິກຳ ແລະ ລະບຽບການຕ່າງໆ ພ້ອມທັງປະ ຕິບັດໜ້າທີ່ຕາມພາລະບົດບາດ ເພື່ອເຮັດໃຫ້ວຽກງານມີຜົນສຳເລັດ ແລະ ບັນລຸຄາດໝາຍ ທີ່ວາງໄວ້.
2.) ຮີບຮ້ອນປະເມີນສະພາບການຈັດຕັ້ງປະຕິບັດແຜນພັດທະນາວຽກງານ ຮສສ 5 ປີ ຂອງພະແນກ ຮສສ ໃນໄຍະກາງສະໄໝ ແລະ ຄາດຄະເນບັນດາຄາດໝາຍຕົ້ນຕໍສອງປີເຄິ່ງ, ພ້ອມນີ້ຍັງຕ້ອງເອົາໃຈໃສ່ຕີລາຄາໃນການຈັດຕັ້ງປະຕິວຽກງານ ຮສສ 6 ເດືອນຕົ້ນປີ, ຄາດຄະເນແຜນ 6 ເດືອນທ້າຍປີ ແລະ ບາງຄາດໝາຍຕົ້ນຕໍ ໃນປີ 2019, ເອົາໃຈໃສ່ຂື້ນແຜນໂຄງການລົງທືນຂອງລັດເພ່ື່ອຮັບໃຊ້ໃນການຈັດຕັ້ງປະຕິບັດຕົວຊີ້ວັດດ້ານຕ່າງຂອງແຂວງ;
3.) ເອົາໃຈໃສ່ຊຸກຍູ້ ແລະ ສົ່ງເສີມ ການສ້າງງານ ໂດຍນຳໃຊ້ທ່າແຮງຂອງຊຸມຊົນ-ທ້ອງຖິ່ນ, ສ້າງລະບົບຂໍ້ມູນຂ່າວສານຕະຫຼາດແຮງງານ ທີ່ໜ້າເຊື່ອຖືໃຫ້ແກ່ ທັງຜູ້ໃຊ້ແຮງງານ ແລະ ຜູ້ອອກແຮງງານສາມາດຮັບຮູ້ ແລະ ເຂົ້າເຖິງຂໍ້ມູນຕະຫຼາດແຮງງານ, ຮັບປະກັນການພັດທະນາສີມືແຮງງານຕາມຄວາມຕ້ອງການຂອງຕະຫຼາດແຮງງານ ແລະ ການສ້າງສີມືແຮງງານຕ້ອງຕິດພັນກັບການສ້າງທັດສະນະຄະຕິໃນການອອກແຮງງານ;
4). ໃຫ້ເອົາໃຈໃສ່ໂຄສະນາແກ່ຜູ້ອອກແຮງງານ ຮັບຮູ້ປະກົດການຕົວະຍົວະຫຼອກລວງ ຫຼີກລຽງຈາກການຄ້າມະນຸດ ເພາະປັດຈຸບັນໄດ້ເກີດມີປະກົດການຫຼອກແຮງງານຜູ້ເປັນຊາວໜຸ່ມ-ຍິງໜຸ່ມລາວ ໄປຕ່າງອອກແຮງານຢູ່ປະເທດ ດ້ວຍຫຼາຍຮູບແບບ ເປັນຕົ້ນແມ່ນໄປອອກແຮງງານ, ສ້າງຄອບຄົວ ແລະ ຮູບແບບອື່ນໆ.ຂໍໃຫ້ທ້ອງຖິ່ນ, ໂດຍສະເພາະແມ່ນຂັ້ນບ້ານ ແລະ ເມືອງຕ້ອງເປັນເຈົ້າການ ແລະ ມີສະຕິລະວັງຕົວຕື່ມ;
5.) ເອົາໃຈໃສ່ຈັດຕັ້ງປະຕິບັດກົດໝາຍປະກັນສັງຄົມ ເພ່ື່ອຂະຫຍາຍອັດຕາປົກຄຸມປະກັນສັງຄົມ ໄປສູ່ເປົ້າໝາຍຕ່າງໆຢ່າງທົ່ວເຖິງ ຕາມທັດສະນະຂອງພັກທີວ່າ “ ສ້າງສັງຄົມປອງດອງ, ປະຊາທິປະໄຕ ແລະຍຸດຕິທຳ“ກາຍເປັນຮູບປະທຳເທ່ອະກ້າວ;
6). ຕໍ່ກັບການປະຕິບັດນະໂຍບາຍຕໍ່ຜູ້ມີຜົນງານ ແລະ ຄຸນງາມຄວາມດີໃນພາລະກິດຮັບໃຊ້ການປະຕິວັດຊາດ ເອົາໃຈໃສ່ກວດກາຄືນຈໍານວນແຕ່ລະ ກຸ່ມເປົ້າໝາຍຕ່າງໆໃຫ້ລະອຽດຖກຕ້ອງຊັດເຈນ ແລະເປັນເອກະພາບ ຢູ່ແຕ່ລະຂແລ້ວຈຶ່ງຂຶ້ນແຜນເພື່ອແກ້ໄຂຢ່າງມີຈຸດສຸມ, ກຸ່ມເປົ້າໝາຍໃດທີ່ເຫັນວ່າສົມຄວນ ແລະ ເໝາະສົມ ກໍ່ຄວນພິຈາລະນາ,ສຶກສາ ແລະ ຕິດຕາມຊຸກຍູ້ຊີວິດການເປັນຢູ່ຂອງຜູ້ອາຍຸສູງ;
7.)ໃຫ້ພະແນກ ເອົາໃຈໃສ່ ປຶກສາຫາລື ກັບແຂວງກ່ຽວກັບວຽກງານສ້າງບ້ານພັດທະນາວຽກງານ ຮສສ ,ປະສານ ສົມທົບກັບບັນດາຫ້ອງການຮສສ ປະຈໍາເມືອງ, ພາກສ່ວນກຽ່ວຂ້ອງເພື່ອກໍານົດຈໍານວນບ້ານ ແລະ ຄອບຄົວທີ່ຈະສ້າງເປັນບ້ານພັດທະນາຢ່າງມີຈຸດສຸມ ແລະ ຕິດພັນກັບຫຼາຍຂະແໜງການເຊິ່ງເປັນບັນຫາລວມ, ຈຶ່ງສະເໜີໃຫ້ແຂວງຊ່ວຍຊີ້ນຳ ພະແນກ ຮສສ ຢ່າງໃກ້ຊິດຕື່ມ; 
8.) ການຊ່ວຍເຫຼືອຜູ້ປະສົບເຄາະຮ້າຍຈາກໄພພິບັດຕ່າງໆ ໃຫ້ເອົາໃຈໃສ່ດ້ານການ ປະສານງານ ກັບພາກສ່ວນຕ່າງໆໃຫ້ໄວ ແລະ ມີມາດຕະການໃຫ້ການຊ່ວຍເຫຼືອໃຫ້ທັນສະພາບການ ບໍ່ໃຫ້ແກ່ຍາວເວລາ.
9.)ໃຫ້ເອົາໃຈໃສ່ສືບຕໍ່ປັບປຸງການຈັດຕັ້ງແລະ ພະນັກງານ, ໂດຍກຳນົດຕຳແໜ່ງງານໃຫ້ຊັດເຈນ ເພື່ອຮັບປະກັນດ້ານວິຊາສະເພາະໃຫ້ຖືກກັບໜ້າວຽກ ຫຼຸດຜອນການຮັບຝາກນະໂຍບາຍລູກຫຼານພະນັກງານ, ສ້າງພະນັກງານລຸ້ນສືບທອດປຽ່ນແທນໃນແຕ່ະໄລຍະໃຫ້ມີຄວາມຕໍ່ເນື່ອງ. 
10.) ວຽກງານກາແດງ ໃຫ້ສືບຕໍ່ໂຄສະນາຂົນຂວາຍຊາວໜຸ່ມຢູ່ບັນດາພະແນກການ ຂອງລັດ, ໂຮງຮຽນ, ໂຮງໝໍ, ກົມກອງທະຫານ ແລະ ປ້ອງກັນຄວາມສະຫງົບ, ຫົວໜ່ວຍ ທຸລະກິດ, ຢູ່ບັນດາເມືອງ ແລະ ບ້ານຕ່າງໆ ໃຫ້ຮ່ວມແຮງກັນອອກມາບໍລິຈາກ ເລືອດເພື່ອຊ່ວຍເຫລືອສັງຄົມ ;
11.) ເອົາໃຈໃສ່ສໍາຫຼວດພື້ນທີ່ກວດກູ້ລະເບີດ ແລະ ແຜນການຊ່ວຍເຫຼືອຜູ້ໄດ້ຮັບເຄາະຮ້າຍຈາກລະເບີດບໍ່ທັນແຕກ ເພື່ອຈະໄດ້ລົງມືຈັດຕັ້ງປະຕິບັດຕາມໄລຍະເວລາອັນຄວນ , ຈັດຕັ້ງປະຕິບັດວຽກງານເກັບກູ້ະເບີດໃຫ້ເປັນລະບົບລວມສູນໃຫ້ມີຄວາມຊັດເຈນ ຕໍ່ທຶນຊ່ວຍເຫຼືອຈາກສາກົນ.
ທັງໝົດນີ້, ທີ່ ທ່ານ ຮອງລັດຖະມົນຕີ ກ່າວມານັ້ນ, ແມ່ນ ເພື່ອເຮັດໃຫ້ວຽກງານແຮງງານ ແລະ ສະຫວັດ ດີການສັງຄົມ ທັງ 3 ແຂວງ ໃຫ້ມີບາດກ້າວຂະຫຍາຍຕົວໃໝ່ ແລະ ມີຜົນສຳເລັດຫລາຍກ່ວາເກົ່າ.

(ພາບ-ຂ່າວ: ເພັດສະໄໝ )

ຂ່າວສານອື່ນໆ