ຜູ້ນຳ 6 ປະເທດລ້ອງແມ່ນໍ້າລ້ານຊ້າງ-ແມ່ນໍ້າຂອງບັນລຸຂໍ້ຕົກລົງໃນການຮ່ວມມືກັນໃນອະນາຄົດ

11-01-2018, 15:26 237

ວັນ​ພຸດ​ທີ່​ຜ່ານມາ​ (10 ມັງກອນ​ 2018) ຫຼີ່​ເຄີ່​ສຽງ​ ນາຍົກ​ລັດຖະມົນຕີ​ຈີນ​ ລະ​ບຸ​ວ່າ ​ຜູ້​ນຳ​ກຸ່ມ​ປະເທດລ້ອງ​ນ້ຳ​ລ້ານ​ຊ້າງ​-ແມ່ນ້ຳ​ຂອງ​ໄດ້​ບັນ​ລຸ​ຄວາມ​ເຫັນ​ພ້ອງ​ກ່ຽວກັບ​ອະນາຄົດ​ຮ່ວມ​ກັນ​ຂອງ​ທັງ​ 6 ປະເທດ​ໃນການ​ປະ​ຊຸມ​ຄວາມ​ຮ່ວມ​ມື​ລ້ອງນ້ຳ​ລ້ານ​ຊ້າງ​-ແມ່ນ້ຳ​ຂອງ​ (LMC) ຄັ້ງ​ທີ​ 2.

ຜູ້​ນຳ​ຈີນ​ ກຳປູເຈຍ,​ ມຽນມາ,​ ລາວ,​ ໄທ​ ແລະ ​ຫວຽດ​ນາມ​ໄດ້​ຕົກລົງ​ຈະ​ເພີ່ມ​ຄວາມ​ຮ່ວມ​ມື​ໃຫ້ເລິກເຊິ່ງ​ດ້ວຍ​ນະໂຍບາຍ​ດ້ານ​ຄວາມ​ເທົ່າ​ທຽມ​ ການ​ມີ​ສ່ວນ​ຮ່ວມ​ ແລະ ​ການ​ລົງ​ມື​ປະຕິບັດ​ຈິງ​. ຫຼີ່​ເຄີ່​ສຽງ​ ເຊິ່ງ​ເປັນ​ໜຶ່ງ​ໃນ​ຜູ້​ນຳ​ທີ່​ເຂົ້າ​ຮ່ວມ​ການ​ປະ​ຊຸມ​ກ່າວໃນງານ​ຖະແຫຼງຂ່າວ​ຫຼັງ​ການ​ປະ​ຊຸມ.​ ໃນ​ການ​ປະ​ຊຸມ​ປີ​ນີ້​ທັງ​ 6 ປະເທດ​ໄດ້​ຜ່ານ​ຮ່າງ​ເອກະສານ​ຫຼັກ​ 2 ລາຍ​ການ​ ໄດ້​ແກ່​ ແຜນ​ດຳ​ເນີນ​ງານ​ 5 ປີ​ (2018-2022) ແລະ ​ຖະແຫຼງການພະນົມເປນ.​ “ຄວາມ​ຂັດ​ແຍ່ງ​ລະຫວ່າງ​ປະເທດ​ທີ່​ຢູ່​ຕົ້ນ​ແມ່ນ້ຳ​ກັບ​ປະເທດ​ປາຍ​ແມ່ນ້ຳ​ມັກ​ເກີດ​ຂຶ້ນ​ຫຼາຍ​ຄັ້ງ​”, ຫຼີ່​ເຄີ່​ສຽງ ​ກ່າວ​ ພ້ອມ​ເນັ້ນ​ຢ້ຳ​ວ່າ​ ປະເທດ​ຈີນ​ຕ້ອງ​ການ​ແກ້​ບັນຫາ​ຄວາມ​ສຳພັນ​ແບບນີ້​ຢ່າງ​ມີປະ​ສິດ​ທິ​ພາບ​ ແລະ ​ສ້າງ​ຜົນ​ປະໂຫຍດ​ໃຫ້​ແກ່​ທຸກ​ປະເທດ​ ເພື່ອ​ສ້າງ​ສັງຄົມ​ທີ່​ມີ​ອະນາຄົດ​ຮ່ວມ​ກັນ​ຂອງ​ປະເທດລ້ອງ​ນ້ຳ​ລ້ານ​ຊ້າງ​-ແມ່ນ້ຳ​ຂອງ.​

“ຈີນ​ຕ້ອງ​ການ​ໃຫ້​ປະເທດ​ເພື່ອນ​ບ້ານ​ມີ​ສັນ​ຕິ​ພາບ​ ເພື່ອ​ອຳ​ນວຍ​ຄວາມສະດວກ​ແກ່​ການ​ພັດທະນາ​ສູ່​ສັງຄົມ​ທັນ​ສະໄໝ ​ແລະ​ ການຫຼຸດ​ພາ​ວະ​ທຸກຍາກ​​ ເຮົາ​ຮຽກ​ຮ້ອງ​ໃຫ້​ສ້າງ​ກົນ​ໄກ​ຄວາມ​ຮ່ວມ​ມືລ້ອງ​ນ້ຳ​ລ້ານ​ຊ້າງ​-ແມ່ນ້ຳ​ຂອງກໍ​ເພາະ​ຈະ​ມີ​ສ່ວນ​ຊ່ວຍ​ເຫຼືອ​ເຊິ່ງ​ກັນ​ ແລະ ​ກັນ​ຢ່າງ​ສູງ​ລະຫວ່າງ​ຈີນ​ກັບ​ອີກ​ 5 ປະເທດ​”, ຫຼີ່​ເຄີ່​ສຽງ​ ກ່າວ​ ພ້ອມ​ຢ້ຳ​ວ່າ ​ຈີນ​ສະໜັບ​ສະໜູນ​ກຸ່ມ​ປະ​ຊາຄົ​ມ​ອາ​ຊຽນ​ໃນ​ການສ້າງ​ສັງຄົມ​ທີ່​ມີ​ອະນາຄົດ​ຮ່ວມ​ກັນ​ດ້ວຍ​ຄວາມ​ຊ່ວຍ​ເຫຼືອ​ຈາກ​ກົນ​ໄກ​ຄວາມ​ຮ່ວມ​ມື​ລ້ອງນ້ຳ​ລ້ານ​ຊ້າງ​-ແມ່ນ້ຳ​ຂອງ.​

“ຈີນ​ຍິນ​ດີ​ຈະ​ຮ່ວມ​ງານ​ກັບ​ທຸກ​ຝ່າຍ​ເພື່ອ​ສ້າງ​ລ້ອງ​ນ້ຳ​ລ້ານ​ຊ້າງ​-ແມ່ນ້ຳ​ຂອງ​ໃຫ້ເປັນ​ແມ່ນ້ຳ​ແຫ່ງ​ມິດ​ຕະພາບ​, ຄວາມ​ຮ່ວມ​ມື​ ແລະ ​ຄວາມຮັ່ງມີ”, ທ່ານກ່າວ​ເສີມ.​

ແຜນ​ງານ​ນີ້​ລິເລີ່ມ​ໂດຍ​ປະເທດ​ຈີນ​ເມື່ອ​ປີ​ 2014 ໂດຍ​ຂອບ​​ໂຄງ​ການ​ຈະ​ຂະຫຍາຍ​ຄວາມ​ເຊື່ອມ​ໂຍງ,​ ປະລິມານ​ການ​ຜະລິດ​, ຄວາມ​ຮ່ວມ​ມື​ດ້ານ​ເສດຖະກິດ​ຂ້າມ​ເຂດ​ແດນ​, ການ​ຈັດການ​ຊັບ​ພະຍາກອນ​ນ້ຳ ​ແລະ ​ການ​ກະເສດ​ ລວມ​ທັງຫຼຸດ​ພາ​ວະ​ທຸກຍາກ​​ ແລະ ​ຈະ​ສ້າງ​ປະໂຫຍດ​ໃຫ້​ກັບ​ປະຊາຊົນ​ຫຼາຍ​ສິບ​ລ້ານ​ທີ່​ອາໄສ​ຢູ່ຕາມລ້ອງ​ແມ່ນ້ຳ​.

ການ​ປະ​ຊຸມ​ຄວາມ​ຮ່ວມ​ມື​ລ້ອງ​ນ້ຳ​ລ້ານ​ຊ້າງ​-ແມ່ນ້ຳ​ຂອງ (LMC) ເທື່ອທຳອິດ​ຈັດ​ຂຶ້ນ​ເມື່ອ​ເດືອນ​ມີ​ນາ 2016 ທີ່​ເມືອງ​ຊານ​ຢ່າ​ ແຂວງ​ໄຫ​ໜານ​ ປະເທດ​ຈີນ.​

ລ້ອງນ້ຳ​ລ້ານ​ຊ້າງ​ມີ​ຕົ້ນ​ກຳ​ເນີດ​ຢູ່​ເທິງພູພຽງ​ຕີເບດ​-ຊິງ​ໄຫ່​ຂອງ​ຈີນ​ ແລະ ​ມີ​ຊື່​ວ່າ​ແມ່ນ້ຳຂອງ​ເມື່ອ​ໄຫຼ​ຜ່ານ​ມຽນມາ​, ລາວ,​ ໄທ,​ ກຳປູເຈຍ,​ ຫວຽດ​ນາມ​ ແລະ ​ລົງ​ສູ່​ທະ​ເລ​ຈີນໃຕ້ໃນ​ທີ່ສຸດ.​

ຂໍຂອບໃຈ
ຂໍ້ມູນ : China Xinhua News

ຂ່າວສານອື່ນໆ