ລັດຖະມົນຕີ ຮສສ ເນັ້ນແຂວງວຽງຈັນ ພັດທະນາສີມືແຮງງານ ໃຫ້ເຂົ້າສູ່ມາດຕາຖານ

04-05-2018, 10:23 317

 

ຂປລ. ເມື່ອທ້າຍເດືອນຜ່ານມາ ທ່ານ ຄຳແພງ ​ໄຊສົມແພງ ລັດຖະມົນຕີ ກະຊວງແຮງງານ ​ແລະ ສະຫວັດດີການສັງຄົມ (ຮສສ) ໄດ້ກ່າວ ເນັ້ນໃຫ້ ຮສສ ແຂວງວຽງຈັນ ຕ້ອງໄດ້ສຸມໃສ່ ການສ້າງກໍາລັງແຮງງານ ກໍຄື ການພັດທະນາ ສີມືແຮງງານ ​ໃຫ້ເປັນຂະບວນການ ກວ້າງຂວາງ ​ແລະ ​ເຂົ້າສູ່ ມາດຕາຖານສາກົນ ໃນໂອກາດທີ່ ທ່ານ ເຂົ້າຮ່ວມກອງປະຊຸມ ສະຫລຸບ ການຈັດຕັ້ງປະຕິບັດວຽກງານ ແຮງງານ ​ແລະ ສະຫວັດດີການສັງຄົມທົ່ວ ແຂວງ​ວຽງ​ຈັນ ປະຈໍາປີ 2017. ພ້ອມເນັ້ນໜັກໃຫ້ຂະແໜງການ ວຽກງານແຮງງານຂອງແຂວງວຽງຈັນ ຈະຕ້ອງສູ້ຊົນ ເພື່ອບັນລຸຄາດໝາຍ ​ເປັນ​ຕົ້ນກໍາລັງແຮງງານ ຂອງພວກເຮົາຍັງບໍ່ສາມາດ ຕອບສະໜອງໄດ້ຕາມຄວາມຕ້ອງການ ທັງດ້ານປະລິມານ ​ແລະ ຄຸນນະພາ.

ທ່ານ ຄຳແພງ ​ໄຊສົມແພງ​ ກ່າວວ່າເນື່ອງຈາກ ປັດຈຸບັນ ສປປ ລາວ ພວມເປີດກວ້າງ ດ້ານເສດຖະກິດ ​ແລະ ການເຊື່ອມໂຍງກັບສາກົນ​. ​ແຮງງານ ເປັນປັດ​ໄຈການຜະລິດໜຶ່ງທີ່ຂາດບໍ່ໄດ້ ໃນ ຂະບວນການຜະລິດ ຫລື ​ໂຄງປະກອບເສດຖະກິດ ​ແຮງງານ ເປັນສ່ວນປະກອບທີ່ສໍາຄັນທີ່ສຸດ.

ທ່ານ ​ຄຳແພງ ​ໄຊສົມແພງ ກ່າວຕື່ມວ່າການຈັດຫາງານ ຕ້ອງຕິດພັນກັບການ ພັດທະນາສີມືແຮງງານ ຫລື ການຝຶກທັກສະອາຊີບ ໃຫ້ແກ່ແຮງງານ, ຊຶ່ງປັດຈຸບັນງົບປະມານຂອງລັດ ຍັງມີຈໍາກັດ ຂະແໜງ​ ຮສສ ພວກເຮົາ ຕ້ອງໄດ້ສົມທົບແໜ້ນ ກັບບັນດາຫົວໜ່ວຍແຮງງານ ​ແລະ ປຸກລະດົມ ໃຫ້​ເຂົາ​ເຈົ້າ ເຂົ້າມາມີສ່ວນຮ່ວມ ໃນການສ້າງແຮງງານໃຫ້ມີສີມື ເພື່ອຕອບສະໜອງ ໃຫ້ແກ່ຄວາມຕ້ອງການ ຂອງ ແຕ່ລະຫົວໜ່ວຍ. ພ້ອມນີ້, ກໍຍາດ​​ແຍ່ງ ການລົງທຶນ ​ແລະ ຊ່ວຍເຫລືອ ຈາກຕ່າງປະເທດ ​ໂດຍສະເພາະ ປະເທດທີ່ຕ້ອງການ ​​ແຮງງານຈາກລາວ ​ເພື່ອຊ່ວຍສ້າງແຮງງານລາວ ໃຫ້ມີວິຊາອາຊີບເຂົ້າໃນຕະຫລາດແຮງງານ ພາຍໃນ ​ແລະ ຕ່າງປະເທດ.

ສຳລັບ ການຄຸ້ມຄອງແຮງງານ ຕ້ອງເອົາໃຈໃສ່ລົງເຜີຍແຜ່ ໂຄສະນາ ບັນດາເອກະສານ, ຄວາມຮູ້ດ້ານແຮງງານ ທັງຫົວໜ່ວຍແຮງງານ ​ແລະ ​ແຮງງານ​​ເອງ ໃຫ້ມີຄວາມເຂົ້າໃຈ, ​ເອົາໃຈໃສ່ຕິດຕາມ​, ​ແກ້ໄຂບັນຫາ ຄວາມບໍ່ຍຸຕິທໍາ ​ໃນການເຮັດວຽກໃຊ້ແຮງງານສໍາລັບແຮງງານ ຕ່າງປະເທດ ​ເຂົ້າມາເຮັດວຽກ ກໍຈະໄດ້ມີການກວດກາຄືນລະບົບ ການສະເໜີ ​ແລະ ອອກໂກຕ້າກວດຄືນບັນດາບໍລິສັດ ສະເໜີ ນໍາເຂົ້າແຮງງານ ​ເພື່ອສ້າງໄດ້ມາດຖານ ເງື່ອນໄຂໃໝ່ທີ່ຮັດກຸມ, ​ຫລີກເວັ້ນ ບໍລິສັດນາຍໜ້າ ​ແລະ ລັກລອບເອົາແຮງງານບໍ່ຖືກເປົ້າໝາຍ ເຂົ້າມາພ້ອມນີ້, ການຂຶ້ນທະບຽນ ​ແລະອອກບັດແຮງງານຊົ່ວຄາວ ໃຫ້ແກ່ແຮງງານ ຕ່າງປະເທດ ທີ່ມາເຄື່ອນໄຫວ ບໍ່ຖືກຕ້ອງ ​​ເຊິ່ງ ໃນຕໍ່ໜ້າຈະໄດ້ມີການຕິດຕາມ​, ຊຸກຍູ້ ​ແລະ ກວດກາ ບັນດາ​ ແຮງງານດັ່ງກ່າວ ​​ໃຫ້ຫັນເຂົ້າສູ່ ການປະຕິບັດລະບຽບກົດໝາຍ. ປັດຈຸບັນ ຄວາມຕ້ອງການແຮງງານສີມື ພາຍໃນປະເທດ ເຮົາແມ່ນມີຫລາຍ, ຖ້າແຮງງານ ໄດ້ຮັບການຝຶກອາຊີບແລ້ວ ກໍບໍ່ຈໍາເປັນ ໄປເຮັດວຽກຢູ່ຕ່າງປະເທດແຕ່ຢ່າງໃດກໍຕາມ ການເຄື່ອນຍ້າແຮງງານ ກໍບໍ່ສາມາດປະຕິເສດ​​ໄດ້ ​ໃຫ້ເອົາໃຈໃສ່ ສ້າງ​ໃຫ້​ມີຄວາມຮູ້ ​ແລະ ຂໍ້ມູນ ຫລື ​ເປັນ​​ໃຈກາງ ອໍານວຍຄວາມສະດວກ ​ເພື່ອສະກັດກັ້ນ ບໍ່ໃຫ້ຂະບວນການ ຄ້າມະນຸດ ສວຍ​​ໂອກາດ ​ແລະຫລອກລວງແຮງງານ ໄປກົດຂີ່ຂູດຮີດ.

ຂ່າວ: ສົມຄິດ ແກ້ວນວນລາ

ຂ່າວສານອື່ນໆ