ມອບ-ຮັບ ນາມມະຍົດໜ່ວຍພັກ ເຂັ້ມແຂງ-ຮູ້ນໍາພາຮອບດ້ານ ປະຈຳປີ2017

18-06-2018, 14:11 242

ຄະນະພັກກະຊວງ ຮສສ ໄດ້ຈັດພິທີມອບ-ຮັບນາມມະຍົດໜ່ວຍພັກ ເຂັ້ມແຂງ-ຮູ້ນໍາພາຮອບດ້ານ ປະຈຳປີ 2017. ໃນວັນທີ 15 ມິຖຸນາ 2018 ນີ້, ທີ່ກະຊວງແຮງງານ ແລະ ສະຫວັດດີການສັງຄົມ ໂດຍເປັນກຽດເຂົ້າຮ່ວມຂອງ ສະຫາຍ ປອ ຄຳແພງ ໄຊສົມແພງ ກຳມະການສູນກາງພັກ,ເລຂາຄະນະພັກກະຊວງ ຮສສ . ມີບັນດາ ຄະນະປະຈຳ, ຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກ-ສະມາຊິກພັກຫລັກແຫລ່ງ ອອ້ມຂ້າງ ອົງຄະນະພັກກະຊວງ ຮສສ ເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ຄຳຂານ ພິນສະຫວັນ ຄະນະປະຈຳພັກ (ຮສສ) ໄດ້ຂຶ້ນສະຫຼຸຸບຕີລາຄາສະພາບການ ກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ປີ 2017 ໂດຍກ່າວວ່າ: ອົງຄະນະພັກກະຊວງແຮງງານ ແລະ ສະຫວັດດີການສັງຄົມ ( ຮສສ ) ປະກອບມີ 20 ໜ່ວຍຮາກຖານພັກ,ໃນນີ້: ມີ 01 ຄະນະພັກຮາກຖານ, ມີສະມາຊິກພັກທັງໝົດ 392 ສະຫາຍ, ຍິງ 130 ສະຫາຍ, ສະມາຊິກພັກສຳຮອງ 19 ສະຫາຍ ໂດຍພາຍໃຕ້ການຊີ້ນຳໆພາ ຂອງຄະນະພັກກະຊວງ (ຄະນະພັກປະກອບມີ 15 ສະຫາຍ) . ຜ່ານຈັດຕັ້ງປະເມີນແຜນການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ໃນປີ 2017 ຜ່ານມາ, ມີ 10 ໜ່ວຍພັກ ສາມາດຜ່ານການປະເມີນຕາມ 4 ດ້ານ, 5 ເນື້ອໃນ ແລະ ໄດ້ຖືກຮັບຮອງເອົາເປັນໜ່ວຍພັກເຂັ້ມແຂງ-ຮູ້ນໍາພາຮອບດ້ານ ຕາມລະບຽບການຂອງພັກ.
ທີ່ປະຊຸມ,ຍັງໄດ້ຮັບຟັງການໂອ້ລົມ ແລະ ໃຫ້ການຊີ້ທິດເຍືອງທາງ ຈາກ ສະຫາຍ ປອ ຄຳແພງ ໄຊສົມແພງ ກຳມະການສູນກາງພັກ,ເລຂາຄະນະພັກກະຊວງ ຮສສ ໂດຍ ທ່ານ ໄດ້ເນັ້ນໜັກບາງບັນຫາທີ່ແຕ່ລະໜ່ວຍພັກໄດ້ເອົາໃຈໃສ່ ເປັນຕົ້ນດັ່ງນີ້:
ຄະນະໜ່ວຍພັກແຕ່ລະຂັ້ນຕ້ອງປຸລະດົມສະມາຊິກພັກ-ພະນັກງານ-ລັດຖະກອນເພີ່ມທະວີຄວາມເອົາໃຈໃສ່ ໃນການຄົ້ນຄວ້າຮ່ຳຮຽນທິດສະດີ, ແນວທາງແຜນນະໂຍບາຍ, ມະຕິຄຳສັ່ງຂອງພັກ ໃຫ້ມີຄວາມໜັກແໜ້ນ ແລະ ເລິກເຊິ່ງ ເພື່ອປະກອບສ່ວນຈັດຕັ້ງປະຕິບັດວຽກງານດ້ານຕ່າງໆ ຢ່າງມີປະສິດທິພາບ; ເອົາໃຈໃສ່ວຽກງານສຶກສາອົບຮົບການເມືອງແນວຄິດ ເພື່ອປັບປຸງພາຍໃນໃຫ້ມີຄວາມເປັນເອກະພາບ ເພື່ອຕີຖອຍປະກົດການຫຍໍ້ທໍ້ຕ່າງໆ ແລະ ເຮັດໃຫ້ໜ່ວຍພັກກາຍເປັນແກນນຳ ທີ່ມີຄວາມໜັກແໜ້ນ ເປັນຄັນທຸງເຕົ້າໂຮມຄວາມສາມັກຄີທີ່ແທ້ຈິງ; ປັບປຸງຄວາມສາມັກຄີພາຍໃນໜ່ວຍພັກໃຫ້ດີ ມີການແບ່ງວຽກແບ່ງຄວາມຮັບຜິດຊອບໃນໝູ່ຄະນະໃຫ້ຈະແຈ້ງ ແລະ ສົ່ງເສີມແນວຄວາມຄິດ ແລະ ທັດສະນະປະດິດສ້າງຂອງສະມາຊິກພັກ,ພະນັກງານ-ລັດຖະກອນ ເພື່ອພ້ອມກັນເຮັດສຳເລັດໜ້າທີ່ການເມືອງ ທີ່ໄດ້ຮັບການມອບໝາຍເປັນຢ່າງດີ. ພ້ອມກັນນັ້ໜ, ການສ້າງ ແລະ ຈັດຕັ້ງປະຕິບັດການກໍ່ສ້າງໜ່ວຍພັກແຂງ-ຮູ້ນຳພາຮອບດ້ານ ຕ້ອງເຮັດຕໍ່ເນື່ອງ ແລະ ມີການຕິດຕາມຊຸກຍູ້ປະເມີນເປັນແຕ່ລະໄລຍະ ເພື່ອເສີມຂະຫຍາຍບົດຮຽທີ່ດີ ແລະ ປັບປຸງແກ້ໄຂດ້ານຄົງຄ້າງໃຫ້ທັນການ./

(ຂ່າວ-ພາບ: ເພັດສະໄໝ)

ຂ່າວສານອື່ນໆ