ໄຂຊຸດຝຶກອົບຮົມ ວຽກຄຸ້ມຄອງໄພພິບັດຂອງຄະນະຮັບຜິດຊອບ ຈຸດປະສານງານ ກະຊວງ, ອົງການ ແລະ ສູນກາງຊາວໜຸ່ມ

04-04-2018, 10:41 310

ຊຸດຝຶກອົບຮົມວຽກງານຄຸ້ມຄອງໄພພິບັດ ໃຫ້ແກ່ຄະນະຮັບຜິດຊອບຈຸດປະສານງານ ຄຸ້ມຄອງໄພພິບັດຊາວໜຸ່ມກະຊວງ, ອົງການ ແລະ ສູນກາງຊາວໜຸ່ມ ປະຈໍາປີ 2018 ຄັ້ງນີ້ ໄດ້ໄຂຂື້ນພາຍໃຕ້ບັນຍາກາດທີ່ທົ່ວພັກ ແລະ ທົ່ວປວງຊົນລາວທັງຊາດ ກຳລັງອອກແຮງແຂ່ງຂັນກັນສ້າງຜົນງານ ຢ່າງເປັນຂະບວນການຟົດຟື້ນ, ເພື່ອຂໍ່ານັບຮັບຕ້ອນໃຫ້ແກ່ ການສະເຫຼີມສະຫຼອງວັນສໍາຄັນຕ່າງໆຂອງຊາດຂອງພັກຄື: ວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 63 ປີ, ວັນສ້າງຕັ້ງ ຄຊປປລ ຄົບຮອບ 63 ປີ ແລະ ວັນສ້າງຕັ້ງ ກອງທັບປະຊາຊົນລາວ ຄົບຮອບ 70 ປີ ທີ່ໃກ້ຈະມາເຖິງໃນມໍ່ໆນີ້ ໃຫ້ມີບັນຍາກາດທີ່ຄື້ກຄືນ ແລະ ມີຂະບວນການທີ່ກ້ວາງຂວາງ ໃນຂອບເຂດທົ່ວປະເທດ.

          ໃນພິທີໄຂຊຸດຝຶກອົບຮົມໂດຍການເປັນຄະນະປະທານຂອງ ທ່ານ ບຸນຕາ ເທບພະວົງ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ທ່ານ ວິໄລພົງ ສີສົມຫັວງ ຮອງຫົວໜ້າກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ, ທ່ານ ໂຟວັດ ມອນໂດລ ຜູ້ຕາງໜ້າຈາກອົງການອ໋ອກຟາມ.

          ຊຸດຝຶກອົບຮົມນີ້ແມ່ນມີຜູ້ເຂົ້າຮ່ວມທັງໝົດ 55​ ສະຫາຍ, ຍິງ 20 ສະຫາຍ ຈາກບັນດາກະຊວງອ້ອມຂ້າງສູນກາງ, ອົງການ ແລະ ສູນກາງຊາວໜຸ່ມ. ຈຸດປະສົງຂອງການຝຶກອົບຮົມນີ້ແມ່ນເພື່ອ: ເພື່ອ​ເຜີຍ​ແຜ່​ຄວາມ​ຮູ້​ຄວາມ​ເຂົ້າ​ໃຈ ​ແລະ ຂໍ້​ມູນ​ກ່ຽວ​ກັບ​ວຽກ​ງານ​ປ້ອງ​ກັນ ​ແລະ ຄອບ​ຄຸມ​ໄພພິບັດຂັ້ນພື້ນຖານ ໃຫ້ກັບອົງການຈັດຕັ້ງຊາວໜຸ່ມ, ​ໃຫ້​ຄະນະ​ຮັບຜິດຊອບ​ວຽກ​ງານ​ປ້​ອງກັນ ​ແລະ ຄອບ​ຄຸມ​ໄພພິບັດ ບັນດາກະຊວງ, ອົງການ ​ແລະ ​ສູນກາງຊາວໜຸ່ມ ຮູ້ຈັກ​ບົດບາດ ​ແລະ ໜ້າ​ທີ່​ຂອງ​ຕົນ ​ໃນ​ການ​ກຽມພ້ອມຮັບ​ມື ແລະ ກຽມພ້ອມໃຫ້ທັນເຫດການ ຕອບໂຕ້ສຸກເສີນ​ກັບສະພາບ​ໄພພິບັດ ​ທີ່​ເກີດ​ຂື້ນຢ່າງທັນການ, ເປັນການຮຽນຮູ້ ແລະ ແລກປ່ຽນ ບົດຮຽນ ເຊິ່ງກັນ ແລະ ກັນ ຂອງວຽກງານໄພພິບັດໃນຂົງເຂດຄວາມຮັບຜິດຊອບຂອງຕົນ.

          ຜົນຂອງການຝຶກອົບຮົມ ໄດ້ເຮັດໃຫ້ຜູ້ເຂົ້າຮ່ວມເຂົ້າໃຈພື້ນຖານກ່ຽວກັບວຽກງານຄຸ້ມຄອງໄພພິບັດ, ການຫຼຸດຜ່ອນຄວາມສ່ຽງໄພພິບັດ, ການກຽມພ້ອມເພື່ອຕອບໂຕ້ຕໍ່ໄພພິບັດ ເນື່ອງຈາກວ່າຊາວໜຸ່ມແມ່ນກຳລັງແຮງຂອງຊາດ ທີ່ສາມາດຕະລຸມບອນເຂົ້າໃສ່ສະພາບເຫດການໃດໜຶ່ງທີ່ອາດຈະເກີດຂື້ນ ແລະ ອາດຈະເຮັດໃຫ້ເກີດຜົນເສຍຫາຍຕໍ່ຊີວິດ, ຊັບສິນ.

 

ພາບ-ຂ່າວ: ສົມບັດ ດວງສະຫວັນ

ຂ່າວສານອື່ນໆ