ຫລາຍພາກສ່ວນຍັງສືບຕໍ່ບໍລິຈາກ ຊ່ວຍຜູ້ປະສົບໄພ

08-08-2018, 22:37 73

ຂປລ. ຫລາຍພາກສ່ວນທັງພາຍໃນ ແລະ ຕ່າງປະເທດ ຍັງສືບຕໍ່ບໍລິຈາກທັງເງິນສົດ ແລະ ເຄື່ອງບໍລິໂພກ-ອຸປະໂພກຕ່າງໆ ເພື່ອຊ່ວຍເຫລືອຜູ້ປະສົບໄພ ຊຶ່ງຍອດມູນຄ່າເງິນສົດຂອງການຊ່ວຍເຫລືອ ຜ່ານສູນຮັບບໍລິຈາກ ຢູ່ກະຊວງແຮງງານ ແລະ ສະຫວັດດີການສັງຄົມ ພຽງສູນດຽວເທົ່ານັ້ນ, ມາຮອດ ວັນທີ 7 ສິງຫາ 2018, ເງິນກີບທັງໝົດ 15,2 ຕື້ກວ່າກີບ, ສະກຸນເງິນໄທ 27 ລ້ານກວ່າບາດ ແລະ ສະກຸນເງິນໂດລາຈຳນວນ 11,9 ລ້ານກວ່າໂດລາສະຫະລັດ. 


ສະເພາະວັນທີ 8 ສິງຫາ 2018 (ຮອດເວລາ 16:10 ໂມງ), ມີທັງໝົດ 20 ພາກສ່ວນ ທີ່ໄດ້ມາບໍລິຈາກຢູ່ສູນດັ່ງກ່າວ. ສະເພາະເງິນສົດມີຈຳນວນ 1 ຕືກວ່າກີບ, ສະກຸນເງິນໄທ 57.000 ບາດ ແລະ ສະກຸນເງິນໂດລາ 10.200 ໂດລາສະຫະລັດ, ຊຶ່ງປະກອບມີ: ກຸ່ມບໍລິສັດ ນັດທະລິນ ພ້ອມດ້ວຍ ບໍລິສັດ ເມືອງໂຂງ ຄຣີນ ເອເນີຈີ້ ຈຳກັດ ແລະ ບໍລິສັດ ແທນພາວເວີ ຈຳກັດ ຈຳນວນ 263 ລ້ານ, ແຂວງ ຜົ້ງສາລີ ຈຳນວນ 200 ລ້ານກີບ, ກຸ່ມບໍລິສັດໂຄລາວ ຈຳນວນ 160 ລ້ານກີບ, ສະພາອຸດສາຫະກຳ ແລະ ການຄ້າ ຈຳນວນ 100 ລ້ານກີບ, ບໍລິສັດ ຢຸຍຟົງລາວ ຈຳກັດຜູ້ດຽວ ຈຳນວນ 88 ລ້ານກີບ, ບໍລິສັດ HHI Lao ຈຳນວນ 10.000 ໂດລາສະຫະລັດ, ບໍລິສັດ GIT ແລະ ພາກສ່ວນອື່ນໆ.


ສູນຮັບບໍລິຈາກດັ່ງກ່າວນີ້ຍັງຈະສືບຕໍ່ຮັບເອົາການຊ່ວຍເຫລືອຈາກທຸກພາກສ່ວນ ເພື່ອນຳເອົາໄປແບ່ງເບົາຄວາມທຸກ ແລະ ແກ້ໄຂຊີວິດການເປັນຢູ່ຂອງຜູ້ທີ່ໄດ້ຮັບຜົນກະທົບ, ຊຶ່ງທ່ານສາມາດສອບຖາມຂໍ້ມູນ ຫລື ຕິດຕໍ່ພົວພັນຜ່ານສາຍດ່ວນໂດຍບໍ່ໄດ້ເສຍຄ່າ ໂທ: 1511, 1522 ຕັ້ງແຕ່ເວລາ 8:00 ໂມງ ຫາ 18:00 ໂມງ. 


ຂ່າວ+ພາບ: ສິງຄຳ

ຂ່າວສານອື່ນໆ