ລາວ-ໄທ ສຳເລັດປັກຫຼັກໝາຍຊາຍແດນ 210 ຫຼັກໝາຍ

23-01-2018, 10:27 210

ໃນ​ວັນ​ທີ 17-19 ມັງກອນ 2018 ທີ່​ບາງກອກ ຣາ​ຊະ​ອານາຈັກ​ໄທ ໄດ້​ຈັດ​ກອງ​ປະຊຸມ​ຄະນະກຳມາ​ທິ​ການ​ຊາຍ​ແດນ​ຮ່ວມ ລາວ-ໄທ ຄັ້ງ​ທີ 11 ຝ່າຍ​ລາວ​ນຳ ໂດຍ​ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ ປະທານ​ຄະນະ​ກຳມາ​ທິການ​ຊາຍ​ແດນ​ຮ່ວມ​ລາວ-ໄທ ແລະ ຝ່າຍ​ໄທ​ນຳ​ໂດຍ​ທ່ານ ດອນ ປຣະ​ມັດວິໄນ ລັດຖະມົນຕີ​ວ່າການ​ກະຊວງ​ການ​ຕ່າງປະເທດ ແຫ່ງ ​ຣາ​ຊະ​ອານາຈັກ​ໄທ.

ກອງ​ປະຊຸມ​ໄດ້​ທົບ​ທວນຄືນ ຜົນ​ຂອງ​ການຈັດຕັ້ງ​ປະຕິບັດ​ບົດບັນທຶກ ​ກອງ​ປະຊຸມ​ຄະນະ​ກຳມາທິ​ການ​ຊາຍ​ແດນ​ຮ່ວມ​ລາວ-ໄທ ຄັ້ງ​ທີ 10 ນັບ​ແຕ່​ປີ 2015 ເປັນຕົ້ນມາ ແລະ ໄດ້​ຕີ​ລາຄາ​ສູງ​ຕໍ່​ຜົນຂອງ​ການ​ສຳ​ຫຼວດ ແລະ ປັກ​ຫຼັກໝາຍ​ຊາຍ​ແດນ​ຮ່ວມ ໃນ​ໄລຍະ 2 ປີ​ທີ່​ຜ່ານ​ມາ​ວ່າ ໄດ້​ມີ​ບາດກ້າວ ແລະ ຄວາມ​ຄືບ​ໜ້າ​ໃນ​ລະດັບໜຶ່ງ ເຖິງ​ຢ່າງໃດ​ກໍ່​ດີ ການ​ແກ້​ໄຂບັນຫາ​ຊາຍ​ແດນ​ທີ່​ຍັງ​ຄົງ​ຄ້າງນັ້ນ ​ບໍ່​ສຳເລັດ​ຕາມ​ເປົ້າ​ໝາຍ​ທີ່​ໄດ້ວາງ​ໄວ້ ແຕ່​ໄດ້​ເພີ່ມ​ຄວາມ​ໄວ້ເນື້ອ​ເຊື່ອ​ໃຈ ແລະ ເຂົ້າ​ອົກ​ເຂົ້າໃຈເຊິ່ງ​ກັນ ແລະ ກັນ​ຫຼາຍ​ຂຶ້ນ ເພື່ອ​ພ້ອມ​ກັນ​ຊອກ​ຊ່ອງ​ທາງ​ແກ້ໄຂ​ບັນຫາ​ທີ່​ຍັງ​ຄົງ​ຄ້າງ​ໃຫ້​ສຳເລັດ​ໂດຍ​ໄວ ກອງ​ປະຊຸມ​ຄັ້ງ​ນີ້ ໄດ້ຮັບຮອງ​ເອົາ​ບັນດາ​ບົດ​ບັນທຶກກອງ​ປະຊຸມ​ຄະນະ​ເຈົ້າ​ໜ້າທີ່​ອາວຸ​ໂສ​ຮ່ວມ ລາວ-ໄທ ຈຳນວນ 4 ສະບັບ ແລະ ບົດ​ບັນທຶກ​ກອງ​ປະຊຸມ​ຄະນະ​ອະນຸ​ກຳມະການ​ເຕັກນິກ​ຮ່ວມ ລາວ-ໄທ ຈຳນວນ 3 ສະບັບ.

ພ້ອມ​ກັນ​ນັ້ນ ກອງ​ປະຊຸມ​ຍັງໄດ້​ຮັບຮອງ ແລະ ຮັບ​ຊາບ​ຜົນການ​ສຳ​ຫຼວດ ແລະ ປັກ​ຫຼັກ​ໝາຍຊາຍ​ແດນ​ທາງບົກຮ່ວມ​ລະຫວ່າງ ລາວ-ໄທ ຂອງ​ຄະນະ​ອະນຸ​ກຳມະການ​ເຕັກນິກ​ຮ່ວມ ລາວ-ໄທ ແຕ່​ວັນ​ທີ 21 ທັນວາ 2014 ເຖິງ​ວັນ​ທີ 31 ກໍລະກົດ 2017 ເປັນຕົ້ນ: ການ​ສຳ​ຫຼວດ ແລະ ກຳນົດ​ສັນຍະລັກ​ບໍລິເວນ​ແກ້ງຜາ​ໄດ ການ​ສ້ອມແປງ​ຄືນ​ຫຼັກໝາຍ​ເລກ​ທີ 2-05 ທີ່​ຖືກ​ທຳລາຍ ການ​ເຮັດ​ບົດ​ຊີ້​ແຈງ​ເຫດຜົນ​ການ​ຂີດ​ທິດ​ເນັ່ງ​ສັນ​ປັນ​ນ້ຳ​ບໍລິເວນ​ພູຜາ​ໝົ່ນ ການ​ຂີດ​ເສັ້ນ​ຊາຍແດນ​ທີ່​ສະເໜີ​ບໍລິເວນ​ຊ່ອງ​ທາງບ້ານ​ຮວກ-ກິ່ວ​ຫົກ ການ​ສຳ​ຫຼວດເກັບ​ລາຍ​ລະອຽດ ແລະ ແຕ້ມແຜນຜັງ​ສະໜາມ​ບໍລິເວນ​ຫຼັກໝາຍ​ຊາຍ​ແດນ ເລກ​ທີ 33-34 ການ​ດຳເນີນ​ການ​ສຳ​ຫຼວດ​ເພີ່ມເຕີມ ​ບໍລິເວນ​ສາມ​ບ້ານ​ຂອງ​ຄະນະ​ອະນຸ​ກຳມະການ​ເຕັກນິກ​ຮ່ວມ ລາວ-ໄທ ຜົນ​ການ​ສຳ​ຫຼວດ​ເກັບກຳ​ຂໍ້​ມູນ​ຕົວ​ຈິງ​ຕາມ​ລຳ​ນ້ຳ​ເຫືອງ ຜົນ​ການ​ສ້າງ​ແຜນທີ່​ມາດຕາສ່ວນ 1:5000 ບໍລິເວນ​ຫ້ວຍ​ໂດນ ຜົນ​ການ​ດຳເນີນ​ການ​ສຳ​ຫຼວດ ເພີ່ມ​ເຕີມ​ບໍລິເວນທົ່ງ​ໜອງ​ບົວຂອງ​ຄະນະ​ອະນຸ​ກຳມະການ​ເຕັກນິກ ແລະ ຮັບຮອງ​ເອົາ​ການ​ກວດກາ ແລະ ປັບປຸງ​ຄ່າ​ພິ​ກັດ​ຂອງ​ຈຸດຕາ​ໜ່າງ​ຄອບ​ງຳ​ພື້ນຖານ​ດາວທຽມ (GPS).

ສຳລັບ​ຊາຍ​ແດນ ລາວ-ໄທ ທາງນ້ຳ ກອງ​ປະຊຸມ​ໄດ້​ຮັບຊາບຜົນ​ການ​ສ້າງ​ແຜນທີ່​ແມ່ນ້ຳຂອງ​ສະບັບ​ໃໝ່​ມາດຕາ​ສ່ວນ 1:25000 ຈຳນວນ 115 ເລກໝາຍ​ຜົນ​ການ​ດຳເນີນ​ການ​ຖ່າຍທອດ​ເສັ້ນ​ຊາຍ​ແດນ ​ລົງ​ໃນ​ແຜນທີ່​ແມ່ນ້ຳ​ຂອງ​ສະບັບ​ໃໝ່ ມາດຕາສ່ວນ 1:25000 ແລະ ຜົນ​ການດຳເນີນ​ການ​ສຳ​ຫຼວດ​ວັດແທກດ້ວຍ​ເຄື່ອງຮັບ​ສັນຍານ​ດາວ​ທຽມ GPS ຕາມ​ຝັ່ງ​ແມ່ນ້ຳ​ຂອງ​ເບື້ອງຝັ່ງ​ໄທ​ທັງ​ໝົດ ຈຳນວນ 167 ຈຸດ.

ກອງ​ປະຊຸມ​ຄັ້ງ​ນີ້ ທັງ​ສອງ​ຝ່າຍຍັງ​ໄດ້​ຮ່ວມ​ກັນ​ພິຈາລະນາ​ແກ້​ໄຂ ບັນຫາ​ຫຼັກ​ໝາຍ​ຊາຍ​ແດນ​ທີ່​ຄົງຄ້າງ​ໃຫ້​ຫຼຸດ​ໜ້ອຍ​ລົງ ໂດຍ​ໄດ້ວາງ​ແຜນການ​ປະຕິບັດ​ງານ​ໃນສົກ​ປີ 2018-2019 ເຊິ່ງ​ມອບໝາຍ​ໃຫ້​ຄະນະ​ເຈົ້າ​ໜ້າທີ່​ອາ​ວຸໂສ ​ສືບຕໍ່​ລົງ​ກວດກາ​ພື້ນ​ທີ່​ຕົວ​ຈິງໃນ 3 ບໍລິເວນ ຄື: ບໍລິເວນ​ພູຜາໝົ່ນ ບໍລິເວນ​ສາມ​ບ້ານ ແລະ ບໍລິເວນ​ຕົ້ນ​ກຳເນີດ​ນ້ຳ​ເຫືອງ ພ້ອມ​ກັນ​ນັ້ນ ກໍ່​ມອບ​ໝາຍ​ໃຫ້​ຄະນະ​ປະຕິບັດ​ງານ​ຮ່ວມ​ ທາງ​ດ້ານກົດໝາຍ​ສືບຕໍ່​ປຶກສາ​ຫາລື ເພື່ອຊອກ​ຊ່ອງ​ທາງ​ແກ້​ໄຂ​ຈຸດ​ຄົງ​ຄ້າງທັງ​ນີ້ ເພື່ອ​ແນໃສ່​ໃຫ້ການ​ສຳຫຼວດ ແລະ ປັກ​ຫຼັກ​ໝາຍ​ຊາຍແດນ ລາວ-ໄທ ທາງບົກ​ໃຫ້​ສຳເລັດ​ປີ 2020 ແລະ ທາງນ້ຳ​ໃຫ້ສຳເລັດ​ປີ 2021.

ໂດຍ​ລວມ​ແລ້ວ ການ​ສຳ​ຫຼວດ ແລະ ປັກ​ຫຼັກ​ໝາຍ​ຊາຍ​ແດນ ລາວ-ໄທ ທາງບົກ​ໄດ້​ເລີ່ມ​ມາ​ແຕ່ວັນ​ທີ 5 ພຶດສະພາ 1997 ເປັນຕົ້ນ​ມາ​ຈົນ​ເຖິງ​ປັດຈຸບັນ ເຊິ່ງ​ທັງສອງ​ຝ່າຍ​ສາມາດ​ສຳ​ຫຼວດ ແລະ ປັກ​ຫຼັກ​ໝາຍ​ຮ່ວມ​ກັນ​ສຳເລັດແລ້ວ ຈຳນວນ 210 ຫຼັກ​ໝາຍ ລວມ​ລວງ​ຍາວ​ຂອງ​ເສັ້ນ​ຊາຍແດນ 676 ກິໂລແມັດ ເທົ່າ​ກັບ 93% ຂອງ​ຄວາມ​ຍາວ​ເສັ້ນ​ຊາຍແດນ​ທາງບົກ​ທັງ​ໝົດ ປະມານ 735 ກິໂລແມັດ ຫຼື ເທົ່າ​ກັບ 37% ຂອງ​ເສັ້ນ​ຊາຍ​ແດນ​ທັງທາງບົກ ແລະ ທາງນ້ຳ​ທີ່​ມີຄວາມ​ຍາວ ປະມານ 1.835 ກິໂລ​ແມັດ. ຂ່າວ: ນສພ ວຽງຈັນໃຫ່ມ

ຂ່າວສານອື່ນໆ