ລາວສົ່ງນັກແຂ່ງຂັນ ສີມືແຮງງານ ເຂົ້າຮ່ວມ ແຂ່ງຂັນ ສີມືແຮງງານອາຊຽນ ຄັ້ງທີ XII ທີ່ປະເທດໄທ

27-08-2018, 14:41 101

ສປປ ລາວ ສົ່ງນັກແຂ່ງຂັນສີມືແຮງງານ ຈຳນວນ 14 ຄົນ, ພ້ອມດ້ວຍຄູຝຶກໄປຮ່ວມແຂ່ງຂັນສີມືແຮງງານອາຊຽນ ຄັ້ງທີ XII ເຊິ່ງຈະຈັດຂຶ້ນ ໃນລະຫວ່າງວັນທີ 31 ສິງຫາ ຫາວັນທີ 5 ກັນຍາ 2018 ທີ່ປະເທດໄທ, ເຊິ່ງກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ຈັດພິທີສົ່ງຄະນະນັກແຂ່ງຂັນສີມືແຮງງານທິມຊາດລາວເຂົ້າຮ່ວມ ຂຶ້ນໃນວັນທີ 23 ສິງຫາ ທີ່ຜ່ານມາ ທີ່ເຮືອນຮັບແຂກກະຊວງ ຮສສ, ເປັນກຽດເຂົ້າຮ່ວມມີທ່ານ ບຸນຄົງ ຫລ້າສຸກັນ ຮອງລັດຖະມົນຕີ ກະຊວງແຮ...ງງານ ແລະ ສະຫວັດດີການສັງຄົມ, ມີຜູ້ຕາງຫນ້າຈາກສູນກາງສະຫະພັນກຳມະບານລາວ, ຄະນະກຳມະການ, ຄູຝຶກ ແລະ ນັກແຂ່ງຂັນເຂົ້າຮ່ວມ.


ໃນພິທີ ທ່ານ ຄອນສີ ມະຫາວົງ ຮອງຫົວຫໜ້າກົມພັດທະນາສີມືແຮງງານ ແລະ ຈັດຫາງານ ໄດ້ຂຶ້ນລາຍງານໃຫ້ຮູ້ວ່າ: ການແຂ່ງຂັນສີມືແຮງງານຄັ້ງທີ 12 ທີ່ປະເທດໄທຄັ້ງນີ້ ມີຈໍານວນສາຂາວິຊາຊ່າງທີ່ບັນຈຸເຂົ້າແຂ່ງຂັນເປັນທາງການທັງໝົດ 24 ສາຂາວິຊາຊ່າງ, ສຳລັບ ສປປ ລາວ ຄັ້ງນີ້ ໄດ້ກຳນົດເອົາ 7 ສາຂາຊ່າງເຂົ້າຮ່ວມແຂ່ງຂັນ ຄື: ຊ່າງກໍ່, ຊ່າງປຸງແຕ່ງອາຫານ, ຊ່າງຕິດຕັ້ງໄຟຟ້າໃນອາຄານ, ຊ່າງຈອດໂລຫະ, ຊ່າງຕັດຫຍິບເຄື່ອງນຸ່ງ, ຊ່າງອອກແບບກຣາຟິກ ແລະ ຊ່າງໄມ້ເຄື່ອງເຮືອນ ທັງໝົດ 14 ຄົນ, ເຊິ່ງມີຄະນະນັກແຂ່ງຂັນເຂົ້າຮ່ວມທັງໝົດ 42 ຄົນ ແລະ ທ່ານ ຍັງໃຫ້ຮູ້ຕື່ມອີກວ່າ: ການແຂ່ງຂັນສີມືແຮງງານອາຊຽນ ໄດ້ເລີ່ມຄັ້ງທີ 1 ໃນປີ 1995 ທີ່ປະເທດມາເລເຊຍ. ສຳລັບສປປ ລາວ ໄດ້ເຂົ້າຮ່ວມການແຂ່ງຂັນສີມືແຮງງານອາຊຽນ ໃນປີ 2001 ທີ່ບາງກອກ ປະເທດໄທ, ເຊິ່ງເປັນຄັ້ງທີ 3 ຂອງອາຊຽນ ແລະເປັນປີທຳອິດຂອງ ສປປ ລາວ ນັບແຕ່ນັ້ນມາ ໄດ້ເຂົ້າຮ່ວມການແຂ່ງຂັນສີມືແຮງງານອາຊຽນ ໂດຍຕະຫລອດ ເຊິ່ງຈັດຂຶ້ນທຸກໆ 2 ປີ. ການແຂ່ງຂັນສີມືແຮງງານມີຈຸດປະສົງ ເພື່ອສົ່ງເສີມການພັດທະນາຄຸນນະພາບ ຂອງກຳລັງແຮງງານ ແລະ ການຮ່ວມມືກັນ ໃນວຽກງານພັດທະນາຊັບພະຍາກອນມະນຸດ. ຜ່ານມາ ການເຂົ້າຮ່ວມແຂ່ງຂັນໃນລະດັບອາຊຽນ ຂອງ ສປປ ລາວ ສາມາຍາດໄດ້ບົດຮຽນ ແລະ ປະສົບການ ເຊິ່ງສາມາດນຳມາຖ່າຍທອດ ແລະ ຜັນຂະຫຍາຍເຂົ້າໃນວຽກງານ ພັດທະນາສີມືແຮງງານ ເປັນແຕ່ລະໄລຍະ. ສຳລັບປີ 2014 ສປປ ລາວ ສາມາດຍາດໄດ້ 1 ຫລຽນເງິນ ຂອງສາຂາຊ່າງໄຟຟ້າ ໃນການແຂ່ງຂັນສີມືແຮງງານອາຊຽນ ຄັ້ງທີ 10ຢູ່ ສສ ຫວຽດນາມ, ເຊິ່ງເປັນຫລຽນປະຫວັດສາດ ໃນການເຂົ້າຮ່ວມແຂ່ງຂັນໃນເວທີອາຊຽນ.
(ພາບ+ຂ່າວ: ຄໍາເມິງ ນັກຂ່າວ ກະຊວງ ຮສສ ລາຍງານ)

ຂ່າວສານອື່ນໆ