ພີ່ນ້ອງຊາວໄທຮ່ວມໃຈບໍລິຈາກຊ່ວຍຜູ້ປະສົບໄພ 332.000 ບາດ

09-08-2018, 16:56 109

ຂປລ. ໃນຕອນບ່າຍຂອງວັນທີ 9 ສິງຫາ 2018, ກຸ່ມບໍລິສັດທຳມະສອນ, ຮ້ານສັນຕິພາບ ວັດສະດຸກໍ່ສ້າງ ແລະ ບໍລິສັດ ກະເບື້ອງ ໂອລານ ໄດ້ມອບວັດຖຸອຸປະກອນ ແລະ ເຄື່ອງອຸປະໂພກ-ບໍລິໂພກຕ່າງໆ ລວມມູນຄ່າທັງໝົດ 332.000 ບາດ ໃຫ້ລັດຖະບານແຫ່ງ ສປປ ລາວ ເພື່ອນຳໄປຊ່ວຍເຫລືອຜູ້ປະສົບໄພພິບັດຢູ່ເມືອງ ສະໜາມໄຊ, ແຂວງ ອັດຕະປື ແລະ ບັນດາແຂວງອື່ນໆທີ່ໄດ້ຮັບຜົນກະທົບ.


ໃນນີ້, ກຸ່ມບໍລິສັດທຳມະສອນ ມອບຖັງນ້ຳ 6 ຖັງ ແລະ ເຄື່ອງອຸປະໂພກ ມູນຄ່າ 200.000 ບາດ, ກຸ່ມບໍລິສັດທຳມະສອນ ບວກກັບ ຮ້ານສັນຕິພາບ ວັດສະດຸກໍ່ສ້າງ ມອບຖັງນ້ຳຈຳນວນ 30 ຖັງ ມູນຄ່າ 120.000 ບາດ ແລະ ບໍລິສັດ ກະເບື້ອງ ໂອລານ ມອບເສື້ອ 1 ເປົາ ມູນຄ່າ 12.000 ບາດ ຊຶ່ງຕາງໜ້າມອບໂດຍ ທ່ານ ນາງ ປາລິດາ ທະລົງແສງຈັນ ເຈົ້າຂອງຮ້ານສັນຕິພາບ ວັດສະດຸກໍ່ສ້າງ ແລະ ກ່າວຮັບໂດຍ ທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.


ໃນໂອກາດນີ້, ທ່ານ ນາງ ປາລິດາ ທະລົງແສງຈັນ ກໍໄດ້ສະແດງຄວາມເສຍໃຈ ແລະ ຮູ້ສຶກສະເທືອນໃຈຕໍ່ເຫດການທີ່ເກີດຂຶ້ນໃນຄັ້ງນີ້ ແລະ ຫວັງຢ່າງຍິ່ງວ່າ ການຊ່ວຍເຫລືອໃນຄັ້ງນີ້ ຈະມີຜົນປະໂຫຍດ ຫລື ຊ່ວຍບັນເທົາທຸກຜູ້ປະສົບໄພຢູ່ໃນເມືອງ ສະໜາມໄຊ, ແຂວງ ອັດຕະປື, ພ້ອມທັງໄດ້ກ່າວໃຫ້ກຳລັງໃຈຜູ້ປະສົບໄພ ແລະ ຄອບຄົວໃນຄັ້ງນີ້ ໂດຍຂໍໃຫ້ທຸກຄົນເຂັ້ມແຂງ ແລະ ມີກຳລັງໃນການຕໍ່ສູ້, ພ້ອມທັງຫວັງວ່າປະຊົນທີ່ໄດ້ຮັບຜົນກະທົບໃນຄັ້ງນີ້ຈະສາມາດຜ່ານຜ່າວິກິດນີ້ໄປດ້ວຍດີ ແລະ ມີຄວາມປອດໄພ.
ຂ່າວ+ພາບ: ສິງຄຳ

ຂ່າວສານອື່ນໆ