ຫ້ອງການປັບສະຖານະພາບແຮງງານລາວຈະເປີດໃຫ້ບໍລິການໃນທ້າຍເດືອນສິງຫານີ້

25-08-2017, 14:05 399

ໃນວັນທີ 22 ສິງຫານີ້, ຮອງຫົວໜ້າກົມຄຸ້ມຄອງແຮງງານ, ໄດ້ຕາງໜ້າໃຫ້ຄະນະປະຕິບັດງານ, ໜ່ວຍງານປັບສະຖານະພາບແຮງງານລາວທີ່ເຮັດວຽກຢູ່ປະເທດ ໄທແບບບໍ່ຖືກຕ້ອງຕາມກົດໝາຍ, ໄດ້ເຂົ້າລາຍງານກ່ຽວກັບຄວາມພ້ອມດ້ານຕ່າງໆຂອງໜ່ວຍງານຕໍ່ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທັງເປັນຫົວໜ້າຄະນະກຳມະການຊີ້ນຳ ການປັບສະຖານະພາບແຮງງານລາວທີ່ເຮັດວຽກຢູ່ໄທແບບບໍ່ຖືກຕ້ອງຕາມກົດໝາຍວ່າ: ພາຍຫລັງທີ່ໄດ້ຮັບການແຕ່ງຕັ້ງ ຄະນະປະຕິບັດງານດັ່ງກ່າວຕາມຂໍ້ຕົກລົງຂອງລັດຖະມົນຕີ ສະບັບເລກທີ 1458/ຮສສ, ລົງວັນທີ 18 ພຶດສະພາ 2017, ຄະນະປະຕິບັດງານໄດ້ສຶກສາ, ເກັບກຳຂໍ້ມູນທີ່ກ່ຽວຂ້ອງ, ໂດຍສະເພາະແມ່ນບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານແຮງງານລະຫວ່າງລັດຖະບານລາວ ແລະ ໄທ, ຂໍ້ຕົກລົງວ່າດ້ວຍການຈ້າງແຮງງານ, ບົດບັນທຶກກອງປະຊຸມວິຊາການລາວ-ໄທ, ແຜນການປັບສະຖານະພາບແຮງງານລາວ ແລະ ເອກະສານຂໍ້ມູນຈຳ ນວນ ຕົວເລກຂອງແຮງງານລາວທີ່ທາງການໄທໄດ້ຂຶ້ນບັນຊີເອົາໄວ້ ແລະ ມາຮອດປັດຈຸບັນ ແມ່ນໄດ້ສຳເລັດການກະກຽມດ້ານນິຕິກຳ, ບຸກຄະລາກອນ, ສະຖານທີ່ ເຮັດວຽກ, ອຸປະກອນຮັບໃຊ້, ທີ່ພັກຂອງພະນັກງານ ແລະ ອື່ນໆເປັນທີ່ຮຽບຮ້ອຍແລ້ວ, ຊຶ່ງຄາດວ່າ: ໃນວັນທີ 28 ສິງຫານີ້, ຈະເປີດຫ້ອງການປັບສະຖານະພາບ ແຮງງານລາວ ທີ່ເຮັດວຽກຢູ່ໄທແບບບໍ່ຖືກຕ້ອງຕາມກົດໝາຍຢ່າງເປັນທາງການ, ຈະມີພະນັກງານປະຈຳທັງໝົດ 32 ຄົນ, ມາຈາກຫ້ອງວ່າການສຳນັກ ງານນາຍົກລັດຖະມົນຕີ 1 ທ່ານ, ກະຊວງການຕ່າງປະເທດ 4 ທ່ານ, ກະຊວງ ປກສ 6 ທ່ານ, ກະຊວງການເງິນ 1 ທ່ານ ແລະ ກະຊວງແຮງງານ ແລະ ສະຫວັດດີການສັງຄົມ 6 ທ່ານ. ນອກນີ້ ຍັງມີພະນັກງານຈາກບໍລິສັດເອກະຊົນອີກ 14 ທ່ານ ເພື່ອປະກອບສ່ວນເຮັດວຽກ ງານການບໍລິການໃຫ້ໜ່ວຍງານດັ່ງກ່າວໄດ້ເຄື່ອນໄຫວຢ່າງມີປະສິດທິພາບ.
( ເພັດສະໄໝ )

ຂ່າວສານອື່ນໆ