ແຈ້ງສະພາບຄວາມຄືບໜ້າການແກ້ໄຂ ໄພພິບັດຢູ່ສະໜາມໄຊຕໍ່ສາກົນ

08-08-2018, 09:33 122

ກອງປະຊຸມຖະແຫຼງຂ່າວ ຕໍ່ບັນດາທູຕານຸທູດຕ່າງປະເທດ, ອົງການຈັດຕັ້ງສາກົນ, ອົງການຈັດຕັ້ງທີ່ບໍ່ສັງກັດລັດຖະບານ (NGO) ປະຈຳ ສປປ ລາວ ກ່ຽວກັບຄວາມຄືບໜ້າເບື້ອງຕົ້ນຂອງ ການແກ້ໄຂໄພພິບັດລະດັບຊາດ ທີ່ເມືອງສະໜາມໄຊ ແຂວງອັດ ຕະປື ພາຍໃຕ້ການເປັນປະທານຂອງທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ຈັດຂຶ້ນເມື່ອຕອນເຊົ້າ ຂອງວັນທີ 7 ສິງຫານີ້ ທີ່ສູນການຮ່ວມມືສາກົນ ແລະ ການຝຶກອົບ ຮົມ (ICTC). ໃນກອງປະຊຸມ, ທ່ານລັດ ຖະມົນຕີກະຊວງການຕ່າງປະ ເທດລາວ ໄດ້ຕາງໜ້າລັດຖະ ບານລາວ ລາຍງານສະພາບ ການແກ້ໄຂໄພພິບັດ, ຂໍ້ມູນ ການຊ່ວຍເຫຼືອຂອງສາກົນ ແລະ ມາດຕະການແກ້ໄຂບັນ ຫາໄລຍະສັ້ນ ແລະ ແຜນການ ໄລຍະຍາວ.

ທ່ານກ່າວວ່າ: ຈາກອຸປະຕິເຫດການແຕກຫັກ ຂອງເຂື່ອນກັ້ນນ້ຳເຊປຽນ-ເຊ ນ້ຳນ້ອຍ ເມື່ອຄືນວັນທີ 23 ກໍ ລະກົດຜ່ານມາ, ລັດຖະບານ ກໍໄດ້ປະກາດເອົາເຂດຖືກຜົນ ກະທົບເປັນເຂດໄພພິບັດລະ ດັບຊາດ ແລະ ນາຍົກລັດຖະ ມົນຕີ ກໍໄດ້ອອກຂໍ້ຕົກລົງວ່າ ດ້ວຍການແຕ່ງຕັ້ງຄະນະກຳ ມະການສະເພາະກິດແກ້ໄຂ ໄພພິບັດລະດັບຊາດຂຶ້ນ ໂດຍ ແມ່ນທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເປັນ ປະທານ ເພື່ອເປັນໃຈກາງໃນ ການປະສານສົມທົບກັບທຸກ ພາກສ່ວນທີ່ກ່ຽວຂ້ອງທັງສູນ ກາງ ແລະ ທ້ອງຖິ່ນ ໃນການ ແກ້ໄຂບັນຫາອຸທົກກະໄພທີ່ ເກີດຂຶ້ນ, ວາງແຜນການຊ່ວຍ ເຫຼືອບັນເທົາທຸກ ແລະ ຟື້ນຟູ ຊີວິດການເປັນຢູ່ຂອງປະຊາ ຊົນ ທີ່ໄດ້ຮັບຜົນກະທົບ. ທ່ານ ກ່າວຕື່ມອີກວ່າ: ໃນສະເພາະ ໜ້າ ຈະສຸມໃສ່ 4 ວຽກໃຫຍ່ຄື:

1. ສືບຕໍ່ຊອກຄົ້ນເອົາຜູ້ເສຍ ຊີວິດ ລວມທັງຜູ້ສູນຫາຍໃຫ້ ໄດ້ທັງໝົດ.

2. ເລັ່ງປັບປຸງ ພື້ນຖານໂຄງລ່າງ ເປັນຕົ້ນຂົວ, ເສັ້ນທາງດ້ວຍການສ້ອມແປງ ຫຼື ສ້າງໃໝ່ໃຫ້ສາມາດໃຊ້ ການໄດ້ຢ່າງສະດວກສະບາຍ.

3. ສະໜອງສະບຽງອາ ຫານທີ່ຈຳເປັນ, ເຄື່ອງອຸປະ ໂພກ, ບໍລິໂພກ ໃນສິ່ງຈຳເປັນ ໃຫ້ແກ່ຜູ້ຖືກຜົນກະທົບໃຫ້ພຽງ ພໍສຳລັບໄລຍະສັ້ນ ແລະ ໄລ ຍະຍາວນານ.

4. ປະກອບອຸ ປະກອນການແພດ ເພື່ອກວດ ສຸຂະພາບຂອງຜູ້ຖືກໄພພິບັດ ດ້ວຍຄວາມເປັນຫ່ວງເປັນໄຍ, ລວມທັງຕ້ອງມີລົດຂົນສົ່ງຄົນ ເຈັບ ປະຈຳຢູ່ແຕ່ລະສູນ.

ສຳ ລັບໄລຍະຍາວແມ່ນສຸມໃສ່ ຟື້ນຟູພື້ນທີ່ ທີ່ໄດ້ຮັບຜົນກະ ທົບ ເພື່ອເຮັດໃຫ້ເປັນບ່ອນທຳ ການຜະລິດ, ການກຳນົດສະ ຖານທີ່ ເພື່ອປຸກສ້າງບ້ານໃໝ່ ໃຫ້ແກ່ຜູ້ຖືກຜົນກະທົບ ແລະ ບັນຫາອື່ນໆ.
ໃນກອງປະຊຸມ, ບັນດາ ທູຕານຸທູດຕ່າງປະເທດຈຳ ນວນໜຶ່ງ ກໍໄດ້ມີການຊັກຖາມ ເພື່ອສະແດງເຖິງຄວາມເປັນ ຫ່ວງເປັນໄຍຂອງລັດຖະບານ ແລະ ອົງການຈັດຕັ້ງສາກົນຕໍ່ຜູ້ ທີ່ຖືກຜົນກະທົບ ແລະ ພ້ອມ ຈະໃຫ້ການຊ່ວຍເຫຼືອ.

ຕອນທ້າຍຂອງການຖະ ແຫຼງຂ່າວ, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມ ຂອບໃຈມາຍັງລັດຖະບານປະ ເທດເພື່ອນມິດ, ອົງການຈັດ ຕັ້ງສາກົນ ແລະ NGO ທີ່ໄດ້ ໃຫ້ການຊ່ວຍເຫຼືອລັດຖະບານ ລາວ ກໍຄືປະຊາຊົນຜູ້ທີ່ຖືກໄພ ພິບັດໃນຄັ້ງນີ້. ທ່ານກ່າວວ່າ: ການແກ້ໄຂໄພພິບັດໃນຄັ້ງນີ້ ບໍ່ແມ່ນວຽກງ່າຍ ແລະ ບໍ່ສາ ມາດແກ້ໄຂໄດ້ໃນໄລຍະສັ້ນ, ພວກເຮົາຍັງມີຄວາມຈຳເປັນ ຕ້ອງໄດ້ຮັບການຊ່ວຍເຫຼືອ ດ້ານວັດຖຸອຸປະກອນຕ່າງໆ ຈາກບັນ ດາປະເທດເພື່ອນມິດ, ອົງການຈັດຕັ້ງສາກົນ ແລະ ອົງການບໍ່ສັງກັດລັດຖະບານ ຕື່ມອີກ.

ຂ່າວ: ນສພ ປະຊາຊົນ

ຂ່າວສານອື່ນໆ