ກອງປະຊຸມລະດັບຊາດ ກ່ຽວກັບການຈັດຕັ້ງປະຕິບັດ ໂຄງການທົດລອງອາຊຽນ ສ້າງຄວາມເຂັ້ມແຂງໃນການສ້າງຕົວເມືອງອາຊຽນ

04-04-2018, 14:57 292

ໃນວັນທີ 4 ເມສາ 2018 ນີ້, ກົມສັງຄົມສົງເຄາະ ໂດຍຮ່ວມກັບ ແຂວງຫຼວງພະບາງ ແລະ ອົງການໄຈກາ (JICA) ໄດ້ໄຂກອງປະຊຸມລະດັບຊາດ ກ່ຽວກັບການຈັດຕັ້ງປະຕິບັດໂຄງການທົດລອງຂອງອາຊຽນ ໂຄງການສ້າງຕົວເມືອງ ໃຫ້ມີຄວາມປອດໄພຈາກໄພພິບັດ ແລະ ການປ່ຽນແປງດິນຟ້າອາກາດ  ຂື້ນທີ່ໂຮງແຮມຈິດຈະເລີນ, ເມືອງຫຼວງພະບາງ, ແຂວງຫຼວງພະບາງ. ກອງປະຊຸມດັ່ງກ່າວ ໂດຍການເປັນຄະນະປະທານ ຂອງທ່ານ ປະສົງ ວົງຄຳຈັນ ຫົວໜ້າກົມສັງຄົມສົງເຄາະ ກະຊວງ ຮສສ, ທ່ານ ສຸລິສັກ ພົມມາລີ ຫົວໜ້າຫ້ອງວ່າການແຂວງຫຼວງພະບາງ, ທ່ານ Shinichi FUKASAWA ຫົວໜ້າທິມງານໂຄງການ ອົງການໄຈກາ ແລະ ມີບັນດາ ທ່ານຫົວໜ້າພະແນກ, ຮອງພະແນກ ແລະ ວິຊາການ ຂອງພະແນກ  ແຮງງານ ແລະ ສະຫວັດດີການສັງຄົມ, ພະແນກໂຍທາທິການ ແລະ ຂົນສົ່ງຈາກ ແຂວງຈຳປາສັກ, ແຂວງຄຳມ່ວນ, ແຂວງບໍລິຄຳໄຊ, ແຂວງວຽງຈັນ, ແຂວງໄຊຍະບູລີ, ແຂວງອຸດົມໄຊ, ແຂວງຫຼວງນໍ້າທາ, ແຂວງຊຽງຂວາງ, ເມືອງຫຼວງພະບາງ, ຄະນະຊີ້ຈຳຈາກສູນກາງ, ຄະນະຮັບຜິດຊອບຂັ້ນແຂວງ ແຂວງຫຼວງພະບາງ (ຈາກບັນດາພະແນກການອ້ອມຂ້າງແຂວງ, ເມືອງຫຼວງພະບາງ) ແລະ ທິມງານອົງການໄຈກາ ໂດຍມີຜູ້ເຂົ້າຮ່ວມທັງໝົດ 52 ທ່ານ ຍິງ 8 ທ່ານ.

 

ກອງປະຊຸມດັ່ງກ່າວແມ່ນຜັນຂະຫຍາຍມາຈາກໂຄງການສ້າງຕົວເມືອງໃນອາຊຽນໃຫ້ມີຄວາມທົນທານຈາກໄພພິບັດ ແລະ ສະພາບດິນຟ້າອາກາດ (CN 18) ເຊິ່ງເປັນໂຄງການຮ່ວມມືລະຫວ່າງອາຊຽນ ຕາງໜ້າໂດຍຄະນະກຳມະການຄຸ້ມຄອງໄພພິບັດອາຊຽນ ກັບ ອົງການໄຈກາ ເພື່ອສ້າງໃຫ້ອາຊຽນສາມາດມີຄວາມເຂັ້ມແຂງໃນການຮັບມືກັບໄພພິບັດ. ໂຄງການໄດ້ພັດທະນາເຄື່ອງມືໃນການປະເມີນຄວາມສາມາດ ແລະ ຄວາມສ່ຽງຂອງຕົວເມືອງໃນການຮັບມືກັບໄພພິບັດ ເຊິ່ງຕິດພັນກັບການພັດທະນາຕົວເມືອງ ເຊິ່ງອາຊຽນແມ່ນໄດ້ຄັດເລືອກເອົາ 2​ ຕົວເມືອງໃນອາຊຽນ ເພື່ອຈັດຕັ້ງປະຕິບັດໂຄງການທົດລອງໃນການສ້າງຕົວເມືອງໃຫ້ມີຄວາມທົນທານຕໍ່ໄພພິບັດ ແລະ ການປ່ຽນແປງດິນຟ້າອາກາດ ນີ້ ໂດຍໄດ້ເລືອກເອົາ ເມືອງຫຼວງພະບາງ, ແຂວງຫຼວງພະບາງ, ສປປ ລາວ ແລະ ເມືອງເດັນປາຊາ, ປະເທດອິນໂດເນເຊຍ ເປັນເມືອງທົດລອງຂອງອາຊຽນ ເຊິ່ງມີໄລຍະໂຄງການ 5 ເດືອນ.

 

ຜ່ານການຈັດຕັ້ງປະຕິບັດກິດຈະກຳໂຄງການ  ໃນໄລຍະເວລາ 5 ເດືອນ, ທິມງານວິຊາການຂອງອົງການໄຈກາ JICA ໂດຍຮ່ວມກັບຄະນະຊີ້ນຳຂັ້ນສູນກາງ ແລະ ຄະນະຈັດຕັ້ງປະຕິບັດຂັ້ນແຂວງ ໄດ້ເຮັດສຳເລັດການຈັດຕັ້ງປະຕິບັນດາກິດຈະກຳ ແລະ ສາມາດສ້າງແຜນການປະຕິບັດງານຫຼຸດຜ່ອນຄວາມສ່ຽງໄພພິບັດ ແລະ ແຜນການປະຕິບັດງານພັດທະນາ ແລະ ການວາງແຜນຕົວເມືອງ ເມືອງຫຼວງພະບາງ ແລະ ໄດ້ນຳຜົນຂອງແຜນມານຳສະເໜີຕໍ່ກອງປະຊຸມລະດັບຊາດ ເພື່ອແລກປ່ຽນໃຫ້ບັນດາແຂວງອ້ອມຂ້າງໄດ້ຖອດຖອນບົດຮຽນເພື່ອນຳເອົາບັນດາເຄື່ອງມື ໃນໂຄງການທົດລອງຂອງອາຊຽນນີ້ ໄປພິຈາລະນາໃນການຈັດຕັ້ງປະຕິບັດໃນແຂວງຂອງຕົນ.

 

ພາບ-ຂ່າວ: ສົມບັດ ດວງສະຫວັນ

ຂ່າວສານອື່ນໆ