ຄັກສຸດ ຈີນພັດທະນາລົດໄຟແບບໃໝ່ ໃຊ້ລາງແບບແຂວນ ກຽມພັດທະນາເພື່ອສົ່ງອອກ

17-01-2018, 15:48 318

ສຳນັກຂ່າວຊິນຫົວຂອງຈີນລາຍງານວ່າ ກຸ່ມ​ບໍລິສັດ​ ຈົ່ງ​ຖັງ​ ສ​ະກາຍ​ເຣລ​ເວ​​ ຈຳ​ກັດ​ ຜູ້​ຜະລິດ​ລົດໄຟ​ຟ້າ​ລະບົບ​ແຂວນ​ທີ່​ໃຊ້​ພະລັງ​ງານ​ຈາກ​ແບັດ​ເຕີ​ຣີ​ລິ​ທຽມ​ ຮ່ວມ​ກັບ​ກຸ່ມ​ບໍລິສັດ​ຂອງ​ລັດຖະບານ​ຈີນ​ໃນ​ປີ​ 2016 ລາຍ​ງານ​ວ່າ​ ລົດໄຟ​ດັ່ງ​ກ່າວ​ຢູ່ໃນ​ລະຫວ່າງ​ການ​ພັດທະນາ​ເພື່ອ​ນຳ​ມາ​ໃຊ້​ໃນ​ທາງການຄ້າ​ ໃນແຂວງ​ເສ​ສວນ​ ພາກຕາເວັນ​ຕົກ​ສ່ຽງ​ໃຕ້​ຂອງ​ຈີນ.​

ທັງ​ນີ້​ ທ້າວ ​ຖັງ​ຕົ້ງ​ ປະ​ທານ​ບໍລິສັດ​ໄດ້​ໃຫ້​ຂໍ້​ມູນ​ວ່າ​ ລົດໄຟ​ດັ່ງ​ກ່າວ​ຜ່ານ​ການ​ທົດສອບ​ເທິງ​ເສັ້ນ​ທາງ​ລົດໄຟ​ມາ​ແລ້ວ​ກວ່າ​ 18,000 ກິ​ໂລ​ແມັດ.​ ນອກ​ຈາກ​ນີ້​ ບໍລິສັດ​​ຍັງ​ໄດ້​ດຳ​ເນີນ​ການ​ພັດທະນາ​ມາດຕະຖານ​ດ້ານ​ເຕັກ​ນິກ​ອີກ​ຫຼວງ​ຫຼາຍ.​

ເມື່ອ​ວັນ​ຈັນ​ທີ່​ຜ່ານມາ​ (15 ມັງກອນ​ 2018) ຄະນະ​ຜູ້​ແທນ​ຈາກ​ປະເທດ​ກຳ​ປູ​ເຈຍ​ໄດ້​ເດີນທາງ​ໄປ​ຢ້ຽມຢາມ​ເສີງ​ຕູ.​ ທ່ານ​ Seang Bunleang ສະມາຊິກ​ຄົນ​ໜຶ່ງ​ຂອງ​ຄະນະ​ຜູ້​ແທນ​ໄດ້​ກ່າວ​ສະແດງ​ຄວາມ​ຫວັງ​ວ່າ​ ວິທີ​ການ​ຂົນ​ສົ່ງ​ແບບ​ໃໝ່​ເຊັ່ນ​ນີ້​ຈະ​ຖືກ​ນຳ​ເຂົ້າ​ມາ​ໃນ​ພະນົ​ມ​ເປນ​ ເມືອງ​ຫຼວງ​ຂອງ​ປະເທດ​ກຳປູເຈຍ.​

ດ້ານ ທ່ານ ​ຖັງ ​ກໍ​ໃຫ້​ຂໍ້​ມູບ​ເພິ່ມເຕິມ​ວ່າ​ ຕົນເອງ​ກຳ​ລັງ​ເຮັດວຽກ​ຮ່ວມ​ກັບ​ຫຸ້ນ​ສ່ວນ​ກຳປູເຈຍ​ກ່ຽວກັບ​ການ​ສົ່ງ​ອອກ​ລະບົບລາງ​ແຂວນ​ຢູ່ໃນ​ຂະນະ​ນີ້​ ໂດຍ​ມີ​ນັກ​ທຸລະກິດ​ຈາກ​ປະເທດ​ອື່ນ​ໆ​ ເຊັ່ນ: ​ສະ​ຫະລັດ​ອາ​ເມ​ຣິ​ກາ ​ແລະ ​ອິ​ຕາ​ລີ​ ທີ່​ສະແດງ​ຄວາມ​ສົນ​ໃຈ ​ຫຼື ​ຄວາມ​ຕັ້ງ​ໃຈ​ທີ່​ຈະໃຫ້​ຄວາມ​ຮ່ວມ​ມື​ໃນ​ໂຄງ​ການ​ດ້ວຍ​ເຊັ່ນ​ກັນ.​

ລົດໄຟ​ຟ້າ​ເຊິ່ງ​ຢູ່​ລະຫວ່າງ​ການ​ດຳ​ເນີນ​ງານ​ດັ່ງ​ກ່າວ​ ຢູ່​ສູງ​ເໜືອ​ພື້ນ​ດິນ​ 5 ແມັດ​ ສາມາດ​ແລ່ນ​ໄດ້​ດ້ວຍ​ຄວາມ​ໄວ​ສູງ​ເຖິງ​ 65 ກິ​ໂລ​ແມັດ​ຕໍ່​ຊົ່ວ​ໂມງ​ ແລະ​ ຖື​ເປັນ​ຕົວ​ເລືອກ​ທີ່​ດີ​ໃນ​ການ​ຂົນ​ສົ່ງ​ທີ່​ສາມາດ​ຊ່ວຍ​ແກ້​ບັນຫາ​ການ​ຈະລາຈອນ​ຕິດ​ຂັດ ​ແລະ ​ການ​ເກີດ​ມົນລະ​ພາ​ວະ​ໃນ​ຈຸດ​ຊົມ​ວິວ​ຕ່າງ​ໆ​ໄດ້​.

ຂ່າວສານອື່ນໆ