ສອວ ພົບປະສ້າງສັນ ເພື່ອຊົມເຊີຍວັນສາກົນຜູ້ອາຍຸສູງ

03-10-2017, 12:31 31

ສະມາຄົມ​ຜູ້​ອາຍຸ​ສູງ ນະຄອນຫຼວງ​ວຽງ​ຈັນ (ສອວ) ຈັດ​ງານພົບ​ປະ​ສ້າງສັນ​ປະຈຳ​ເດືອນ​ກັນຍາ ແລະ ຊົມເຊີຍ​ວັນ​ສາກົນ​ຜູ້ອາຍຸ​ສູງ (1 ຕຸລາ) ຂຶ້ນ​ວັນ​ທີ 1 ຕຸລາ 2017 ທີ່​ພັດ​ຕະ​ຄານ​ແມ່ຂອງ ມີ​ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງຈັນ ທ່ານ ສົມພົງ ມົງ​ຄົນ​ວິໄລ ປະທານ ສອວ ພ້ອມ​ດ້ວຍ​ບັນດາລັດຖະມົນຕີ ຄະນະ​ບໍລິຫານ​ງານສະມາຊິກ ສອວ ແລະ ແຂກ​ຖືກເຊີນ​ເຂົ້າ​ຮ່ວມ.

ທ່ານ ສົມພົງ ມົງ​ຄົນ​ວິໄລ ກ່າວວ່າ: ອົງການ​ສະຫະ​ປະຊາ​ຊາດ ໄດ້​ປະກາດ​ຮັບຮອງ​ເອົາ​ວັນ​ສາກົນ​ຜູ້​ອາຍຸ​ສູງ ວັນ​ທີ 14 ທັນວາ 1990 ແລະ ໄດ້​ຮັບຮອງ​ເອົາ​ມະຕິ​ຕ່າງໆ​ປີ 1991 1992 ແລະ 2000 ແລະ ໄດ້​ເຊື້ອ​ເຊີນ​ໃຫ້​ປະເທດ​ສະມາຊິກ​ທົ່ວ​ໂລກ ​ເອົາໃຈໃສ່ ແລະ ໃຫ້​ຄວາມ​ສຳຄັນ​ຕໍ່​ຜູ້ອາຍຸ​ສູງ​ໃນ​ປະເທດ​ຂອງ​ຕົນ ດ້ວຍລະບົບ​ນິຕິ​ກຳ ແລະ ນະໂຍບາຍຕ່າງໆ ລວມ​ທັງ​ໂຄງ​ປະກອບ ແລະ ການຈັດຕັ້ງ​ພື້ນຖານ​ໂຄງລ່າງ ເຊັ່ນ: ເຮືອນ​ພັກ​ອາໄສ ສວນ​ພັກຜ່ອນ ສະໂມສອນ ຫໍ​ສະໝຸດ ແລະ ອື່ນໆ​ໃຫ້​ຜູ້​ອາຍຸ​ສູງນຳ​ໃຊ້ ໃນ​ນີ້ ຫຼາຍ​ປະເທດ​ໄດ້​ສ້າງນະໂຍບາຍ​ໃຫ້​ຄວາມ​ສະດວກ ຫຼຸດ​ລາຄາ​ການ​ບໍລິການ​ໃຫ້​ຜູ້​ອາຍຸ​ສູງ ເປັນຕົ້ນ ​ຄ່າ​ໂດຍສານ ການປິ່ນປົວ ການ​ພັກຜ່ອນ ແລະ ອື່ນໆ ຈຶ່ງ​ເຮັດ​ໃຫ້ການ​ສະຫຼອງ​ວັນ​ສາກົນ​ຜູ້​ອາຍຸ​ສູງ​ຢູ່​ບັນດາ​ປະເທດ​ທົ່ວ ໂລກ​ມີ​ສີສັນ ຂະໜາດ ແລະ ຮູບການ​ຕ່າງ​ກັນ​ໄປ​ຕາມ​ລະດັບ​ເສດຖະ​ກິດ-ສັງຄົມ ແລະ ລະບົບ​ຮອງຮັບ​ແຕ່​ລະ​ປະເທດ ສຳລັບ​ລາວເຮົາ​ຄວາມ​ຕື່ນ​ຕົວ ແລະ ມີ​ສະຕິ​ຕໍ່ຜູ້​ອາຍຸ​ສູງ​ໄດ້​ເລີ່ມ​ຂຶ້ນ​ຫຼັງ​ຈາກ​ມີດຳລັດ​ເລກ​ທີ 156/​ນຍ ລົງ​ວັນ​ທີ 14 ຕຸລາ 2004 ເຊິ່ງ​ໄດ້​ແຕ່ງຕັ້ງຄະນະ​ກຳມະການ​ແຫ່ງ​ຊາດ ເພື່ອ​ຄົນ​ພິການ ແລະ ຜູ້​ອາຍຸ​ສູງຂຶ້ນ​ໃນ​ປີ​ດຽວ​ກັນ ສຳລັບ​ອົງການຈັດ​ຕັ້ງ​ສັງຄົມ​ຂອງ​ຜູ້​ອາຍຸ​ສູງ​ທຳອິດ​ຂອງ​ລາວ​ ໄດ້​ສ້າງຕັ້ງ​ຂຶ້ນປີ 2011 ຊື່ວ່າ: “ສະມາຄົມ​ຜູ້​ອາຍຸສູງ ນະຄອນຫຼວງ​ວຽງ​ຈັນ”.

ກິດຈະກຳ ແລະ ການ​ເຄື່ອນໄຫວຂອງ ສອວ ແມ່ນ​ການ​ພົບປະ​ສ້າງສັນ​ປະຈຳ​ເດືອນ ເຊິ່ງ​ເປັນໂອກາດ​ສຳຄັນ​ເພື່ອ​ໃຫ້​ສະມາຊິກ ໄດ້​ພົບ​ປະ​ໂອ້​ລົມ​ກັນຟັງ​ການ​ໂອ້ລົມ​ຕ່າງໆ​ຈາກ​ພາກ​ລັດ ເອກະຊົນ ຮ່ວມ​ຮັບ​ປະທານ​ອາຫານ ກິດຈະກຳ​ມ່ວນຊື່ນ​ນຳ​ກັນ ກິດ​ຈະກຳ​ອອກກຳລັງ​ກາຍ ແລະ ອື່ນໆ ດ້ານ​ສະຫວັດດີ​ການ​ແມ່ນ​ໄດ້​ມີການ​ຢ້ຽມຢາມ​ຜູ້​ເຈັບ​ປ່ວຍ ລະດົມ​ເງິນ​ກິນ​ທານ​ເວລາ​ເສຍ​ຊີວິດ ພິເສດ​ຍັງ​ໄດ້​ໃຫ້ການ​ຊ່ວຍເຫຼືອສັງຄົມ ໂດຍ​ສະເພາະ ໂຮງຮຽນອຸປະກອນ​ການ​ຮຽນ ຕຳລາ ແລະ ເຄື່ອງນຸ່ງ​ຫົ່ມ ປັດຈຸບັນ ວຽກ​ງານຂອງ ສອວ ມີ​ຄວາມ​ກ້າວໜ້າຢ່າງ​ຕໍ່​ເນື່ອງ ສະມາຊິກ​ໄດ້​ເພີ່ມຂຶ້ນ​ຈາກ 35 ຄົນ ມາ​ເປັນ 1.100 ກວ່າ​ຄົນ ເຊິ່ງ​ລ້ວນ​ແລ້ວແຕ່​ມີຄວາມ​ອຸ່ນ​ອ່ຽນ ແລະ ປະກອບສ່ວນ​ໃນ​ທຸກ​ວຽກ​ງານ ສຳລັບແຜນການ​ຕໍ່ໜ້າ ສອວ ຢາກ​ມີ​ສຳນັກ​ງານ​ເຮັດ​ວຽກ ສະໂມສອນ ແລະ ສວນ​ເພື່ອ​ອອກກຳລັງ​ກາຍ ເຜີຍແຜ່​ນະໂຍບາຍ ແລະ ຫຼັກການ​ພື້ນຖານ​ກ່ຽວ​ກັບ​ຜູ້​ອາຍຸ​ສູງໃຫ້​ທົ່ວ​ເຖິງ ເກັບ​ກຳ​ສະຕິ​ດ້ານ​ຊີວິດ​ການ​ເປັນ​ຢູ່ເສດຖະກິດ-ສັງຄົມ ໂດຍ​ສະເພາະ ຜູ້​ດ້ອຍ​ໂອກາດ ເພື່ອ​ຊ່ວຍ​ໃຫ້​ເຂົາເຈົ້າ​ເພິ່ງຕົນ​ເອງ​ໄດ້.

ໜັງສືພິມວຽງຈັນໃໝ່

ຂ່າວສານອື່ນໆ