ທາບທາມ ຮ່າງກົດໝາຍ ວ່າດ້ວຍ ການປະກັນສຸຂະພາບ

21-03-2018, 14:20 102

ຂປລ. ​ໃນ​ ວັນ​ທີ 20 ມີນາ 2018 ທີ່​ນະຄອນຫລວງ​ວຽງ​ຈັນ, ກະຊວງ ສາທາລະນະ​ສຸກ ​ໄດ້​ຈັດ​ກອງ​ປະຊຸມ ຄົ້ນຄວ້າພິຈາລະນາ ເພື່ອ​ທາ​ບທາມ ຮ່າງ​ກົດໝາຍ ວ່າ​ດ້ວຍ​ ການ​ປະກັນ​ສຸຂະພາບຂຶ້ນ,  ​ໂດ​ຍການ ​ເປັນ​ປະທານ​ ຂອງ ​ທ່ານ ພູທອນ ​ເມືອງ​ປາກ ຮອງ​ລັດຖະມົນຕີ ກະຊວງ ສາທາລະນະ​ສຸກ, ທ່ານ ຄຳແກ້ວ ສານ​ບຸນຄຸນ​ໄຊ, ມີບັນດາຄະນະຮັບຜິດຊອບ ຮ່າງກົດໝາຍ ເຂົ້າຮ່ວມ.

ຈຸດປະສົງ​ ຂອງ​ການ​ສ້າງ​ຮ່າງ​ກົດໝາຍ ວ່າ​ດ້ວຍ​ ການ​ປະກັນ​ສຸຂະພາບ​ ແມ່ນ​ ເພື່ອ​ເຮັດ​ໃຫ້​ວຽກ ​ປະ​ກັນ​ສຸຂະພາບ ​ໄດ້​ຮັບ​ການ​ຄຸ້ມ​ຄອງ ດ້ວຍ​ກົດໝາຍ ຕາມ​ແນວທາງ​ ນະ​ໂຍບາຍ​ ຂອງ​ພັກ ກ່ຽວ​ກັບ​ການ​ ສ້າງ​ລັດ​ຄຸ້ມ​ຄອງ​ ດ້ວຍ​ກົດໝາຍ, ການ​ເຊື່ອມ​ໂຍງ​ ກັບ​ສາກົນ ​ແລະ ການ​ຮ່ວມ​ມື​ລະຫວ່າງ​ ບັນດາ​ປະ​ເທດ​ ໃນ​ພາກ​ພື້ນ ​ແລະ ​ໃນ​ໂລກ, ​ເພື່ອ​ ເຮັດ​ໃຫ້ ການ​ຄຸ້ມ​ຄອງ ​ແລະ ການ​ພັດທະນາ ວຽກ​ງານ ​ປະກັນ​ສຸຂະພາບ ມີ​ປະສິດທິພາບ ​ແລະ ປະສິດທິ​ຜົນ, ​ແນ່​​ໃສ່​ ປົກ​ປ້ອງ​ສຸຂະພາບ, ຊີວິດ ​ແລະ ຊັບ​ສິນ​ ຂອງ​ ປະຊາຊົນ​ບັນ​ດາ​ເຜົ່າ ​ເປັນ​ຕົ້ນ​ ປະຊາຊົນ ​ຜູ້​ທີ່​ມີ​ລາຍ​ຮັບ​ໜ້ອຍ  ຈະ​ບໍ່​ສາມາດ​ ຈ່າຍ​ຍ້ອນ​ຄ່າ​ໃຊ້​ຈ່າຍ​ ປິ່ນປົວ​ທີ່​ແພງ. ນອກຈາກ​ນີ້, ກໍ​ເພື່ອ​ ເຮັດ​ໃຫ້ການ​ເຄື່ອນ​ໄຫວ ວຽກ​ງານ​ ປະກັນ​ສຸຂະພາບ ​ໄດ້​ຮັບ​ການຈັດ​ຕັ້ງ​ ປະຕິບັດ​ ຢ່າງ​ທົ່ວ​ເຖິງ, ​ເປັນ​ລະບົບ, ຕໍ່​ເນື່ອງ ​ແລະ ຍືນ​ຍົງ, ພ້ອມ​​ເປັນ​ບ່ອນ​ອີງ​ ໃຫ້​ແກ່​ ຂະ​ແໜງ​ ສາທາລະນະ​ສຸກ ​ແລະ ຂະ​ແໜງ ​ການ ​ອື່ນ​ທີ່​ກ່ຽວ​ຂ້ອງ ​ໃນ​ການ ​ປະສານ​ສົມທົບ, ການ​ມີ​ສ່ວນ​ຮ່ວມ ​ແລະ ​ເປັນ​ເຈົ້າ​ການ ຂອງ​ທຸກ​ພາກສ່ວນ ​ໃນ​ສັງຄົມ ຮັບປະກັນ​ ໃຫ້​ພົນລະ​ເມືອງ ​ລາວ​ທຸກ​ຄົນ  ທີ່​ກຳລັງ​ດຳລົງ​ຊີວິດ ​ຢູ່​ໃນ ສປປ ລາວ, ​ໂດຍ​ ບໍ່​ຈຳ​ແນ​ກຊົນ​ເຜົ່າ, ​ເພດ, ​ໄວ, ສາດສະໜາ, ຖານະ​ທາງ​ດ້ານ​ເສດຖະກິດ, ສັງຄົມ ລ້ວນ​ແຕ່​ມີ​ສິດ ໄດ້​ຮັບ​ການ ​ປະກັນ​ສຸຂະພາບ, ຂໍ້​ມູນ-​ຂ່າວສານ, ການ​ແນະນຳ ​ກ່ຽວ​ກັບ​ ການ​ປະກັນ ​ສຸຂະພາບ, ຜົນ​ປະ​ໂຫຍ​ດ ​ແລະ ພັນທະ​ຂອງ​ຕົນ  ​ຕໍ່​ວຽກ​ງານ​ປະກັນ​ສຸຂະພາບ.

​ທ່ານ ພູທອນ ​ເມືອງ​ປາກ ກ່າວ​ວ່າ: ໃນ​ໄລຍະ​ຜ່ານມາ ສປປ ລາວ ມີ​ພຽງ​ ການຈັດ​ຕັ້ງ​ປະຕິ ບັດກົດໝາຍ ​ວ່າ​ດ້ວຍ ການ​ປະກັນ​ສັງຄົມ, ກົດໝາຍ ​ວ່າ​ດ້ວຍ​ການ​ປະກັນ​ໄພ, ດຳລັດ​ວ່າ​ດ້ວຍ  ​ກອງ​ທຶນ​ປະກັນ​ສຸຂະພາບ ​ແຫ່ງ​ຊາດ ​ແລະ ລະບຽບ​ການ​ ຈຳນວນ​ໜຶ່ງ​ ກ່ຽວ​ກັບ​ ວຽກ​ງານ​ສຸຂະພາບ, ຊຶ່ງ​ ບໍ່​ມີ​ກົດໝາຍ​ ສະ​ເພາະ ​ເຈາະ​ຈົງ ​ໃຫ້​ເປັນ​ບ່ອນ​ອີງ​ ໃນ​ການຈັດ​ຕັງ​ ປະຕິບັດ ​ວຽກ​ງານ​ດັ່ງກ່າວ ​ເປັນ​ຕົ້ນ​ ການ​ປະກັນ ​ສຸຂະພາບ ທົ່ວ​ປວງ​ຊົນ ​ເພື່ອ​ໃຫ້​ມີ​ ຄວາມ​ເຂັ້ມ​ແຂງ ​ແລະ ມີ​ຄວາມ​ຍືນ​ຍົງ.

ທ່ານ​ ກ່າວ​ຕື່ມ​ວ່າ: ການຈັດ​ຕັ້ງ​ ປະຕິບັດ ​ແລະ ການ​ເຄື່ອນ​ໄຫວ ​ວຽກ​ງານ​ ປະກັນ​ສຸຂະພາບ  ຍັງ​ບໍ່​ທັນ​ລວມສູນ, ກະ​ແຈກ​ກະຈາຍ, ກົນ​ໄກ​ ການ​ເກັບ​ເງິນ, ການ​ຈ່າຍ ​ເງິນ​ປະກັນ ​ສຸຂະພາບ ​ໃຫ້​ສະຖານ​ທີ່ ​ບໍລິການ​ປິ່ນປົວ ມີ​ ຄວາມ​ແຕກ​ຕ່າງ​ກັນ  ​ເຮັດ​ໃຫ້ການ​ຄຸ້ມ​ຄອງ​ ກອງ​ທຶນ​ປະກັນ​ສຸຂະພາບ ​ຕ່າງໆ ​ພົບ​ຄວາມ​ຫຍຸ້ງຍາກ ໃນ​ສະຖານ​ທີ່ ​ການ​ປິ່ນປົວ. ປັດຈຸ​ບັນ ສປປ ລາວ ​ໄດ້​ຈັດ​ຕັ້ງ​ປະຕິບັດ 3 ລະບົບ​ ປະກັນ​ສຸຂະພາບ ​ຄື: ການ​ອຸດ​ໜູນ​ ປະກັນ​ສຸຂະພາບ ຂອງ​ອົງການ​ ປະກັນ​ສັງຄົມ​ແຫ່ງ​ຊາດ, ການ​ປະກັນ​ສຸຂະພາບ​ ພາກປະຊາຊົນ ​ແລະ ​ການ​ປະກັນ​ສຸຂະພາບ ​ພາກເອກະ​ຊົນ, ຊຶ່ງກອງ​ທຶນ​ ປະກັນ​ສຸຂະພາບ​ ແຫ່ງ​ຊາດ ​ໄດ້​ປົກ​ຄຸມ 17 ​ແຂວງ ຍົກ​ເວັ້ນ ນະຄອນຫລວງ.

ຂ່າວ: ມະນີ​ທອນ


http://kpl.gov.la/detail.aspx?id=32610

ຂ່າວສານອື່ນໆ