ຮອງນາຍົກ ລົງກວດກາການກໍ່ສ້າງສູນພັກຊົ່ວຄາວ ຜູ້ປະສົບໄພນ້ຳຖ້ວມ ຢູ່ເມືອງສະໜາມໄຊ

20-08-2018, 14:40 168

ຂປລ.ໃນວັນທີ 18 ສິງຫາ 2018 ນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະສະເພາະກິດແກ້ໄຂໄພພິບັດລະດັບຊາດ, ໄດ້ລົງຕິດຕາມກວດກາຄວາມຄືບໜ້າການກໍ່ສ້າງສູນພັກຊົ່ວຄາວ ເພື່ອຮອງຮັບປະຊາຊົນທີ່ຖືກຜົນກະທົບຈາກໄພນ້ຳຖ້ວມ ຢູ່ເມືອງສະຫນາມໄຊ ແຂວງອັດຕະປື ຢູ່ບໍລິເວນເດີ່ນໂຮງຮຽນປະຖົມບ້ານຫາດຍາວ ຫ່າງຈາກເທດສະບານເມືອງ ປະມານ 1 ກິໂລແມັດ. ໂດຍແມ່ນທຶນຂອງບໍລິສັດ ເອັສເຄ(SK) ສ ເກົາຫລີ ແລະ ບໍລິສັດຖືຫຸ້ນ ເຈົ້າຂອງໂຄງການກໍ່ສ້າງເຂື່ອນໄຟຟ້າເຊປຽນ-ເຊນໍ້ານ້ອຍ. ເຮືອນພັກຊົ່ວຄາວ ເປັນອາຄານຊັ້ນດຽວ, ໂຄງເຫລັກ, ມຸງດ້ວຍສັງກະສີ, ມີທັງໝົດ 14 ຫລັງ, ຫລັງໜຶ່ງມີ 10 ຫ້ອງ ລວມ 140 ຫ້ອງ, ມາຮອດປັດຈຸບັນສຳເລັດແລ້ວເກືອບ 60% ແລະ ກຳລັງຂຸ້ນຂ້ຽວກໍ່ສ້າງໃຫ້ສຳເລັດໂດຍໄວ.

ໃນໂອກາດນີ້, ທ່ານ ຮອງນາຍົກລັດຖະມົນຕີ ໄດ້ເນັ້ນໃຫ້ພະນັກງານວິຊາການກໍ່ສ້າງ ໃຫ້ເອົາໃຈໃສ່ໃນການກໍ່ສ້າງໃຫ້ສຳເລັດຕາມແຜນ, ພ້ອມທັງແນະນຳໃນການຕິດຕັ້ງລະບົບໄຟຟ້າ ໃຫ້ຮັບປະກັນຄວາມປອດໄພ ແລະ ຊົມໃຊ້ໄດ້ຍາວນານ, ພ້ອມກັນນີ້ ຕ້ອງມີລະບົບການຮັກສາສິ່ງແວດລ້ອມທີ່ດີ, ບ່ອນຮອງຮັບຂີ້ເຫຍື້ອ ແລະ ອອກແບບເສີມຫ້ອງນ້ຳໃຫ້ມີມາດຕະຖານ, ເນື່ອງຈາກປະຊາຊົນທີ່ຈະເຂົ້າມາພັກມີຈຳນວນຫລາຍເຊິ່ງອາດຈະບໍ່ພຽງພໍຕໍ່ຄວາມຕ້ອງການ. ຈາກນັ້ນ, ທ່ານຮອງນາຍົກລັດຖະມົນຕີ ໄດ້ໄປຢ້ຽມຢາມຊີ້ນຳໜ່ວຍກູ້ໄພກອງທັບ ທີ່ເຄື່ອນຍ້າຍກຳລັງພົນອອກມາຕັ້ງຫລັກຊົ່ວຄາວ ຢູ່ກອງບັນຊາການທະຫານເມືອງ ເນື່ອງຈາກເຂດປະສົບໄພຖືກນ້ຳຖ້ວມຮອບສອງ. ພ້ອມນີ້ ໄດ້ສືບຕໍ່ຢ້ຽມຢາມໂຮງໝໍເມືອງສະໜາມໄຊ ເຊິ່ງເຫັນວ່າມີປະຊາຊົນໄປບໍລິການກວດສຸຂະພາບ ແລະ ຮັບການປິ່ນພະຍາດ ຈຳນວນຫລາຍສົມຄວນ. ສະນັ້ນ, ຈຶ່ງຈຳເປັນຕ້ອງໄດ້ນຳທີມແພດ-ໝໍ ຈາກສູນກາງລົງມາເພີ່ມ, ລວມທັງອຸປະກອນການແພດ ແລະ ຢາປົວພະຍາດນຳອີກ ເພື່ອເຝົ້າລະວັງການລະບາດພະຍາດຕ່າງໆ ທີ່ອາດເກີດຂຶ້ນໃນຕໍ່ໜ້າ. ທັງນີ້ແນໃສ່ເຮັດປະຊາຊົນ ແລະ ຜູ້ປະສົບໄພ ເມືອງສະໜາມໄຊ ໄດ້ຮັບການເບິ່ງແຍງ ແລະ ເຂົ້າເຖິງສາທາລະນະສຸກຂັ້ນຕົ້ນເປັນຢ່າງດີ

ທ່ານ ບຸນໂຮມ ພົມມະສານ ເຈົ້າເມືອງສະໜາມໄຊ ໃຫ້ຮູ້ວ່າ: ນອກຈາກການເລັ່ງມືການກໍ່ສ້າງ ສູນພັກຊົ່ວຄາວ ເພື່ອໃຫ້ຊາຊົນຜູ້ຖືກຜົນກະທົບໄດ້ອາໄສຢູ່ໂດຍໄວແລ້ວ ຍັງມີການວາງແຜນຈັດສັນທີ່ຢູ່ອາໄສຖາວອນ ເພື່ອເປັນການຟື້ນຟູຊ່ວຍເຫລືອເບິ່ງແຍງຊີວິດການເປັນຢູ່ຂອງປະຊາຊົນ ໃຫ້ດີຂຶ້ນຢ່າງຕໍ່ເນື່ອງ. ມາຮອດປັດຈຸບັນ ທາງພາກສ່ວນກຽວຂ້ອງໄດ້ສຳເລັດການສຳຫລວດພື້ນທີ່ ກໍ່ສ້າງທີ່ຢູ່ອາໄສແບບຖາວອນ ແລະ ໄດ້ກຽມການບຸກເບີກ ແຕ່ໄລຍະນີ້ສະພາບດິນຟ້າອາກາດບໍ່ອຳນວຍ ເພາະເປັນລະດູຝົນ, ພາຫະນະກົນຈັກບໍ່ສາມາດເຂົ້າມາໄດ້ ຈຶ່ງໄດ້ແກ່ຍາວໄປຕື່ມອີກ. ຢ່າງໃດກໍຕາມ ເມື່ອອາກາດອຳນວຍ ການກໍ່ສ້າງເຮືອນພັກຊົ່ວຄາວ, ການບຸກເບີກພື້ນທີ່, ການປັບປຸງສອ້ມແປງເສັ້ນທາງ, ການຊອກຄົ້ນຜູ້ສູນຫາຍ ແລະ ອື່ນໆ ກໍຈະດຳເນີນຢ່າງເຄັ່ງຮອນຕໍ່ໄປ. ເພື່ອໃຫ້ປະຊາຊົນຜູ້ປະສົບໄພ ໄດ້ເຄື່ອນຍ້າຍອອກຈາກສະຖານທີ່ຕ່າງໆ ຢູ່ເມືອງສະໜາມໄຊ ເນື່ອງຈາກສູນພັກຊົ່ວຄາວຫລາຍແຫ່ງ ຕັ້ງຢູ່ໂຮງຮຽນ ແລະ ສະຖານທີ່ສາທາລະນະ ເຊິ່ງໃນຂະນະນີ້ແມ່ນຮອດໄລຍະການກະກຽມເປີດສົກຮຽນໃໝ່

ຂ່າວສານອື່ນໆ