ຫົວເຫວີຍມອບອຸປະກອນຈັດກອງປະຊຸມທາງໄກໃຫ້ລັດຖະບານເພື່ອຊີ້ນໍາວຽກງານການກູ້ໄພ

17-08-2018, 15:51 191

ຂປລ. ໃນວັນທີ 17 ສິງຫາ 2018, ບໍລິສັດ ຫົວເຫວີຍ ເທັກໂນໂລຢີ (ລາວ) ຈຳກັດຜູ້ດຽວ ໄດ້ມອບລະບົບອຸປະກອນສຳລັບຈັດກອງປະຊຸມທາງໄກ (video conference) ລວມມູນຄ່າ 500 ລ້ານກີບ ໃຫ້ລັດຖະບານລາວ ເພື່ອອໍານວຍຄວາມສະດວກໃນການຊີ້ນໍາວຽກງານການກູ້ໄພຢູ່ເມືອງ ສະໜາມໄຊ, ແຂວງ ອັດຕະປື.
ອຸປະກອນດັ່ງກ່າວໄດ້ມອບໂດຍ ທ່ານ ມາກ ຫວັງ (Mark Wang) ຜູ້ອຳນວຍການໃຫຍ່ບໍລິສັດ ຫົວເຫວີຍ ເທັກໂນໂລຢີ (ລາວ) ຈຳກັດຜູ້ດຽວ ແລະ ກ່າວຮັບໂດຍ ທ່ານ ສົມ​ກຽດ ພະ​ສີ ຫົວໜ້າ​ກົມ​ປະຊາ...ສຳພັນ ຫ້ອງວ່າການສໍານັກງານນາຍົກລັດຖະມົນຕີີ ຕາງໜ້າໃຫ້ລັດຖະບານລາວ.
ລະບົບອຸປະກອນກອງປະຊຸມທາງໄກດັ່ງກ່າວ ຈະໄດ້ຕິດຕັ້ງຢູ່ຫ້ອງວ່າການສໍານັກງານນາຍົກລັດຖະມົນຕີ 2 ຊຸດ ແລະ ຢູ່ຫ້ອງວ່າການແຂວງອັດຕະປື 1 ຊຸດ ເພື່ອອໍານວຍຄວາມສະດວກໃຫ້ ຄະນະກໍາມະການສະເພາະກິດໃນການແກ້ໄຂໄພພິບັດລະດັບຊາດ ຕິດຕໍ່ປະສານງານກັບຫ້ອງວ່າການແຂວງອັດຕະປື ເພື່ອຕິດຕາມ, ຄຸ້ມຄອງ ແລະ ຊີ້ນໍາວຽກງານການກູ້ໄພທາງໄກ ພ້ອມທັງອໍານວຍຄວາມສະດວກໃຫ້ບັນດາເຈົ້າໜ້າທີ່ກ່ຽວຂ້ອງຂອງແຂວງອັດຕະປືສາມາດເຜີຍແຜ່ ແລະ ຈັດຕັ້ງປະຕິບັດທິດຊີ້ນໍາຢ່າງວ່ອງໄວ ແລະ ທັນຕາມສະພາບການ.
ທ່ານ ເພັດ ພົມພິພັກ ໄດ້ສະແດງຄວາມຂອບໃຈຕໍ່ ບໍລິສັດ ຫົວເຫວີຍ ເທັກໂນໂລຢີ (ລາວ) ຈຳກັດຜູ້ດຽວ ທີ່ໄດ້ສະໜັບສະໜູນ ແລະ ປະກອບສ່ວນໃຫ້ແກ່ວຽກງານການກູ້ໄພໃນແຂວງອັດຕະປືໃນຄັ້ງນີ້.
ບໍລິສັດ ຫົວເຫວີຍ ເທັກໂນໂລຢີ (ລາວ) ຈຳກັດຜູ້ດຽວ ຫວັງຢ່າງຍິ່ງວ່າ ລະບົບກອງປະຊຸມທາງໄກນີ້ ຈະສາມາດຊ່ວຍຍົກສູງປະສິດທິພາບຂອງວຽກງານກູ້ໄພ ແລະ ປະກອບສ່ວນເຂົ້າໃນການແບ່ງເບົາຄວາມທຸກໂສກຂອງພີ່ນ້ອງຜູ້ປະສົບໄພພິບັດ ພ້ອມທັງຊ່ວຍຟື້ນຟູຊີວິດການເປັນຢູ່ຂອງພີ່ນ້ອງຊາວລາວໃຫ້ກັບຄືນສູ່ປົກກະຕິໂດຍໄວ.
ຂ່າວ+ພາບ: ສິງຄຳ

ຂ່າວສານອື່ນໆ