ນາຍົກ ຮຽກຮ້ອງພີ່ນ້ອງຮ່ວມຊາດ ເພີ່ມຄວາມສາມັກຄີ ເພື່ອພ້ອມກັນສູ້ກັບໄພພິບັດໃນຄັ້ງນີ້

08-08-2018, 15:24 75

ຂປລ. ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ຮຽກຮ້ອງມາຍັງພີ່ນ້ອງຮ່ວມຊາດໃນທົ່ວປະເທດ ໂດຍເນັ້ນໜັກວ່າ: ເວລານີ້ ຍິ່ງກວ່າເວລາໃດໝົດ ທີ່ພວກເຮົາຕ້ອງເພີ່ມທະວີຄວາມສະໝານສາມັກຄີກັນຢ່າງເປັນປຶກແຜນ ເພື່ອຊ່ວຍເຫລືອເຊິ່ງກັນ ແລະ ກັນ ໃນຍາມທີ່ລຳບາກ ເພື່ອໃຫ້ສາມາດຜ່ານຜ່າອຸປະສັກ ແລະ ຄວາມຫຍຸ້ງຍາກໄປໄດ້.
ທ່ານ ນາຍົກລັດຖະມົນຕີ ກ່າວໃນກອງປະຊຸມລັດຖະບານສະໄໝວິສາມັນ ປະຈໍາເດືອນ ສິງຫາ 2018 ນີ້ວ່າ: ຈາກທຸກໆການຮ່ວມມື, ການຊ່ວຍເຫລືອ ແລະ ຄວາມເອົາໃຈໃສ່ຂອງພີ່ນ້ອງຊາວລາວໃນທົ່ວປະເທດ ພວກເຮົາເຊື່ອວ່າຈະສາມາດຜ່ານຜ່າອຸປະສັກ ແລະ ຄວາມຫຍຸ້ງຍາກ ໄປໄດ້ຢ່າງແນ່ນອນ ໃນການຕໍ່ສູ້ກັບວິກິດໄພພິບັດໃນຄັ້ງນີ້, ລວມທັງໃຫ້ສືບຕໍ່ມູນເຊື້ອວິລະຊົນຂອງຊາດ ແລະ ສືບຕໍ່ປົກປັກຮັກສາມູນເຊື້ອວັດທະນະທໍາອັນດີງານຂອງຊາດເຮົາໄວ້ຕະຫລອດໄປ.
ໃນຄະນະດຽວກັນ, ກໍໄດ້ຮຽກຮ້ອງມາຍັງ ພະນັກງານ, ທະຫານ, ຕໍາຫລວດ ຢູ່ບັນດາຂະ
ແໜງການທັງສູນກາງ ແລະ ທ້ອງຖິ່ນ ໃຫ້ຍົກຄວາມຮັບຜິດຊອບ ແລະ ຄວາມເປັນເຈົ້າການໃນການປະຕິບັດວຽກງານຂອງຕົນ ໃຫ້ສູງກວ່າເວລາປົກກະຕິ ເພື່ອພ້ອມກັນສູ້ຊົນແກ້ໄຂບັນຫາໄພພິບັດໃນຄັ້ງນີ້ ໃຫ້ສຳເລັດ ແລະ ລຸລ່ວງໄປໂດຍດີ.
ຂ່າວ: ສິງຄຳ

ຂ່າວສານອື່ນໆ