ພ້ອມກັນປະກອບຄຳເຫັນໃສ່ ຮ່າງ ກົດໝາຍວ່າດ້ວຍການຄຸ້ມຄອງໄພພິບັດ

22-06-2018, 15:24 370

ໃນວັນທີ 19 ມິຖຸນາ 2018ນີ້, ທີ່ເຮືອນຮັບແຂກກະຊວງ ຮສສ ໄດ້ມີກອງປະຊຸມປືກສາຫາລື ພ້ອມກັນປະກອບຄຳເຫັນໃສ່ ຮ່າງ ກົດໝາຍວ່າດ້ວຍການຄຸ້ມຄອງໄພພິບັດ, ໂດຍການເຂົ້າຮ່ວມຂອງທ່ານ ນ. ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ( ຮສສ ), ທ່ານ ສຈ ດາວອນ ຫວ່າງວິຈິດ, ອາດີດປະທານກໍາມາທິການກົດໝາຍສະພາແຫ່ງຊາດ, ບັນດາທ່ານ ຫົວໜ້າກົມ, ຮອງກົມ ຄະນະຊີ້ນຳ ແລະ ຄະນະກຳມະການສ້າງກົດໝາຍໄພພິບັດ ເຂົ້າຮ່ວມ.
ກອງປະຊຸມຄັ້ງນີ້ ແມ່ນຄັ້ງທຳອິດ ພາຍຫຼັງທີ່ມີຂໍ້ຕົກລົງແຕ່ງຕັ້ງ ຄະນະຊີ້ນໍາລວມ, ຄະນະວິຊາການ ແລະ ກອງເລຂາຊ່ວຍວຽກວິຊາການ ເພື່ອສ້າງກົດໝາຍວ່າດ້ວຍການຄຸ້ມຄອງໄພພິບັດ ສະບັບ ເລກທີ 1109/ຮສສ, ລົງວັນທີ 23 ເມສາ 2018. ການລິເລີ່ມສ້າງຮ່າງກົດໝາຍໄພພິບັດນີ້ ແມ່ນໄດ້ລິເລີ່ມມາແຕ່ ປີ 2015 ໂດຍການສະໜັບສະໜູນຂອງ ອົງການ UNDP, IFRC and ADB ຊຶ່ງໃນໄລຍະນັ້ນ ແ່ມ່ນຢູ່ຮ່າງດຽວກັນກັບ ຮ່າງກົດໝາຍ ວ່າດ້ວຍ ໄພພິບັດ ແລະ ການປ່ຽນແປງດິນຟ້າອາກາດ ໂດຍແມ່ນ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ເປັນເຈົ້າຂອງໂຄງການ. ຕົກມາໃນປີ 2017 ທັງຄະນະນໍາ ສອງ ກະຊວງ ໄດ້ຮ່ວມກັນຄົ້ນຄວ້າ ແລະ ແຍກຮ່າງກົດໝາຍອອກເປັນສອງກົດໝາຍ ຄື: ຮ່າງກົດໝາຍ ວ່າດ້ວຍ ການປ່ຽນແປງດິນຟ້າອາກາດ ແມ່ນ ມອບໃຫ້ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ເປັນຜູ້ສືບຕໍ່ດໍາເນີນ, ແລະ ຮ່າງກົດໝາຍວ່າດ້ວຍໄພພິຍັດ ແມ່ນມອບໃຫ້ ກະຊວງ ຮສສ ຮັບຜິດຊອບ.
ກອງປະຊຸມ ຄະນະກໍາມະການຮັບຜິດຊອບສ້າງຮ່າງກົດໝາຍໃນຄັ້ງນີ້ ກໍໄດ້ພ້ອມກັນສະແດງຄວາມຄິດເຫັນ ນໍາສະເໜີ ຮ່ວມກັນ ຄົ້ນຄວ້າ ແລະ ເອກະພາບຕໍ່ກັບຮ່າງເຄົ້າໂຄງຂອງກົດໝາຍ ລວມທັງ ແຜນກໍານົດກິດຈະກໍາ ແລະ ເວລາ ໃນການດໍາເນີນການສ້າງຮ່າງກົດໝາຍ ຊຶ່ງຄາດວ່າຈະໃຫ້ສໍາເລັດໃນຕົ້ນປີ 2019 ແລະ ເພື່ອຮັບປະກັນໃຫ້ວຽກງານການສ້າງຮ່າງກົດໝາຍ ວ່າດ້ວຍ ການປ້ອງກັນ ແລະ ຄວບຄຸມໄພພິບັດ ໄດ້ຖືກຈັດຕັ້ງປະຕິບັດຢ່າງມີຜົນສໍາເລັດຕາມຈຸດປະສົງ ແລະ ຄາດໝາຍທີ່ກໍານົດໄວ້.

( ພາບຂ່າວ: ເພັດສະໄໝ )

ຂ່າວສານອື່ນໆ