ລັດຖະມົນຕີ ຮສສ ເຄື່ອນໄຫວຊີ້ນຳວຽກ ແຮງງານ ແລະ ສະຫວັດດີການສັງຄົມ 2ແຂວງ ຊຽງຂວາງ ແລະ ແຂວງຫົວພັນ

22-03-2018, 09:11 160

ລັດຖະມົນຕີ ຮສສ ເຄື່ອນໄຫວຊີ້ນຳວຽກ ແຮງງານ ແລະ ສະຫວັດດີການສັງຄົມ 2ແຂວງ ຊຽງຂວາງ ແລະ ແຂວງຫົວພັນ.
.....................
ໃນວັນທີ 20-21 ມີນາ 2018ນີ້, ທ່ານ ປອ. ຄຳແພງ ໄຊສົມແພງ ເລຂາພັກກະຊວງ, ລັດຖະມົນຕີ ກະຊວງ ຮສສ, ໄດ້ລົງເຄື່ອນໄຫວຊີ້ນຳວຽກ ແຮງງານ ແລະ ສະຫວັດດີການສັງຄົມ 2 ແຂວງຊຽງຂວາງ ແລະແຂວງຫົວພັນ , ພ້ອມທັງໄດ້ໂອ້ລົມ ເພື່ອເປັນທິດເຍືອງທາງໃນການຈັດຕັ້ງປະຕິວຽກງານ ຊຶ່ງ ທ່ານລັດຖະມົນຕີຍັງໄດ້ຍ້ອງຍໍຊົມເຊີຍ ດ້ານຕໍ່ຜົນສຳເລັດທີ່ ພະແນກ ຮສສ ແຂວງ ຍາດມາໄດ້ໃນໄລຍະໜຶ່ງປີຜ່ານມາ, ຕໍ່ກັບບັນຫາ ແລະ ສິ່ງທ້າທາຍ ໃນໄລຍະໃໝ່ນີ້, ທ່ານລັດຖະມົນຕີ ຍັງໄດ້ເນັ້ນໜັກໃຫ້ທາງ ຮສສ ທັງ 2 ແຂວງ ຕ້ອງໄດ້ພ້ອມກັນປັບປຸງແກ້ໄຂດັ່ງນີ້: 
1. ເພີ່ມທະວີຄວາມສາມັກຄີພາຍໃນຄະນະພັກ, ຄະນະພະແນກໃຫ້ມີຄວາມເປັນເອກະພາບ, ຖືເອົາການສຶກສາອົບຮົມການເມືອງແນວຄິດ ໃຫຖັນແຖວພະນັກງານ-ລັດຖະກອນ ມີຄວາມໜັກແໜ້ນທາງດ້ານຄຸນທາດການເມືອງ ແລະ ມີຄວາມອຸ່ນອຽນທຸ່ນທ່ຽງ ຫ້າວຫັນ ຕື່ນຕົວປະຕິບັດໜ້າທີ່ດ້ວຍຄວາມຮັບຜິດຊອບສູງ, ປັບປຸງແບບແຜນວິທີເຮັດວຽກ ແລະ ຂອດການປະສານງານໃຫ້ມີ ຄວາມກົມກຽວ, ບຳລຸງສ້າງພະນັກງານ-ລັດຖະກອນ ໃຫ້ກຳແໜ້ນທາງດ້ານນະໂຍບາຍ, ກົດ ໝາຍ, ນິຕິກຳ ແລະ ລະບຽບການຕ່າງໆ ພ້ອມທັງປະ ຕິບັດໜ້າທີ່ຕາມພາລະບົດບາດ ເພື່ອເຮັດໃຫ້ວຽກງານມີຜົນສຳເລັດ ແລະ ບັນລຸຄາດໝາຍ ທີ່ວາງໄວ້.
2.) ເອົາໃຈໃສ່ຊຸກຍູ້ ແລະ ສົ່ງເສີມ ການສ້າງງານ ໂດຍນຳໃຊ້ທ່າແຮງຂອງຊຸມຊົນ-ທ້ອງຖິ່ນ, ສ້າງລະບົບຂໍ້ມູນຂ່າວສານຕະຫຼາດແຮງງານ ທີ່ໜ້າເຊື່ອຖືໃຫ້ແກ່ ທັງຜູ້ໃຊ້ແຮງງານ ແລະ ຜູ້ອອກແຮງງານສາມາດຮັບຮູ້ ແລະ ເຂົ້າເຖິງຂໍ້ມູນຕະຫຼາດແຮງງານ, ຮັບປະກັນການພັດທະນາສີມືແຮງງານຕາມຄວາມຕ້ອງການຂອງຕະຫຼາດແຮງງານ ແລະ ການສ້າງສີມືແຮງງານຕ້ອງຕິດພັນກັບການສ້າງທັດສະນະຄະຕິໃນການອອກແຮງງານ;
3). ໃຫ້ເອົາໃຈໃສ່ໂຄສະນາແກ່ຜູ້ອອກແຮງງານ ຮັບຮູ້ປະກົດການຕົວະຍົວະຫຼອກລວງແຮງງານ ປະເທດເພື່ອນບ້ານ ເພາະປັດຈຸບັນໄດ້ເກີດມີປະກົດການຫຼອກແຮງງານຜູ້ເປັນຊາວໜຸ່ມ-ຍິງໜຸ່ມລາວ ໄປຕ່າງອອກແຮງານຢູ່ປະເທດ ດ້ວຍຫຼາຍຮູບແບບ ເປັນຕົ້ນແມ່ນໄປອອກແຮງງານ, ສ້າງຄອບຄົວ ແລະ ຮູບແບບອື່ນໆ.ຂໍໃຫ້ທ້ອງຖິ່ນ, ໂດຍສະເພາະແມ່ນຂັ້ນບ້ານ ແລະ ເມືອງຕ້ອງເປັນເຈົ້າການ ແລະ ມີສະຕິລະວັງຕົວຕື່ມ;
4). ຕໍ່ກັບການປະຕິບັດນະໂຍບາຍຕໍ່ຜູ້ມີຜົນງານ ແລະ ຄຸນງາມຄວາມດີໃນພາລະກິດຮັບໃຊ້ການປະຕິວັດຊາດ ເອົາໃຈໃສ່ກວດກາຄືນຈໍານວນແຕ່ລະ ກຸ່ມເປົ້າໝາຍຕ່າງໆໃຫ້ລະອຽດ ວ່າ ປັດຈຸບັນນີ້ ຫຍັງເທົ່າໃດແທ້ ແລ້ວຈຶ່ງຂຶ້ນແຜນເພື່ອແກ້ໄຂຢ່າງມີຈຸດສຸມ, ກຸ່ມເປົ້າໝາຍໃດທີ່ເຫັນວ່າສົມຄວນ ແລະ ເໝາະສົມ ກໍ່ຄວນພິຈາລະນາ,ສຶກສາ ແລະ ຄົ້ນຄວ້າເບິ່ງວ່າຈະສ້າງຕັ້ງສະມາຄົມຜູ້ອາຍຸສູງໄດ້ແນວໃດ, ທີ່ສາມາດຕິດຕາມ ຊີວິດການເປັນຢູ່ ແລະ ຄວາມຕ້ອງການທີ່ຈໍາເປັນໃນແຕ່ລະວັນຂອງຜູ້ອາຍຸສູງໄດ້;
5.)ໃຫ້ພະແນກ ເອົາໃຈໃສ່ ປຶກສາຫາລື ກັບແຂວງກ່ຽວກັບວຽກງານສ້າງບ້ານພັດທະນາວຽກງານ ຮສສ ,ປະສານ ສົມທົບກັບບັນດາຫ້ອງການຮສສ ປະຈໍາເມືອງ, ພາກສ່ວນກຽ່ວຂ້ອງເພື່ອກໍານົດຈໍານວນບ້ານ ແລະ ຄອບຄົວທີ່ຈະສ້າງເປັນບ້ານພັດທະນາຢ່າງມີຈຸດສຸມແລະ ຕິດພັນກັບຫຼາຍຂະແໜງການເຊິ່ງເປັນບັນຫາລວມ, ຈຶ່ງສະເໜີໃຫ້ແຂວງຊ່ວຍຊີ້ນຳ ພະແນກ ຮສສ ຢ່າງໃກ້ຊິດຕື່ມ; 
6. ການຊ່ວຍເຫຼືອຜູ້ປະສົບເຄາະຮ້າຍຈາກໄພພິບັດຕ່າງໆ ໃຫ້ເອົາໃຈໃສ່ດ້ານການ ປະສານງານ ກັບພາກສ່ວນຕ່າງໆໃຫ້ໄວ ແລະ ມີມາດຕະການໃຫ້ການຊ່ວຍເຫຼືອໃຫ້ ທັນ ການບໍ່ໃຫ້ແກ່ຍາວເວລາ.
7.ໃຫ້ເອົາໃຈໃສ່ວຽກງານບໍລິຫານຕື່ມອີກ ໂດຍສະເພາະແມ່ນ ການປະຕິບັດນະໂຍບາຍຕໍ່ພະ ນັກງານ-ລັດຖະກອນ ໃນດ້ານຊີວິດການເປັນຢູ່ ເບິ່ງແຍງດູແລ ແລະ ແກ້ໄຂ ຄວາມຫຍຸ້ງຍາກຕ່າງໆ ການປະຕິບັດໜ້າທີ່ວຽກງານຈຶ່ງຈະມີຄຸນນະພາບ. 
8. ວຽກງານກາແດງ ໃຫ້ສືບຕໍ່ໂຄສະນາຂົນຂວາຍຊາວໜຸ່ມຢູ່ບັນດາພະແນກການ ຂອງລັດ, ໂຮງຮຽນ, ໂຮງໝໍ, ກົມກອງທະຫານ ແລະ ປ້ອງກັນຄວາມສະຫງົບ, ຫົວໜ່ວຍ ທຸລະກິດ, ຢູ່ບັນດາເມືອງ ແລະ ບ້ານຕ່າງໆ ໃຫ້ຮ່ວມແຮງກັນອອກມາບໍລິຈາກ ເລືອດເພື່ອຊ່ວຍເຫລືອສັງຄົມ ໃຫ້ທ່ວງທັນສະພາບການ. 
9.ໃຫ້ຮີບຮ້ອນກໍານົດແຜນ ແລະ ໂຄງການ ເພື່ອສໍາຫຼວດພື້ນທີ່ກວດກູ້ລະເບີດ ແລະ ແຜນການຊ່ວຍເຫຼືອຜູ້ໄດ້ຮັບເຄາະຮ້າຍຈາກລະເບີດບໍ່ທັນແຕກ ເພື່ອຈະໄດ້ລົງມືຈັດຕັ້ງປະຕິບັດຕາມໄລຍະເວລາອັນຄວນ ໃນທຶນຊ່ວຍເຫຼືອຈາກສາກົນໂດຍໄວ.
ທັງໝົດນີ້, ທີ່ ທ່ານ ລັດຖະມົນຕີ ກ່າວມານັ້ນ, ແມ່ນ ເພື່ອເຮັດໃຫ້ວຽກງານແຮງງານ ແລະ ສະຫວັດ ດີການສັງຄົມ ຂອງແຂວງຊຽງຂວາງ ແລະ ຮສສ ແຂວງຫົວພັນ ໃຫ້ມີບາດກ້າວຂະຫຍາຍຕົວໃໝ່ ແລະ ມີຜົນສຳເລັດຫລາຍກ່ວາເກົ່າ.
ໂອກາດດັ່ງກ່າວ, ທ່ານ ປອ ຄຳແພງ ໄຊສົມແພງ ຍັງໄປຢຽມຢາມສູນເສຍອົງຄະ 11 ແຂວງຫົວພັນ ພ້ອມທັງໄດ້ມອບເງິນ ຈຳນວນ 5 ລ້ານກີບ ເພື່ອຊຸກຍູ້ຂວັນກຳລັງໃຈໃຫ້ກັບພະນັກງານສູນເສຍອົງຄະນຳອີກ./

(ຂ່າວ: ເພັດສະໄໝ )

ຂ່າວສານອື່ນໆ