ເພື່ອຢັ້ງຢືນໃຫ້ເຫັນເຖິງຜົນງານການຈັດຕັ້ງປະຕິບັດວຽກງານ ໃນໄລຍະ 1 ປີຜ່ານມາ ພະແນກແຮງງານ ແລະ ສະຫວັດດີການສັງຄົມແຂວງຊຽງຂວາງ

15-02-2018, 08:52 468

ເພື່ອຢັ້ງຢືນໃຫ້ເຫັນເຖິງຜົນງານການຈັດຕັ້ງປະຕິບັດວຽກງານ ໃນໄລຍະ 1 ປີຜ່ານມາ ພະແນກແຮງງານ ແລະ ສະຫວັດດີການສັງຄົມແຂວງຊຽງຂວາງ ໄດ້ຈັດກອງປະຊຸມປະຈໍາປີ 2017 ຂຶ້ນ ໃນຕອນເຊົ້າວັນທີ 30 ມັງກອນ 2017 ພາຍໃຕ້ການເປັນປະທານຂອງທ່ານ ວ່າງເລ່ຍ ເລຂາຄະນະພັກຮາກຖານ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງຊຽງຂວາງ, ໃຫ້ກຽດເຂົ້າ ຮ່ວມໂດຍທ່ານ ປອ ຄໍາແກ້ວ ສານບຸນຄຸນໄຊ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ມີທ່ານ ບົວສອນ ສີນວນທອງ ຮອງເລຂາພັກແຂວງ ຮອງເຈົ້າແຂວງໆຊຽງຂວາງຂວາງ, ມີບັນດາທ່ານ ຮອງຫົວໜ້າພະແນກການອ້ອມຂ້າງແຂວງ, ມີບັນດາທ່ານເຈົ້າເມືອງ, ຮອງເຈົ້າເມືອງ, ຫົວໜ້າຫ້ອງການ ຮສສ ເມືອງທົ່ວແຂວງ ແລະ ມີພະນັກງານພະແນກ ຮສສ ແຂວງທັງໝົດເຂົ້າຮ່ວມ.
ໃນພິທີ ທ່ານ ສົມບູນ ນັນທະວົງ ຮອງຫົວໜ້າພະແນກ ຮສສ ແຂວງໄດ້ຂຶ້ນຜ່ານບົດສະຫຼຸບ ການຈັດຕັ້ງປະຕິບັດວຽກງານ 1 ປີຜ່ານມາເຊິ່ງມີຜົນສໍາເລັດໃນຫຼາຍໆດ້ານ, ເຊິ່ງທ່ານໄດ້ລາຍງານໃຫ້ຮູ້ວ່າ 1 ປີຜ່ານມາໄດ້ເກັບກໍາສະຖິຕິກໍາລັງແຮງງານທີ່ມີອາຍຸ ແຕ່ 14-60 ປີ ມີ 155,998 ຄົນ, ຍິງ 81,218 ຄົນ, ຜູ້ມີວຽກເຮັດງານທຳຈໍານວນ 151,766 ຄົນ, ຍິງ 78,889 ຄົນ, ຜູ້ຫວ່າງງານຈໍານວນ 4,232 ຄົນ, ຍິງ 2,329 ຄົນ ແລະ ໄດ້ຈັດຝຶກອົບຮົມ ແລະ ພັດທະນາສີມືແຮງງານ ໃນສາຂາອາຊີບຕ່າງໆໄດ້ທັງໝົດ 3,689 ຄົນ, ຍິງ 1,102 ຄົນ, ສາມາດຈັດຫາວຽກເຮັດງານທໍາ ໃຫ້ກໍາລັງແຮງງານໄດ້ຈໍານວນ 3,943 ຄົນ, ຍິງ 1,147 ຄົນ.ເກັບກໍາຜູ້ຕ້ອງການມີວຽກເຮັດງານທໍາໄດ້ຈໍານວນ 3,719 ຄົນ, ຍິງ 1,822 ຄົນ, ຂຶ້ນທະບຽນ ແລະ ອອກບັດອະນຸຍາດເຮັດວຽກໃຫ້ແຮງງານຕ່າງປະເທດ ທີ່ຖືກຕ້ອງຕາມກົດໝາຍຈໍານວນ 171 ຄົນ, ຍິງ 29 ຄົນ ແລະ ຕໍ່ບັດອະນຸຍາດເຮັດວຽກໃຫ້ແຮງງານຕ່າງປະເທດຈໍານວນ 264 ຄົນ, ຍິງ 45 ຄົນ. ດໍາເນີນການແກ້ໄຂຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດ ຕາມຄໍາສັ່ງເລກທີ 62/ນຍ ຄັ້ງທີ່ 2 ໄດ້ທັງໝົດຈໍານວນ 1,089 ຄົນ, ຍິງ 2017 ຄົນ. ປະກອບສັນຍາແຮງງານລະຫວ່າງຜູ້ໃຊ້ແຮງງານ ແລະ ຜູ້ອອກແຮງງານໄດ້ 139 ຄູ່ສັນຍາ. ພ້ອມນັ້ນ ໄດ້ຊຸກຍູ້ຕິດຕາມການຈັດຕັ້ງປະຕິບັດປະຕິບັດກອງທຶນຜູ້ອາຍຸສູງ ເຊິ່ງປີ 2017 ມີສະມາຊິກກອງທຶນທັງໝົດ 1,938 ທ່ານ , ມີເງິນກອງທຶນ 383,139,938 ກີບ. ໄດ້ຂະຫຍາຍອັດຕາປົກຄຸມປະກັນສັງຄົມໄດ້ທັງໝົດ 30,057 ຄົນ ເທົ່າກັບ 11,9% ຂອງພົນລະເມືອງ. ປະຕິບັດເງິນເສຍຊີວິດໃຫ້ພະນັກງານບຳນານຈໍານວນ 46 ຄົນ, ເປັນເງິນ 2,860,695,968 ກີບ, ພະນັກງານເສຍອົງຄະ 33 ຄົນ, ເປັນເງິນ 444,722,160 ກີບ, ພະນັກງານປະຈຳການ 21 ຄົນ, ເປັນເງິນ 1,460,702,880 ກີບ, ຄູ່ສົມລົດ 12 ຄົນ, ເປັນເງິນ 145,641,180 ກີບ ແລະ ລູກຜູ້ປະກັນຕົນ 14 ຄົນ ເປັນເງິນ 87,639,600 ກີບ. ນອກນັ້ນຍັງປະຕິບັດນະໂຍບາຍຕໍ່ຜູ້ມີຜົນງານຄຸນງາມຄວາມດີໃນພາລະກິດ ການປະຕິວັດຊາດປະຊາທິປະໄຕໄດ້ 206 ທ່ານໃນນັ້ນມີ ເງິນອຸດໜຸນນາມມະຍົດນັກຮົບແຂ່ງຂັນແຫ່ງຊາດໄດ້ 1 ທ່ານ, ເປັນເງິນ 10,000,000 ກີບ, ເງິນນະໂຍບາຍປ່ຽນແທນໂກຕາລົດ ໃຫ້ນັກຮົບແຂ່ງຂັນແຫ່ງຊາດ ແລະ ນັກຮົບປະຕິວັດອາວຸໂສ ຈໍານວນ 22 ທ່ານ, ເປັນເງິນ 1,580,342,400 ກີບ, ເງິນນະໂຍບາຍອຸດໜູນອອກການ(ຜູ້ຍັງມີຊີວິດ) ຈຳນວນ 72 ທ່ານ, ເປັນເງິນ 1,239,463,150 ກີບ, ເງິນນະໂຍບາຍອຸດໜູນເສຍສະຫຼະຊີວິດ ຈຳນວນ 101 ທ່ານ ເປັນເງິນ 2,117,736,000 ກີບ, ເງິນກູ້ຢືມສົມທົບປຸກສ້າງ ຈຳນວນ 10 ທ່ານ, ເປັນເງິນ 300,000,000 ກີບ, ປະຕິບັດການຕັດເຄື່ອງນຸ່ງປະຈຳປີໃຫ້ພະນັກງານ 2 ສູນເສຍອົງຄະຂອງແຂວງໄດ້ຈຳນວນ 67 ຄົນ, ເປັນເງິນ 107,870,000 ກີບ. ລະດົມທຶນເຂົ້າກອງທຶນສັງຄົມສົງເຄາະຂັ້ນແຂວງໄດ້ 52 ພາກສ່ວນ ເປັນເງິນທັງໝົດ 91,575,000 ກີບ. ໄດ້ຊ່ວຍເຫຼືອສົງເຄາະປະຊາຊົນຜູ້ທີ່ປະສົບໄພພິບັດຕ່າງໆໄດ້ຈໍານວນ 26 ຄອບຄົວ, ຈໍານວນພົນ 156 ຄົນ, ຍິງ 78 ຄົນ. ນອນນີ້ ທ່ານຍັງໄດ້ລາຍງານໃຫ້ຮູ້ອີກວ່າ ວຽກງານຊຸກຍູ້ການກວດກູ້ລະເບີດໄດ້ ໂຄສະນາສຶກສາຄວາມສ່ຽງຈາກລະເບີດບໍ່ທັນແຕກໄດ້ 51 ບ້ານ ແລະ ສຳຫຼວດທົ່ວໄປໄດ້ 106 ບ້ານ ເທົ່າກັບ 92.98%, ສຳຫຼວດວິຊາການໄດ້ 7,697 ຮຕ, ເທົ່າກັບ 143.60% ຂອງແຜນປີ, ກວດກູ້ລະເບີດອອກຈາກພື້ນທີ່ໄດ້ 12,164 ຮຕ, ເທົ່າກັບ 120,44% ຂອງແຜນປີ, ໄດ້ທຳລາຍລູກລະເບີດອອກຈາກພື້ນທີ່ດັ່ງກ່າວທັງໝົດ 31,883 ໜ່ວຍ, ໃນນັ້ນມີ ບົ່ມໃຫ່ຍ 14 ໜ່ວຍ, ບົ່ມບີ່ 18,062 ໜ່ວຍ ແລະ ສຳພາວຸດອື່ນໆ 5,005 ໜ່ວຍ.
ແລະ ທ່ານຍັງໄດ້ລາຍທິດທາງແຜນການທີ່ຈະຈັດຕັ້ງປະຕິບັດວຽກງານໃນ 1 ປີຕໍ່ໜ້າ ໃຫ້ຜູ້ແທນກອງປະຊຸມໄດ້ຮັບຮູ້ ແລະ ໃຫ້ຜູ້ແທນກອງປະຊຸມຊ່ວຍປະກອບຄໍາຄິດເຫັນຕ່າງໆຕໍ່ກັບວຽກງານຂົງເຂດແຮງງານ ແລະ ສະຫວັດດີການສັງຄົມ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າ ໄດ້ຮັບປະສິດທິພາບ ແລະ ປະສິດທິຜົນສູງ.
ໃນກອງປະຊຸມທ່ານ ຄໍາແກ້ວ ສານບຸນຄຸນໄຊ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມໄດ້ມີຄໍາຄິດເຫັນ ແລະ ໃຫ້ທິດຊີ້ນໍາຕໍ່ການຈັດຕັ້ງປະຕິບັດວຽກງານຂອງພະແນກແຮງງານ ແລະ ສະຫວັດດີການສັງຄົມແຂວງຊຽງຂວາງ ເປັນຕົ້ນແມ່ນຕ້ອງໄດ້ເພີ່ມທະວີຄວາມສາມັກຄີພາຍໃນຄະນະພັກ, ຄະນະພະແນກ ໃຫ້ມີຄວາມເປັນເອກະພາບ ປັບປຸງແບບແຜນວິທີເຮັດວຽກໃຫ້ເປັນລະບົບ, ປະສານສົມທົບພາກສ່ວນຕ່າງໆ ໃນການຄຸ້ມຄອງແຮງງານຕ່າງປະເທດໃຫ້ຖືກຕ້ອງ, ພ້ອມທັງເກັບກໍາຂໍ້ມູນຕົວເລກໃຫ້ລະອຽດຊັດເຈນໃນແຕ່ລະດ້ານ. ເອົາໃຈໃສ່ຄົ້ນຄວ້າ ແລະ ຈັດລຽງບູລິມະສິດຜູ້ມີຜົນງານຄຸນງາມຄວາມດີໃນພາລະກິດປະຕິວັດ ສົ່ງໄປໃຫ້ກົມນະໂຍບາຍເພື່ອສະ ເໜີລັດຖະມົນຕີອະນຸມັດ ແລະ ພ້ອມນັ້ນ ກໍ່ພ້ອມກັນເພີ່ມທະວີເອົາໃຈໃສ່ວຽກງານອົງການຈັດຕັ້ງມະຫາຊົນ ເຂົ້າໃນການຈັດຕັ້ງປະຕິບັດໜ້າທີ່ວຽກງານໂດຍສະເພາະວຽກງານຈັດຕັ້ງ-ພະນັກງານ, ເອົາໃຈໃສ່ປະຕິບັດລະບອບຫຼັກການປະຊາທິປະໄຕ ປະຕິບັດສຽງສ່ວນໜ້ອຍຂຶ້ນກັບສຽງສ່ວນຫຼາຍໃຫ້ເຂັ້ມງວດ, ປະຕິບັດຕາມລະບອບຫົວໜ້າດຽວ ເພື່ອເຮັດໃຫ້ວຽກງານມີປະສິດທິພາບ ແລະ ປະສິດທິຜົນທີ່ດີຂຶ້ນກວ່າເກົ່າ.

ຂ່າວສານອື່ນໆ